Levi 24 - Gourmanchéma Bible

¹ Li Miali Diedo den maadi leni Musa ki yedi:

² «Puogi Isalele yaaba ban cuani apo mu fidisanmu po*olifie yaa kpama yaama n ŋani hali bonŋanla, mun yaa co yogunu kuli.

³ U fidisantuankaanu yeni se u *Kadikaanu gbandieli tugu nni, bu *kpalidoaginkaabu nintuali. Alono baa ŋanbi ki sieni yeni ke mu fidisanmu yeni baa dua ki co Li Miali Diedo kani. Li tie yaa *balimaama n kan pendi hali abada yi puoliŋuani po.

⁴ Alono baa sieni mu fidisanmu yeni yaa fidisantuankaanu n tie wula yeni po, mun yaa co Li Miali Diedo kani yaa yogunu kuli.

Ban puuni yaa dupen U Tienu

⁵ Ŋan go taa mi yoma ki pua piiga n dupen bonba lie. Dupen kuli yaa yoma baa tie kilo bonba luoba.

⁶ Yin taa dupen yeni ki bili kpami lie bonba luoba luoba yaa tabilo n tie wulamoano yua n se Li Miali Diedo nintuali yeni po.

⁷ Yin go taa yaa *dugibila n ŋani bonŋanla ki sieni dupen kpamu kuli kani, a dugibila yeni baa tie mi tiadima bonla ki maa dupen yeni po ki juu leni mi fantama Li Miali Diedo nintuali.

⁸ Fuodima daali kuli bi kopadicianba baa biliti laa dupen Li Miali Diedo nintuali yogunu kuli. Li tie Isalele yaaba po yaa *ŋantaado n kan pendi hali abada.

⁹ Dupen yeni tie Alono leni o bijaba yaa po. Bi baa ŋmani o yaa kaanu n gagidi ki ŋani yaa niinni, kelima li tie bipo yaa paabu n gagidi ki ŋani hali boncianla, ban juugi Li Miali Diedo nintuali yaa pabuoli siiga yenbu. Li tie yaa balimaama n kan pendi hali abada.»

Yaa nilo n soli U Tienu yaa buudi

¹⁰ Isalele pua yaa bijua, ama ke o baa nan tie Ejipiti yua, den kua Isalele yaaba nagili nni ke wani Isalele pua yaa bijua leni Isalele yua den koani.

¹¹ Isalele pua yeni yaa bijua den soli ki go sugi U Tienu yaa yeli. Bi den gedini o Musa kani. O nilo yeni naa den yi Selomiti, ki tie Dana buolu yua, Dibili yaa bisalo.

¹² Bi den luoni o nilo yeni li kpaadidieli nni ki guudi hali Musa n baa waani ba Li Miali Diedo n yedi yaala.

¹³ Li Miali Diedo den maadi leni Musa ki yedi:

¹⁴ «Teni ban ñani yaa nilo n soli mini yaa yeli yeni li nagili niinpo. Yaa niba n den gbadi o maama kuli baa maani bi nii o yuli po. Lani li nitaanli kuli baa lugidi o a tana ki kpa o.

¹⁵ Ŋan go yedi Isalele yaaba kuli mine: Yaa nilo n soli o Tienu kuli baa tugi o *tuonbiadi panpaani.

¹⁶ Yaa nilo n soli Li Miali Diedo yeli kuli bi baa kpa o. Li nitaanli niba kuli baa lugidi o a tana ki kpa o. Wan tie caano leni wan tie dotielo kuli, kelima o sugi U Tienu yeli.

¹⁷ Yaa nilo n pua ki ku o lielo, bi baa kpa o moko.

¹⁸ Yaa nilo n pua ki kpa nitoa yanga, o baa pa li daano o yanga. Li miali n baa pa li miali panli.

¹⁹ O nilo yaa pua ki poagili o lielo, bi baa tieni o nani wan tieni o lielo maama.

²⁰ O yaa kua li kpabili, bi baa kua o yaa kpabili. Bu nunbu n baa pa nunbu panli, li ñinli mo n baa pa ñinli panli. Wan poagili o lielo maama bi baa poagili o mo yeni.

²¹ Yua n pua ki kpa o lielo yanga, baa goa ki pa yantoaga. Ama yua n kpa o nilo, bi baa kpa wani oba.

²² Yi baa pia balimayenma o caano leni Isalele buolu yua kuli po. N tie Li Miali Diedo yi Tienu.»

²³ Musa den maadi ki waani Isalele yaaba laa maama kuli. Bi den ñani o nilo yeni li nagili niinpo ki lugidi o a tana ke o kpe. Isalele yaaba den tieni Li Miali Diedo n den waani Musa yaa ñoabonli yeni.