Levi 23 - Gourmanchéma Bible

¹ Li Miali Diedo den maadi leni Musa ki yedi:

² «Maadi leni Isalele yaaba ki yedi ba: Yin baa kpaani ki waani bi niba yaa *jaanma dana yeni baa tie yaa taanma n gagidi ki ŋani. Diidi mani n jaanma dana ne:

³ Nilo kuli baa tuuni o tuonli dana luoba, ama li daleleeli daali yi kan tieni pu kuli laa daali, kelima li tie mi *fuodima daali. Li baa pia taangagidikaali. Yi kan soani tuonliba kuli. Li tie Li Miali Diedo fuodima daali yin kaa naankani kuli po.

⁴ Diidi mani Li Miali Diedo jaanma dana, leni yaa taanma n gagidi ki ŋani, yin baa kpaani ki wangi yaama, mi yogunu yaa pundi.

Mi Pendima jaanma leni yaa dupen n ki pia dabinli jaanma

⁵ Ciyendo piiga n danaali daali yaa yenjuogu baa tie mi*Pendima jaanma Li Miali Diedo po.

⁶ Laa ŋmaalo yaa piiga n damuuli daali baa tie yaa dupen n ki pia *dabinli jaanma Li Miali Diedo kpiagidi po. Yi baa ŋmani yaa dupen n ki pia dabinli hali dana lele.

⁷ Li dakpiali, yi baa tieni taangagidikaali. Yi kan soani tuonliba kuli.

⁸ Laa danleleeda nni yi baa padi Li Miali Diedo po a padijuukaana. Li daleleeli daali, baa pia taangagidikaali, yi kan soani tuonpaaliba kuli.»

Li dibabikpiali yaa jaanma

⁹ Li Miali Diedo den maadi leni Musa ki yedi:

¹⁰ «Maadi leni Isalele yaaba ki yedi ba: Yi yaa kua min baa pa yi yaa diema nni yaa yogunu, ke u jetaagu yogunu ban pundi, yi baa taa li dibabili ki cua ki teni o kopadiciamo, yaala n tie yi kuanu yeni yaa bonluonka-kpiala.

¹¹ O baa ga li dibabili yeni ki tieni yaa bogidili n doagidi ke o teni la Li Miali Diedo, ke Li Miali Diedo n ga. Li baa tie U Tienu fuodima daali yaa fiifaama ke o kopadiciamo baa tieni laa bogidili.

¹² Yin tieni yaa bogidili n doagidi ke yi teni li Li Miali Diedo yaa daali yene ke yi go baa padi Li Miali Diedo po li padijuukaali, yaa pebiga n ki pia poadi.

¹³ Yi go baa pugini yaa paabu n tie ne: yaa yoma n kali leni mi kpama kilo bonba luoba, man tua yaa paabu n sia leni mi fantama, ki pia u nuulimanu Li Miali Diedo po. Yi go baa cuani duven litidi yendo leni boagidima, li*ñincabili yaa po.

¹⁴ Yi kan ŋmani dupen, bi disiansagidi, bi ŋalikamapaano hali ke yi daa cua ki puni yi Tienu li bonluonka-kpiala yaa paabu. Li tie yaa *balimaama n kan pendi hali abada, yi puoliŋuani po leni yin baan yaa ye naankani kuli.

U jetaagu jaanma

¹⁵ Mi fuodima daali yeni yaa fiifaama, yin cuani ke bi tieni yaa bogidili n doagidi ke bi teni li dibabili yeni Li Miali Diedo yaa daali yeni, yi baa coadi dana lele mi lele.

¹⁶ Yi baa coadi dana piimuu ki pundi yaa fuodima daali n biini bona lele yaa fiifaama. Laa daali yi go baa pa Li Miali Diedo yi *ŋalikama yeni yaa bonluonkapanla.

¹⁷ Yi baa ñani yi diena nni dupen bonba lie ki tieni yaa bogidili n doagidi ke yi teni la Li Miali Diedo. Yi baa taa mi yoma kilo bonba taa ki taani leni li dabinli ki pua dupen yendo. Li tie li bonluonka-kpiala paabu Li Miali Diedo po.

¹⁸ Yi baa cuani pebila lele yaa n pia binli binli ki naa pia poadi, leni naatonbili, leni petona lie ki taani leni dupen yeni ki padi ba lan tua li padijuukaali Li Miali Diedo po. Bu paabu leni li *ñincaba yaala n naani leni yaa paabu n juu mi fantama nni, baa pia yaa nuulu n mani Li Miali Diedo po.

¹⁹ Yi go baa padi li ŋuabuali, lin tua ti *tuonbiadi padili leni pebila lie yaaba n pundi binyenli, ban tua taanyenma padili.

²⁰ O kopadiciamo baa tieni yaa bogidili n doagidi ke o teni la Li Miali Diedo nintuali, o ŋalikamapaano leni a pebilieda yeni, ki gagidi likuli Li Miali Diedo po. Li baa tie o kopadiciamo yaa biinu.

²¹ Laa daali yi baa kpaani ki tieni taangagidikaali. Yi kan soani tuonpaaliba kuli. Li tie yaa balimaama n kan pendi hali abada, yi puoliŋuani kuli po, yin baan yaa ye naankani kuli.

²² Yi yaa ye yi diema nni ke u jetaagu yogunu pundi, yi yaa taagi yi kpaandi, yin ŋa poyendu yi kuanu nni ki da yendi. Yin da yendi yaala n sieni mi liegima po. Yi baa ŋa lani o luodo leni o caano po, ban liegi. N tie Li Miali Diedo yi Tienu.»

Mi tiadima leni li pamanli daali

²³ Li Miali Diedo den maadi leni Musa ki yedi:

²⁴ «Maadi leni Isalele yaaba ki yedi ba: Cilele dakpiali baa tie yipo fuodima daali. Yi baa piebi a naatuntuna ki kpaani. Yi baa taani bi niba ki tieni taangagidikaali.

²⁵ Yi kan soani tuonpaaliba kuli, yi baa padi Li Miali Diedo po a padijuukaana.»

Ti tuonbiadi sugili dacianli

²⁶ Li Miali Diedo den maadi leni Musa ki yedi:

²⁷ «Cilele yaa danpiiga daali baa tie ti tuonbiadi sugili dacianli yaa jaanma. Yi baa yini bi niba ki tieni taangagidikaali. Yi baa loli yi ñoana ki biidi yi pala ki padi Li Miali Diedo po a padijuukaana.

²⁸ Yi kan soani tuonliba kuli laa daali kelima li tie ti tuonbiadi sugili yaa daali, ban baa tieni yipo sugili Li Miali Diedo nintuali yaa daali.

²⁹ Yaa nilo n naa loli o ñoabu ki biidi o pali laa daali, bi baa paadi ki ñani o o niba siiga.

³⁰ Yaa nilo n soani tuonliba laa daali mo, n baa bolini o ki ñani o o niba siiga.

³¹ Yin da soani tuonliba kuli. Li tie yaa bali maama n kan pendi hali abada nifiima n tu nifiima po, yin baan yaa ye naankani kuli.

³² Li baa tie yaa fuodima daali n gagidi yipo, yi baa luo yi ñoana ki biidi yi pala. Mi jaanma yeni baa cili o ŋmaalo dayiali yaa yenjuogu, ki yaa caa hali yaa daali n ŋua yaa yenjuogu. Yi baa kubi laa fuodima daali jaanma.»

A koasuga jaanma

³³ Li Miali Diedo den maadi leni Musa ki yedi:

³⁴ «Maadi leni Isalele yaaba ki yedi ba: Cilele yeni yaa piiga n damuuli daali baa tie a koasuga jaanma dana Li Miali Diedo kpiagidi po hali ki pundi dana lele.

³⁵ Li dakpiali yi baa taani ki tieni taangagidikaali, yi kan soani tuonpaaliba kuli.

³⁶ Hali dana lele banlu yi baa padi Li Miali Diedo po a padijuukaana. Li daniili daali yi go baa tieni taangagidikaali ki go padi Li Miali Diedo po a padijuukaana. Mi baa tie yaa taanma n pia li fangili hali boncianla, yi kan soani tuonpaaliba kuli.

³⁷ Lani n tie Li Miali Diedo n bili yipo yaa jaanma dana. Yin kpaani ki waani bi niba laa jaanma dana, ki tieni yaa taanma n gagidi ki ŋani ki padi Li Miali Diedo po yaa pada n juu mi fantama leni a padijuukaana leni mi yanduanma paabu yaa pada leni ti tuonbiadi sugili miabu yaa pada leni a ñincaba padibuolu kuli leni u daali.

³⁸ Laa pada baa pugini yin padi npo yaa mi fuodima dana, ke li tie yanbuama paabu bi li nianli padili Li Miali Diedo po.

³⁹ Cilele yeni piiga n damuuli daali yi yaa taani ki gbeni mi diema kuani jetaagu, yi baa jaani Li Miali Diedo po laa jaanma hali dana lele banlu. Li dakpiali baa tie fuodima daali, li dajuodikaali moko n yaa tie fuodima daali.

⁴⁰ Li dakpiali yi baa taa i tiŋami bonluonkaala ki yaa muubi, leni ti kpakpati leni yaa tiidi yaa faadi n yaba yaa beni, leni i kpentiidi yaa beni. Yi baa mangidi yi pala Li Miali Diedo yi Tienu nintuali yeni hali dana lele.

⁴¹ Binli kuli yi baa jaani laa jaanma ki yaa kpiagidi Li Miali Diedo hali dana lele banlu. Li tie yaa bali maama n kan pendi hali abada yi nifiima kuli po. Yi baa jaani ma cilele yaa niinni.

⁴² Yi baa ña yi diena nni ki yaa ye a koasuga nni, hali dana lele. Isalele diema nni nibuoli yaa niba kuli baa ye a koasuga yeni niinni.

⁴³ Lani n tie yi puoliŋuani n bandi ke mini Li Miali Diedo n den teni ke Isalele yaaba den ye a koasuga nni min den ñani yi Ejipiti diema nni yaa yogunu. N tie Li Miali Diedo yi Tienu.»

⁴⁴ Lani n tie Musa n den waani Isalele yaaba Li Miali Diedo jaanma dana ke a tie maama n yeni.