Levi 22 - Gourmanchéma Bible

¹ Li Miali Diedo den maadi leni Musa ki yedi:

² «Maadi Alono leni o bijaba ki waani ba ban fangi bi yula ki paadi Isalele yaaba n cuani ki gagidi npo yaa padijiedi. Lani n tie bani Alono leni o bijaba yeni n da fali ki biidi n yeli yaali n gagidi. N tie Li Miali Diedo.

³ Yedi ba: Yi puoliŋuani kuli yaa siiga nifiima n tu nifiima, yaa ja n nagini Isalele yaaba n gagidi yaa padijiedi Li Miali Diedo po, ki nan pia joagindiba o niinni, n baa paadi ki ñani laa nilo n nintuali. N tie Li Miali Diedo.

⁴ Alono puoliŋuani siiga yaa ja n pia mi *gbaadima, bi o *fado, kan je yaa jiema n gagidi ki ŋani, hali ke o daa ŋanbi oba. Li baa yaa tie yeni leni yua n sii yaa nilo n*joagini ke li daano sii tinkpilo, yua n joagini kelima o biidi o kpataali.

⁵ Yua n joagini kelima o sii yaa bonfuodila n balini tiipo po, bi yua n sii yaa nilo n pia joagindiba ke ti tabi o.

⁶ Yaa nilo n sii laa bonbuolu kuli baa yaa ye leni o joagindi hali ku yenjuogu. O kan fidi ki je yaa jiema n gagidi ki ŋani. Ama o baa wali.

⁷ Lanwani u yienu yaa kua o baa ŋanbi. Lani yaa pendi o baa je yaa padijiema n gagidi ki ŋani kelima li tie o jiema.

⁸ O kan ŋmani yankpienga bi moayanga n toatoadi yaa yanga. Lan tie wan da ti joagini oba leni ki yanga yeni. N tie Li Miali Diedo.

⁹ Ban kubi n ñoabonli yeni kuli, ke ban da ti kua*tuonbiadi nni kelima jiema po. Bi yaa joagini laa jiema mo bi baa kpe. N tie Li Miali Diedo Yua n Gagidi ki ŋanbidi ba.

¹⁰ Yua n ki tie Alono buolu yua kuli kan je yaa padijiema n gagidi yeni. Yaa nilo n cani o kopadiciamo deni leni o tuonsoanlo kan je yaa padijiema n gagidi ki ŋani.

¹¹ Ama o kopadiciamo yaa pia o yonbo, ki da o leni o ligi, o yonbo yeni baa fidi ki je ma. Ban mali yua o kopadiciamo diegu nni moko baa fidi ki je o kopadiciamo jiema.

¹² O kopadiciamo yaa pia o bisalo ke o kuni yua n ki tie Alono buolu yua, o kan je ban gagidi yaa padijiema Li Miali Diedo po yeni.

¹³ Ama o kopadiciamo bisalo yeni calo yaa kpe, bi ke o ñani o ki naa pia bila, ke o go kpeni o baa deni nani wan den ñani o maama yeni, o baa fidi ki je o baa jiema. Ama yua n ki tie Alono buolu kuli kan je ma.

¹⁴ O nilo yaa dini yaa padijiema n gagidi ki naa faami, o baa goa ki teni o kopadiciamo mi jiema yeni yaa dunga, ki go maani mi dunga yeni po bonla muu kuli siiga bonyenla.

¹⁵ Bi kopadicianba n da joagini Isalele yaaba n cua ki teni yaa jegagidikaama Li Miali Diedo po yeni.

¹⁶ Bi yaa dini ma ke laa bi pundi ban je ma, bi baa tuni Isalele yaaba yaa tagili n pundi ban mia sugili. N tie Li Miali Diedo Yua n Gagidi ki ŋanbidi ma.»

Yaa balimaama n ye ti padiyandi gandima po

¹⁷ Li Miali Diedo den maadi leni Musa ki yedi:

¹⁸ «Yedi Alono leni o bijaba kuli mine: Yaa nilo n tie Isalele buolu yua, yaaka yaa caano n kaa yi siiga yaa bua ki cua ki padi li padijuukaali Li Miali Diedo po, o baa cuani yaa yanga n tie bontonga ki naa pia poadi, lan tie nianli padijuukaali, bi lan tie yanbuama paabu kuli.

¹⁹ Lanwani ke min fidi ki ga o paabu, o baa taa ne bi pe bi i ŋuabi yaa siiga yaa bontonga n ki pia poadi ki cuani.

²⁰ Yin da cua ki padi yaa yanga n pia poadi kelima Li Miali Diedo kan ga yipo.

²¹ Li go baa tie yeni o nilo yaa cua ki padi Li Miali Diedo po taanyenma padili, li yaa tie yaa yanga n ñani ti yanciandi nni bi ti yanbidi nni. Baa o yaa cuani kelima li nianli po, bi kelima yanbuama yaa po, o padiyanga yeni baa tie yaaga n ki pia poadoba kuli. Li Miali Diedo n fidi ki ga yi paabu se kan da pia poadi kuli.

²² Yi kan cua ki pa yanjuanga yaaka yaaga yaa taali n kua, yaaka moayandi n toatoadi yaa yanga. Yin da cuani yaa yanga n pia kpagili, bi mu calimu bi li sinali. Yin da cuani laa yanbuolu ki padi li *padibinbinli po ki sia Li Miali Diedo po.

²³ A baa fidi ki cuani nua bi pia ke o taayenli foagi bi ke li koabi, li yaa tie yanbuama bi tuondi paabu po. Ama li kan tuo ŋan cuani laa yanga buolu li nianli po.

²⁴ Yin da cua ki padi Li Miali Diedo po yaa yanga yaa koncanbila n fadi, bi ban ja yaaga, yin da padi laa padili buolu yi diema nni.

²⁵ Yi kan ga laa yandi buolu bi canba kani ki cua ki padi yaa pada n tie yi Tienu yaa jiema yeni. Li tie yaa yandi n biidi ki pia poadi, Li Miali Diedo kan ga yipo.»

²⁶ Li Miali Diedo go den maadi leni Musa ki yedi:

²⁷ «Nua bi pia bi ŋuabo yaa mali o biga, ki biga yeni baa ye leni o naa dana lele. Li yaa pundi dana nii ki yaa di caa, li baa tuo ban taa ki cuani ga ki padi Li Miali Diedo po li padijuukaali.

²⁸ Lan tie nua bi pia, yin da kodi wani leni o biga kuli dayenli.

²⁹ Yi yaa cua ki puni Li Miali Diedo i tuondi paabu, yi baa tieni nani lan pundi maama ke Li Miali Diedo n ga yipo.

³⁰ Yi baa ŋmani ki padiyanga yin padi ga yaa daali yeni. Yin da teni liba n sieni hali ku tiŋaagu. N tie Li Miali Diedo.

³¹ Yi baa kubi n bali maama kuli, ki go yaa tiendi likuli. N tie Li Miali Diedo.

³² Yin da fali ki joagini n yeli yaali n gagidi. Li pundi ke Isalele yaaba kuli n faami ki fangi n gagidiŋanma. N tie Li Miali Diedo Yua n Gagidi ki ŋanbidi yi.

³³ N den teni ke yi ñani Ejipiti diema nni, ki baa tua yipo yi Tienu. N tie Li Miali Diedo.»