Levi 21 - Gourmanchéma Bible

¹ Li Miali Diedo den yedi Musa: «Waani bi kopadicianba, Alono bijaba yaa maama n tie na: kopadiciamoba kan *joagini oba kelima o buolu tinkpilo po,

² li yaa tie yaaba n ku leni o ki cie yaaka nani o naa, o baa, bi o bijua bi o bisalo,

³ yaaka o naataanpuoga yua n tie *powandiali. O ku leni o kelima o daa kuni ja. O baa fidi ki joagini oba kelima o yaa po.

⁴ O tie o niba yudanba siiga yua, lani yaa po o kan joagini oba, kelima o baa jigidi o yuli.

⁵ Bi kopadicianba mo kan kuo bi yudi, bi kan koagidi ki dagini bi langbiadi mo bi kan badi bi gbanu po be.

⁶ Bi baa kubi bi yula ki gagidi ki yaa ŋani bi Tienu po. Bi kan fali bi Tienu yeli, kelima bi padi Li Miali Diedo po a padijuukaana, yaala n tie bi Tienu yaa jiema yeni. Bi baa yaa gagidi ki ŋanbidi bi yula.

⁷ Bi kan taa yaa pua n tie poconconli, bi yaa pua n joagini kuli. Bi kan taa poñaka, kelima o kopadiciamo baa yaa gagidi ki ŋanbidi oba o Tienu po.

⁸ A baa nua o kopadiciamo ke o tie nigagidiŋamo kelima o padi yaa pada n tie a Tienu yaa jiema. O baa tie apo o*nigagidiŋamo kelima n gagidi ki ŋani, mini Li Miali Diedo Yua n Gagidi ki ŋanbidi yi yeni.

⁹ O kopadiciamo bisalo yaa cagini ki tiendi mi*conconma, o fiagi o baa yo. Bi baa sia o leni mi fantama wan kpe.

¹⁰ Yaa kopadiciamo n tie o lieba po bi kopadicianba bado, ban den wuli mi sogima kpama yua yaa yuli po yeni, ki go lani yua yaa tiadi n gagidi ki gagidi o yeni, kan ŋa o yudi tin yaa coa. O kan padi o tiadi mo.

¹¹ O kan nagini tinkpilo kuli. O kan joagini oba baa o baa bi o naa po.

¹² O kan ña u *kaangagidiŋamu kani ki joagini o Tienu yaa kaangagidiŋamu. Kelima o den baa o Tienu gagidima yaa kpama sogima. N tie Li Miali Diedo.

¹³ O kopadiciamo baa taa li powandiali wan tua o pua.

¹⁴ O kan taa kpepuoli bi poñaka, bi yaa pua n cagini bi li poconconli. O baa taa yaa powandiali n ñani o yaa buolu nni wan tua o pua.

¹⁵ O kan jigidi o puoliŋuani, o buolu siiga yaaba, kelima n tie Li Miali Diedo Yua n Gagidi ki ŋanbi o.»

b) Yaa nilo n kan kua li kopadician-tuonli nni

¹⁶ Li Miali Diedo den maadi leni Musa ki yedi:

¹⁷ «Maadi leni Alono ki yedi o: A puoliŋuani kuli siiga yaa ja n pia poadi o gbanandi nni kuli, o kan nagini ki padi yaa pada n tie o Tienu jiema yeni, baa yaa yogu n tuu yaa yogu.

¹⁸ Yaa ja n pia poadoba kuli kan nagini, lan tie juamo, diamo, miafadimi daano, bi yua yaa buadi bi o taana siiga bonyenla fuagi ki cie li yali,

¹⁹ bi yua yaa buagu bi o taali n yaa kua ki gbini,

²⁰ bi yaa ja n pia ki goliga, bi ki wodinga, bi yua yaa nunbu n biidi, bi li ŋmaali n cuo yua, bi mu calimu n cuo yua, bi yua yaa koncanbila n fadi, laa jabuoli kuli kan tua kopadiciamo.

²¹ O kopadiciamo Alono puoliŋuani kuli yaa siiga, yua n pia poadi o gbanandi nni, kan fidi ki padi yaa pada n buoni mi fantama nni Li Miali Diedo po. O pia poadi o gbanandi nni, lani yaa po o kan nagini ki teni o Tienu o jiema.

²² Laa nibuolu fidi ki taani ki je o Tienu jiema, yaala n gagidi ki ŋani cain leni yaala n gagidi ki ŋani.

²³ Ama o kan nagini bu *kpalidoaginkaabu, o kan nagini li *padibinbinli kelima o pia poadi o gbanandi nni. O kan nagini ki joagini n kaangagidiŋamu. N tie Li Miali Diedo Yua n Gagidi ki ŋanbidi yi.»

²⁴ Musa den maadi ki waani Alono leni o bijaba leni Isalele yaaba kuli laa maama.