Levi 20 - Gourmanchéma Bible

¹ Li Miali Diedo den maadi leni Musa ki yedi:

² «Ŋan waani Isalele yaaba yaa maama n tie na: Isalele buolu siiga yua, bi caano yua n kaa yi siiga yaa padi o biga*Moloko po, bi baa kpa li daano. Mi diema niba kuli baa taani ki lugidi o a tana ki kpa o.

³ Mini mo baa *buli n nunga laa nilo po ki paadi ki ñani o o buolu nni kelima o den padi o biga Moloko po. O*joagini n *kaangagidiŋamu ki biidi n yeli yaali n gagidi.

⁴ Li yaa tie ke mi diema niba cedi yaa nilo n padi o bila Moloko po yeni ki naa kpa o,

⁵ mini nba n baa buli n nunga laa nilo leni o niba kuli po ki paadi ki ñani o o buolu nni wani leni yaaba n ŋoadi o ki cagini bi yula ki ŋoadi Moloko yeni.

⁶ O nilo yaa gedi yaa niba n maadi leni bi tinkpiba kani, bi a baayuadiida kani ki cagini o yuli leni ba, n baa buli n nunga laa nilo po ki paadi ki ñani o o buolu nni.

⁷ Yin gagidi ki yaa ŋani npo, kelima n tie Li Miali Diedo yi Tienu.

⁸ Yin yaa kubi mani n *balimaama ki yaa tiendi mikuli bonŋanla. N tie Li Miali Diedo Yua n Gagidi ki ŋanbidi yi.

⁹ Yaa nilo n soli o baa bi o naa kuli, bi baa kpa li daano. O soama n goa jagini o yaa yuli po kelima o den soli o baa bi o naa.

¹⁰ Ja yaa conbi leni o nisaalilielo pua, o ja yua n conbi yeni leni o pua yua n conbi yeni kuli baa kpe.

¹¹ Ja yaa duani leni o baa pua, o laa o baa yaa mubili. Laa ja leni laa pua kuli baa kpe, bi soama mo n goa ki jagini bi yula po.

¹² Ja yaa duani leni o biyuaga, bi baa kpa bani bonba lie yeni kuli kelima bi tieni cagindi. Bi soama mo baa goa ki jagini bi yula po.

¹³ Ja yaa duani leni jatoa nani o ja n baa dua leni o pua maama, bani bonba lie yeni kuli tieni cagindi bonla. Bi baa kpa ba, bi soama mo n goa ki jagini bi yula po.

¹⁴ Ja yaa taa pua leni o bisalo ke bi tua o puoba, li tie cagindi. Bi baa sia ba mi fantama nni ban kpe. Wani leni bi puoba yeni kuli, ke laa cagindi n da ye yi siiga.

¹⁵ Ja yaa taani leni ki yanga, bi baa kpa li daano. Bi go baa kpa ki yanga mo.

¹⁶ Pua mo yaa nagini yanga ki taani leni ga, bi baa kpa o pua leni ki yanga yeni kuli. Bi baa kpa ba ke bi soama n goa ki jagini bi yula po.

¹⁷ Ja yaa taa o naataanpuoga o baa bisalo, yaaka o naa bisalo ki laa o mubili ke o mo laa o yaa mubili, li tie yaa bonla n gundi. Bi baa paadi ki ñani ba bi buolu nni kelima o ja yeni dua leni o naataanpuoga. Bi baa tugi bi*tuonbiadi panpaani.

¹⁸ Ja yaa duani leni pua o ŋmaalo nni, bi baa paadi ki ñani bani bonba lie yeni kuli bi buolu nni, kelima bi taani ki juogi ki laa o soama n ña naani.

¹⁹ A kan le a naa naataanpuoga mubili bi a baa naataanpuoga mubili kelima a yiedi ki sieni fini leni yua n kpi bonŋanla mubili. Yaaba n tieni laa bonla kuli baa ga bi tuonbiadi panpaani.

²⁰ Ja yaa duani leni o baa kpelo bi o waalo, o laa o puoli mubili. Bi baa tugi bi tuonbiadi panpaani. Bi baa kpe ki naa mali bila.

²¹ Ja yaa taa o kpelo bi o waalo pua, li tie yaala n gundi. O laa o kpelo bi o waalo mubili, bi baa kpe ki naa mali bila.

²² Yin yaa kubi mani n bali maama kuli leni n ñoabonbilikaana kuli. Yin yaa tiendi likuli ke min caani yi yaa diema nni, yin baa n yaa ye yaama yaa niinni yeni, n da yie yi.

²³ Yin da togidi min baa deli yaa nibuoli yi kani yeni tuada kelima bi den tiendi laa bonbuoli kuli. N yama ñani bi niinni.

²⁴ N den yedi yinba: ‹Yinba n baa diedi bi diema, N puni yi yin yaa die ma. Mi tie mi naaŋanma leni ti siadi n dua yaa diema nni.› N tie Li Miali Diedo yi Tienu yua n den gagidi ki ñani yi i nibuoli siiga.

²⁵ Lani yaa po yin gagidi ki paadi yaa yandi n ŋani leni yaa yandi n joagini yaa siiga, leni yaa nuani n ŋani leni yii n ki ŋani kuli yaa siiga. Yin da joagini yiba leni ti yandi leni i nuani leni yaala n balini tiipo kuli yaa po, min den tuodi ki bili ki waani ke yaaba n joagini yeni.

²⁶ Yi baa yaa tie npo bi nigagidiŋanba, kelima mini Li Miali Diedo gagidi ki ŋani. N den gagidi ki ñani yi i nibuoli nni ke yin yaa tie n yaa yaaba.

²⁷ Ja yaaka pua yua n baa fidi ki maadi leni bi tinkpiba, bi ki bu ku baagu, bi baa kpa ba. Bi baa lugidi ba a tana ki kpa ba. Laa niba yaa soama baa goa ki jagini bi yula po.»