Levi 2 - Gourmanchéma Bible

¹ O nilo yaa baa padi yaa padili n tie jiema Li Miali Diedo po, o paabu n yaa tie yonŋanma. Wan kuodi mi niinni mi kpama ki taa a *dugibila ki pugini.

² O baa taa ki gedini Alono bijaba, bi kopadicianba kani. O kopadiciamo baa yidi mi yonŋanma yeni nukuli ke mi kpama leni a dugibila kuli ye lienni. O baa sia likuli li *padibinbinli po ki doagidi ke li padili yeni kuli tie Li Miali Diedo po. Li tie yaa padili yaa nuulu n mani Li Miali Diedo po.

³ Yaala n baa sieni li padili yeni niinni baa yaa tie Alono leni o bila po. Mi fantama n buoni yaa pada Li Miali Diedo nintuali kuli siiga, li tie yaa padili n gagidi cain.

⁴ A yaa baa cuani yaa padili n tie jiema, ban ŋanbi yaama u fanu nni nani dupen yeni, ŋan ŋanbi ma leni mi yonŋanma leni mi kpama, bi ŋan tieni yencangili, ki wuli lipo mi kpama. Ama lani bonla lie yeni kuli nni ŋan da tieni *dabinli.

⁵ A padili yaa tie yaa jiema n luoni ki sanga nni, mi baa yaa tie yonŋanma ke mi kali leni mi kpama, ki da pia dabinli.

⁶ A baa cabidicabidi boncaba ki wuli lipo mi kpama. Li tie yaa padili n tie jiema.

⁷ A padili yaa tie yaa jiema n sagi, mi baa yaa tie yonŋanma, ki kali leni mi kpama.

⁸ Yaa padili n tie laa jebuolu kuli, ŋan taa li ki gedi ki teni o kopadiciamo, wan maani li li padibinbinli po.

⁹ Wani o kopadiciamo baa ñani lienni yaala n baa yaa tie mi tiadima po ki sia la li padibinbinli po. Li tie mi fantama n buoni yaa padili, yaali yaa nuulu n mani Li Miali Diedo po.

¹⁰ Yaala n baa sieni laa padili nni baa yaa tie Alono leni o bijaba yaa po. U Tienu padijuukaana kuli siiga, laa padili tie yaa bonla n gagidi ki ŋani cain Li Miali Diedo nintuali.

¹¹ Yin baa padi Li Miali Diedo po yaa padili kuli, yin da tieni dabinli kelima mi fantama n baa buoni yaa pada Li Miali Diedo po kuli siiga, padiliba kan yaa pia dabinli bi siadi.

¹² Yi baa fidi ki tieni li dabinli li bonluonka-kpiala yaa padili nni, ama li padibinbinli yaa padijuukaana yaa nuulimanu po wani, li kan tuo.

¹³ Ŋan tieni mi yaama a pada nni kuli. Ŋan da cedi a padili n luo yaama. Li tie a Tienu n pia yaa *ŋantaado leni a yaa maalima, ŋan tieni a pada kuli mi yaama.

¹⁴ A yaa cuani ki padi Li Miali Diedo po li bonluonka-kpiala padili, ŋan taa ti sianpandi ki sagi ki gali mi bima.

¹⁵ A baa wuli mi kpama lipo, ki taa a dugibila ki pugini. Li tie yaa padili n tie jiema.

¹⁶ O kopadiciamo baa taa i yencaginsagidi yeni leni mi kpama ki taani leni a dugibila yeni ki sia li padibinbinli po, lan tua bontiadikaala. Li tie mi fantama n buoni yaa padijiema Li Miali Diedo po.