Levi 19 - Gourmanchéma Bible

¹ Li Miali Diedo den maadi leni Musa ki yedi:

² «Maadi leni Isalele yaaba nitaanli kuli ki yedi ba: Yi baa gagidi ki yaa ŋani kelima n gagidi ki ŋani, mini Li Miali Diedo yi Tienu.

³ Yua kuli n fangi o naa leni o baa, ki kubi n fuodima dana ki gagidi ŋa. N tie Li Miali Diedo yi Tienu.

⁴ Yin da lebidi ki ŋoadi i *buli. Yin da duadi buliba leni ti kudi. N tie Li Miali Diedo yi Tienu.

⁵ Yi yaa baa cua ki padi Li Miali Diedo po, mi taanyenma padili, tieni mani maama ke o baa fidi ki ga yipo.

⁶ Yi baa ŋmani ki padiyanga yeni yin cua ki padi ga yaa daali bi li yaa fii ki faa. Yaala n sieni hali li dataali daali, yi baa juu la mi fantama nni.

⁷ Yi yaa ŋmani la li dataali daali, li tie yaa bonla n ki dagidi. Li Miali Diedo kan ga yi paabu.

⁸ Yua n ŋmani yeni, o baa ga o tudima panpaani, kelima o fali ki *joagini yaa bonla n gagidi Li Miali Diedo po. Bi baa paadi ki ñani laa nilo o buolu nni.

⁹ Yi yaa ye yi diema nni u jetaagu yogunu, yi baa ŋa poyendu yi kuanu nni ki naa yendi lipo. Yin da yendi yaala n sieni mi liegima po.

¹⁰ Ŋan da goa ki cie yaala n sieni a duven tiidi bonluonkaala, ki da goa ki wodi yaala n suodi ki baa. A baa ŋa lani o luodo leni o caano po. N tie Li Miali Diedo yi Tienu.

¹¹ Yin da su. Yin da pua yi lieba po mi faama, ki da boandi yi yaba mo.

¹² Yin da pua faama ki poli n yeli nni. Kelima yi baa biidi yi Tienu yeli. N tie Li Miali Diedo.

¹³ Ŋan da mabini a yieninlielo. Ŋan da su, ŋan da kubi a tuonsoanlo panpaani a kani ke li yaa faa yo ŋan pa o.

¹⁴ Ŋan da soli womo, ŋan da bili li bontuudikaala o juamo nintuali, ke wan tuudi ki baa. Ama a baa yaa fangi a Tienu. N tie Li Miali Diedo.

¹⁵ Ŋan da jia yaa buudi n ki tiegi, ŋan da fali nilo, ŋan da jagi ke a baa todi o luodo, bi ŋan go da jagi ke a baa todi o piado mo li bujiali nni. Ama a baa jia a yieninlielo buudi nani lan tiegi maama.

¹⁶ Ŋan da tieni bu tingbangbaabu a buolu yua po. Ŋan da kuli a nisaalilielo ban kpa o fanma fanma. N tie Li Miali Diedo.

¹⁷ Ŋan da nani a kpiilo a pali nni. Li pundi ŋan tundi a lielo o tudima po. Lani n tie ŋan da ti tugi *tuonbiadi kelima o yaa po.

¹⁸ Ŋan da tu li panli. Ŋan da pia li koanfaali a buolu nilo po. Ama ŋan bua a nisaalilielo nani ŋan bua a yuli maama yeni. N tie Li Miali Diedo.

¹⁹ Yin yaa kubi mani n ñoabonbilikaana. Ŋan da teni yanbuoli lie yii n ki taa n do biyaba. Ŋan da coagi bonbuoli lie a kuanu nni. Ŋan da yie gaali buoli lie tiayiekaagu.

²⁰ Ja yaa conbi leni potuado ke o bi pia togibaa, ama ke bi daa bi da ki faabi o, bi baa faligi ba, ama bi kan kpa ba, kelima o pua daa den faabi.

²¹ Ama o ja yeni baa taa petonli o tudima po ki cuani li u *Kadikaanu gbandieli buliñoabu kani o tudima yaa po.

²² O kopadiciamo baa mia opo sugili Li Mali Diedo nintuali. O baa padi opo li petonli, lin tua mi tudima padili kelima o ja yeni n tieni yaa tuonbiadi yaa po. O ja yeni baa baa o tuonbiadi sugili.

²³ Yi yaa kua mi diema nni yaa yogunu ki ŋu lienni yaa tiidi n luoni kuli, yi baa nua yi bonluonkaala ke li naani leni yaa nilo n naa kua ku koanciagu, yeni hali bina taa. Yi kan ŋmani la.

²⁴ Li binnaali wani, i tiidi yeni kuli yaa bonluonkaala baa gagidi Li Miali Diedo yaa pagidi po.

²⁵ Lanwani li binmuuli yi baa ŋmani i tiidi yeni bonluonkaala, ki yaa cenli yi yi yula po. N tie Li Miali Diedo yi Tienu.

²⁶ Yin da ŋmani liba kuli leni mi soama. Yin da lingi lingima, ki da bu ku baagu mo.

²⁷ Yin da koagidi yunianu, ki da koagidi ki dagini yi langbiadi mo.

²⁸ Yin da badi yiba be tinkpilo po. Yin da tutu yi gbanu po mo. N tie Li Miali Diedo.

²⁹ Ŋan da cagini a bisalo ki teni wan tua poconconli ki joagini o, ke mi diema n da ti joagini mi yuli ki gbie leni ti cagindi.

³⁰ Yin yaa kubi mani n fuodima dana, ki yaa fangi n *kaangagidiŋamu. N tie Li Miali Diedo.

³¹ Yin da lingi mi lingima, yin da ŋoadi ma mani kelima laa bonla baa joagini yi. N tie Li Miali Diedo yi Tienu.

³² Nikpeyukobipiendi yaa cua, ŋan fii ki sedi ki fangi o. Ŋan jigini o jakpelo. A baa fangi a Tienu. N tie Li Miali Diedo.

³³ Caano yaa cua ki kali yi diema nni, yin da janbidi o.

³⁴ Yin yaa nua yaa caano n kaa yi siiga nani u dogu maabiga yua n ye yi siiga yeni. Yin bua o nani yin bua yi yula maama kelima yi moko den tie canbe Ejipiti diema nni. N tie Li Miali Diedo yi Tienu.

³⁵ Yin da tieni janbi li bujiali nni, bi u foagimu yaa *bonbiigikaala nni, bi u kpiagu yaa bonbiigikaala nni, bi u yabinu yaa bonbiigikaala nni.

³⁶ Yin yaa kubi mani u kpiagu bonbiigikaala yaala n tiegi, *efa yua n tiegi, hini yua n tiegi. N tie Li Miali Diedo yi Tienu yua n den ñani yi Ejipiti diema nni.

³⁷ Yin yaa kubi mani n balimaama kuli leni n ñoabonbilikaana kuli, ki go tieni likuli bonŋanla. N tie Li Miali Diedo.»