Levi 17 - Gourmanchéma Bible

¹ Li Miali Diedo den maadi leni Musa ki yedi:

² «Waani Alono leni o bijaba leni Isalele yaaba kuli yaa maama n tie na: Diidi Li Miali Diedo n bili yaala:

³ Yaa nilo n tie Isalele buolu yua yaa kodi nua yaaka pebiga bi ŋuabo li nagili nni, bi niinpo,

⁴ ki naa cuani o u *Kadikaanu gbandieli buliñoabu kani, lan tua paabu Li Miali Diedo po o gbandieli buliñoatuogili kani, laa nilo baa pia mi soama wulima tagili. O wuli mi soama. Bi baa paadi ki ñani o o niba siiga.

⁵ Li tie kelima baa bua Isalele yaaba n yaa padi bi pada bi kuani nni, ama ban cuani bi padiyandi ki teni o kopadiciamo u Kadikaanu gbandieli buliñoabu kani Li Miali Diedo nintuali.

⁶ O kopadiciamo yeni baa wuli mi soama Li Miali Diedo*padibinbinli po u Kadikaanu gbandieli buliñoabu kani. O go baa sia mi kpama man tua yaa nuulu n mani Li Miali Diedo po.

⁷ Ban go da padi a pada i *buli po ban den cagini bi yula ki ŋoadi yaa buli yeni. Li baa yaa tie yaa *balimaama n kan pendi hali abada, bani leni bi puoliŋuani kuli po.

⁸ Lanwani ŋan yedi ba: Yaa nilo n tie Isalele buolu yua, yaaka yaa caano n kaa bi siiga, yaa padi li padili bi li padijuukaali,

⁹ ki naa cuani u Kadikaanu gbandieli buliñoabu kani ki padi li padili Li Miali Diedo po, bi baa paadi ki ñani laa nilo o buolu nni.

¹⁰ Li yaa tie ke Isalele buolu yua yaaka yaa caano n kaa bi siiga yaa ŋmani mi soama, baa lan tie yaa soabuolu kuli, n baa buli n nunga yaa nilo n ŋmani mi soama yeni po, ki paadi ki ñani o o buolu nni.

¹¹ Kelima gbanandi kuli yaa miali ye mi soama nne. N puni yi ma ke man yaa ye li padibinbinli po, ke man pa yi sugili ki faabi yi miana. Kelima li tie li miali po yo ke mi soama puni ti *tuonbiadi sugili.

¹² Li tie lani yaa po ke n yedi Isalele yaaba: Yi siiga niloba kuli n da ŋmani soama. Yaa caano n kaa yi siiga n da ŋmani soama.

¹³ Li yaa tie Isalele buolu siiga yua, yaaka yaa caano n ka bi siiga yaa gedi fuagoadu ki cuo yanga, bi ban ŋmani yaa nuanga, o baa wuli ki soama tiipo ki tigi ki piini ma leni mi tama.

¹⁴ Kelima gbanandi kuli yaa miali n tie ti soama yaama n ye ti niinni. Li tie lani yaa po ke n yedi yinba Isalele yaaba yin da ŋmani gbananbuoluba kuli yaa soama, kelima gbanandi kuli yaa miali n tie ti soama. Yua n ŋmani ma kuli, bi baa paadi ki ñani o o buolu nni.

¹⁵ Lan tie yaa nilo kuli, u dogu maabila bi, bi canba siiga, yua n ŋmani yankpienga bi moayanga n toatoadi yaa yanga baa ŋuudi o tiadi ki wali ki yaa ye leni o joagindi hali ku yenjuogu. Lanwani o baa ŋanbi.

¹⁶ O yaa ŋuudi o tiadi ki go wali, o baa tugi o tagili tugili.»