Levi 16 - Gourmanchéma Bible

¹ Li Miali Diedo den maadi leni Musa Alono bijaliediba kuuma puoli po, ban den cua Li Miali Diedo nintuali ki kpe kelima li yaa po.

² Li Miali Diedo den yedi Musa: «Maadi leni a kpelo Alono ki waani o, ke wan da kua u *kaangagidiŋanmoanu nni yaa yogunu kuli. Wan da kandi bu *kpalidoaginkaabu ki pundi ku *ŋantaadikpaku leni ku biili yaali n gagidi yeni kani, ke wan da ti kpe, kelima n baa doagidi lankani li biili yeni po ku tawaligu nni.

³ Diidi Alono n baa fidi ki kua u *kaangagidiŋamu nni maama nne: O baa baa li naatonli ti *tuonbiadi sugili miabu padili po, leni li petonli li padijuukaali po.

⁴ O baa laa li kopadicianbadi-liadili yaali n tie*len, ki yaa soali yaa kpataali n tie len, ki go ñagini yaa cabiñaginkaali n tie len, ki go yili yaa yufinfingu mo n tie len. O baa laa o kopadiciamo yaa tiayiegadikaadi kuli, ama se wan kpa wali hali bonŋanla.

⁵ Lanwani Isalele nitaanli yaaba kuli baa teni o ŋuabuana lie, ti candandi padili po leni petonyenli li padijuukaali po.

⁶ Alono baa kpa padi li naatonli ti tuonbiadi sugili miabu padili po, ki mia sugili o yuli po leni o diegu yaaba kuli po.

⁷ Lanwani Alono baa taa a ŋuabualieda yeni ki sieni a li Miali Diedo nintuali u *Kadikaanu gbandieli buliñoabu kani.

⁸ O baa toa tiatia a ŋuabualieda yeni po, ki bandi wan baa taa yua Li Miali Diedo po leni wan baa taa yua*Asaseli po.

⁹ Alono baa taa ki cuani tiatia n toani ki cuo yaa ŋuabuali Li Miali Diedo po yeni ki padi li ti candandi po.

¹⁰ Ban toani tiatia ki baa yaa ŋuabuali ke li tie Asaseli po yeni, bi baa taa li ke li fo ki sieni li Li Miali Diedo nintuali ti tuonbiadi sugili miabu po, ke bi baa yuandi ki gedini li mi fanpienma po, ki deli yaani li, lin bodi cain.

¹¹ Alono baa padi o naatonli ti tuonbiadi sugili po, leni o diegu nni yaaba kuli po. O baa kodi o naatonli ti tuonbiadi sugili po.

¹² Lani o baa taa ku fantanpientiagu ke ku gbie leni yaa mukuana n ñani yaa *padibinbinli n se Li Miali Diedo nintuali yeni yuli po leni a *dugibila yaa yoma nukula lie. O baa taa lankuli ki kua u Kadikaanu gbandieli nni ki kandi bu kpalidoaginkaabu,

¹³ ki tieni a dugibila a mukuanmoana po, Li Miali Diedo nintuali ke yaa muñii n pia u nuuli manu yeni n pini ku ŋantaadikpaku biili yeni yuli, lani n tie wan da kpe.

¹⁴ Lanwani o go baa tu li naatonli soama leni o nubili ki miimii ma ku kpaku biili nintuali, naankani n tiegi puoli po yeni. O baa tu mi soama leni o nubili ki miimii ma taalima lele ku kpaku biili nintuali.

¹⁵ O go baa kodi ti tuonbiadi sugili miabu ŋuabuali bi niba po. O go baa taa li yaa soama ki kandi bu kpalidoaginkaabu ki kua. O baa tieni laa soama mo nani wan bi tieni maama leni li naatonli yaa soama yeni. O baa miimii mi soama ku kpaku biili po leni li nintuali.

¹⁶ O baa tieni ki mia sugili u kaangagidiŋamu po kelima Isalele yaaba joagindi, bi biadima leni bi tuonbiadi kuli yaa po. O baa tieni yeni leni u Kadikaanu gbandieli, yaali n ye leni ba, bi joagindi yaa siiga.

¹⁷ Alono yaa kua u kaangagidiŋamu nni ki baa mia sugili yaa yogunu, oba kuli kan yaa ye u Kadikaanu gbandieli nni, hali wan baa ña. O baa padi ki mia sugili wani oba leni o diegu yaaba kuli po leni Isalele yaa nitaanli kuli po.

¹⁸ O baa ña yaa padibinbinli n se Li Miali Diedo nintuali yeni kani, ki mia sugili li padibinbinli po. O go baa taa li naatonli yeni soama leni li ŋuabuali yeni yaa soama ki tieni ma li padibinbinli yina po leni li lindima kuli.

¹⁹ O baa miimii leni o nubili ti tuonbiadi sugili miabu soama li padibinbinli po taalima lele. O baa gagidi ki ŋanbi li kelima Isalele yaaba yeni yaa joagindi po.

²⁰ Lanwani Alono yaa tieni ti tuonbiadi sugili miabu padili u kaangagidiŋanmoanu po, leni u Kadikaanu gbandieli po leni li padibinbinli po kuli ki gbeni, o baa teni ban cuani yaa ŋuabuali n fo yeni.

²¹ Alono baa maani o niliedi li ŋuabuafuodili yeni yuli po, ki coadi ki togidi lipo Isalele yaaba tagili, bi biadima leni bi tuonbiadi kuli. O baa maani likuli li ŋuabuali yeni yaa yuli po. Lani o baa deli ki yaani li mi fanpienma nni. Lani o baa teni li yaa nilo n baa deli ki yaani li mi fanpienma nni.

²² Li ŋuabuali baa tugi laa tagili kuli ki gedi ki tinkuonga nni. Bi baa deli ki gedini li mi fanpienma nni.

²³ Lanwani Alono baa kua u Kadikaanu gbandieli nni, ki landi wan bi laa len tiadi yaadi yeni kuli ki kua u kaangagidiŋamu nni ki bili tikuli lankani.

²⁴ O baa wali yaa kaanu n gagidi nni, ki go laa o tiafandi. Lani o baa ña ki padi wani oba yaa padijuukaali leni o niba yaa padijuukaali. O go baa mia sugili wani oba leni o niba kuli yaa po.

²⁵ O go baa sia ti tuonbiadi yaa padiyanga yeni kpama li padibinbinli po.

²⁶ Yaa nilo n deli ki yaani Asaseli po yaa ŋuabuali yeni, baa ŋuudi o tiadi ki go wali, lani o baa fidi ki kua li nagili nni.

²⁷ Lani bi baa taa ti tuonbiadi padili naatonli leni li ŋuabuali yeni yaa nandi ki ñani li nagili niinpo. Li tie ban den gedini yaa yandi yaa soama u kaangagidiŋamu nni ki baa sugili. Bi baa sia ki buoni ti nandi, ti gbandi leni ti nuadi kuli.

²⁸ Yua n sia ki buoni ti padiyandi yeni baa ŋuudi o tiadi ki go wali. Lani o baa fidi ki goa ki kua li nagili nni.

²⁹ Line n tie yaa *bali maama n kan pendi hali abada. Cilele yaa danpiiga daali, yi baa loli yi ñoana ki waani yi yula fala. Yi kan soani tuonliba kuli, baa u dogu maabiga, baa yaa caano n kaa yi siiga kan soani tuonliba kuli.

³⁰ Kelima li tie laa daali ke bi baa mia yipo sugili ki ŋanbi yi. Yi baa baa mi ŋuudima yi tuonbiadi kuli po, ki yaa ŋani Li Miali Diedo nintuali.

³¹ Laa daali baa tie yipo *fuodima daali. Yi baa loli yi ñoana ki waani yi yula fala. Li tie yaa bali maama n kan pendi hali abada.

³² Yaa kopadiciamo n baa baa mi gagidima yaa sogima, ban baa gagidi yua wan lebidi o baa li kopadician-tuonli nni yeni, wani n baa mia yipo sugili laa daali. O baa laa yaa tiayiekaadi n tie len, ti tiayiegagidikaadi yeni.

³³ O baa mia sugili u kaangagidiŋamu po, u Kadikaanu gbandieli po, leni li padibinbinli po. O baa miadi sugili bi kopadicianba kuli po leni li nitaanli kuli po.

³⁴ Li baa tie yipo yaa bali maama n kan pendi hali abada. O baa padi ti tuonbiadi sugili miabu padili binli kuli yenma, kelima Isalele yaaba yaa tuonbiadi po.» Bi den tieni Li Miali Diedo n den waani Musa yaala kuli.