Levi 15 - Gourmanchéma Bible

¹ Li Miali Diedo den maadi Musa leni Alono ki yedi:

² «Maadi mani leni Isalele yaaba ki yedi ba: O *fado n cuo yaa nilo kuli, o *joagini kelima li yaa po.

³ Li tie o fado yeni n joagini o. Laa biidi yaa ña, bi ti yaa ña, o joagini.

⁴ Wan duani yaa duanu po kuli joagini, baa wan kali yaa bonkalikaala po mo joagini.

⁵ Yaa nilo n sii o nilo yeni duanu, baa ŋuudi o tiadi ki go wali ki yaa ye leni o joagindi hali ku yenjuogu.

⁶ Yaa nilo n kali o nilo yeni n bi kali yaa bonkalikaala po kuli mo, baa ŋuudi o tiadi ki wali ki yaa ye leni o joagindi hali ku yenjuogu.

⁷ Yua n sii o nilo yeni yaa gbanu baa ŋuudi o tiadi ki yaa ye leni o joagindi hali ku yenjuogu.

⁸ O nilo yeni yaa sii ke o ñinsandi baa yua n ki joagini po, laa nilo baa ŋuudi o tiadi ki wali ki yaa ye leni o joagini hali ku yenjuogu.

⁹ O nilo yeni yaa jagini yaa gaali kuli po mo baa joagini.

¹⁰ Yua n sii o nilo yeni n kali yaala po baa ye leni o joagindi hali ku yenjuogu. Yua n taa o nilo yeni n kali yaali yaa po baa ŋuudi o tiadi ki go wali ki yaa ye leni o joagindi hali ku yenjuogu.

¹¹ O nilo yeni yaa sii yua kuli leni o nii, ki sua ke o naa bi kpa nidi bonŋanla, wan sii yua yeni baa ŋuudi o tiadi ki wali ki yaa ye leni o joagindi hali ku yenjuogu.

¹² Yaa nilo n pia o fado yeni yaa sii yaa tiagu n tie tandi kuli, se ban mudi gu. Ku tiagu yeni yaa tie daadi tiagu, bi baa ŋuudi gu bonŋanla.

¹³ O nilo yeni yaa paagi o ñanyianma po, ki bua ki ŋanbi oba, o baa bili dana lele o ŋanbima po. O baa wali ki go ŋuudi o tiadi mi ñinpuubikaama nni. Lani o baa ŋanbi.

¹⁴ Li daniili daali o baa taa kpaajefanmu lie bi kpaajenawuundi lie ki gedi ki teni o kopadiciamo u *Kadikaanu gbandieli kani Li Miali Diedo nintuali.

¹⁵ O kopadiciamo baa padi mu, yenga n tua ti *tuonbiadi sugili miabu padili, ki liega mo n tua padijuukaali. Yeni o kopadiciamo baa mia o nilo yeni po sugili o ñanyianma po Li Miali Diedo nintuali.

¹⁶ O ja yaa joagindi o tiadi, o baa wali ki yaa ye leni o joagindi hali ku yenjuogu.

¹⁷ Lan baa yaa tiadi po, bi yaa gbangu po, o baa ŋuudi ti ki yaa ye leni o joagindi hali ku yenjuogu.

¹⁸ O ja yaa dua leni pua, bi kuli baa wali ki yaa ye leni bi joagindi hali ku yenjuogu.

¹⁹ O pua yaa laa o ŋmaalo, o baa yaa ye leni o joagindi hali dana lele. Yua n sii o kuli, baa yaa ye leni o joagindi hali ku yenjuogu.

²⁰ Wan dua yaa duanu o ŋmaalo dana nni yeni leni wan kali yaa bonkalikaala po kuli mo baa yaa joagini.

²¹ Yua n sii u duanu yeni baa ŋuudi o tiadi, ki wali ki yaa ye leni o joangidi hali ku yenjuogu.

²² Yua n sii o pua yeni n kali yaa bonkalikaala po, baa ŋuudi o tiadi ki wali ki yaa ye leni o joagindi hali ku yenjuogu.

²³ Bonliba yaa bili u duanu po, bi wan kali yaali po kuli, yua n sii laa bonla baa yaa ye leni o joagindi hali ku yenjuogu.

²⁴ O ja yaa dua leni pua o ŋmaalo yeni dana siiga, o pua yeni joagindi baa ŋoadi o hali dana lele. Wan baa yaa dua yaa duanu po mo kuli baa yaa joagini.

²⁵ Yaa pua yaa soama n ña dana boncianla ke laa tie o ŋmaalo dana, yaaka o soañakaama yeni yaa pendi o ŋmaalo dana, o baa yaa ye leni o joangidi hali laa dana, lan tie yeni yaa banlu po kuli, nani o ŋmaalo dana po lan den tie maama.

²⁶ Wan dua yaa duanu o soañakaama dana yeni, go baa joagini nani o ŋmaalo dana yaa duanu n joagini maama yeni. Wan kali yaa bonkalikaala po mo baa joagini nani o ŋmaalo dana yaa bonkalikaala n joagini maama yeni.

²⁷ Yua n sii laa bonla kuli baa joagini oba, ki ŋuudi o tiadi ki wali ki yaa ye leni o joagindi hali ku yenjuogu.

²⁸ O pua yeni soañakaama yaa gbeni, o baa coadi dana lele, lani yaa pendi o baa ŋanbi.

²⁹ Li daniili daali o baa taa kpaajefanmu lie bi kpaajenawuundi lie ki cua ki teni o kopadiciamo u Kadikaanu gbandieli buliñoabu kani.

³⁰ O kopadiciamo baa padi yendo ti tuonbiadi sugili miabu padili po, o lielo mo li padijuukaali po. Yeni o kopadiciamo baa mia opo sugili Li Miali Diedo nintuali, kelima yaa soañakaama n den joagini o yeni yaa po.

³¹ Yi baa foagidi Isalele yaaba leni li joagindi ke ban da ti kpe kelima bi joagindi po, li yaa tie ke bi joagini n yekaanu yu n ye bi siiga yeni.»

³² Lani n tie yaa *bali maama n ye o fado n cuo yaaba leni yaa jaba n biidi bi tiadi ki joagini biba po,

³³ leni yaa pua n laa o ŋmaalo leni yaa pua n pia mi soañakaama, leni yaa ja n joagini leni yaa pua n ye o ŋmaalo dana nni po.