Levi 14 - Gourmanchéma Bible

¹ Li Miali Diedo den maadi leni Musa ki yedi:

² «Diidi o gbaado ŋanbima daali yaa *balimaama. Yi baa yini o, wan cua o kopadiciamo kani.

³ O kopadiciamo baa ña li nagili niinpo ki tuogi o ki biigi o.

⁴ O kopadiciamo baa teni ban taa yua n baa ŋanbi yeni po, nuanfuodi lie yi n ŋani cain, sedili tiidi daadi, i gaalimoani leni *isope daadi.

⁵ O kopadiciamo baa waani o wan taa ti tandi tiagu ki tieni mi ñinpuubikaama, ki nan taa nuanyenga ki kodi ga ti tandi tiagu yeni niinni.

⁶ Lani o baa taa yaa nuanga n fo yeni leni i gaalimoani leni sedili daagu, leni isope daagu ki tuuni ban kodi yaa nuanga mi ñinpuubikaama po yaa soama nni.

⁷ O baa miimii mi soama ban baa ŋanbi yua n bi pia mi*gbaadima yeni po hali taalima lele. Lani yaa pendi, o baa doagidi ki waani ke o ŋani. O baa ŋa yaa nuanga n sieni i kuani nni.

⁸ Ban ŋanbi yaa nilo yeni baa ŋuudi o tiadi kuli ki kuo o gbanu po kobidi kuli ki wali. O baa ŋanbi. Lani yaa puoli o baa fidi ki kua li nagili nni. O kan fidi ki kua o gbandieli nni hali dana lele n tuoni.

⁹ Li daleleeli daali, o go baa kuo o yudi leni o langbiadi, o nungbaakobidi leni yaa kobidi n ye gbanu po kuli, o baa ŋuudi ki wali, yeni o baa ŋanbi.

¹⁰ Li daniili daali o baa taa pebila lie ya n naa pia poadi leni yaa pesalo n pundi binyenli kaa pia poadi ki go cuani yaa yoma n kali leni mi kpama, kilo bonba yia leni mi kpama litidi boagidima.

¹¹ Yaa kopadiciamo n baa padi mi ŋanbima padili baa taa yaa nilo n bua ki ŋanbi yeni n cuani yaa bonla kuli, ki cua ki sieni Li Miali Diedo nintuali, u *Kadikaanu gbandieli buliñoabu kani.

¹² O kopadiciamo baa taa pebiyenga ki padi ga mi tudima padili po. O baa taa mi kpama litidi boagidima leni ki pebiga yeni ki tieni yaa bogidili n doagidi ke o teni la Li Miali Diedo.

¹³ O baa kodi ki pebiga yeni ban kodi ti *tuonbiadi pada leni a padijuukaana naankani, yaa kaanu n gagidi yeni. O tieni yeni kelima mi tudima padili leni ti tuonbiadi sugili miabu padili kuli po. Ki padiyanga yeni tie o kopadiciamo yaa biinu yo. Li tie yaa bonla n gagidi ki ŋani hali boncianla.

¹⁴ O kopadiciamo baa taa mi tudima padili yeni yaa soama ki gedi ki tieni ma wan ŋanbi yua yaa jientubifaagu po, ki go tieni ma o jiennubijali po leni o jientajenbijali po.

¹⁵ Lani o kopadiciamo baa ñani mi kpama litidi boagidima yeni niinni ki cabi ma o gannupuogu nni.

¹⁶ O baa tu o jiennubili yaa kpama n ye o nupuogu nni yeni ki miimii taalima lele Li Miali Diedo nintuali.

¹⁷ Lani o kopadiciamo baa ñani yaa kpama n sieni leni o nubili ki tieni wan baa ŋanbi yua yeni yaa jientubifaagu po leni o jiennubijali po leni o jientajenbijali po, wan bi tieni mi tudima padiyanga yaa soama naankani yeni.

¹⁸ Yaa kpama n sieni o kopadiciamo nupuogu nni yeni, o baa tieni wan ŋanbidi yua yeni yaa yuli po. O tieni ki bua ki mia opo sugili o tudima po Li Miali Diedo nintuali.

¹⁹ Lanwani o kopadiciamo baa padi ti tuonbiadi sugili miabu padili ki mia sugili wan ŋanbi yua o joangidi po yeni. Lani yaa pendi o baa kodi li padijuukaali yanga.

²⁰ O kopadiciamo baa padi li padijuukaali ki go padi bu paabu padili. Yeni o baa mia sugili o ja yeni po. Lani o baa ŋanbi cain.

Yaa gbaado n tie luodo yaa ŋanbima

²¹ O nilo yeni yaa tie luodo ki naa pia yaala n dagidi, o baa cuani pebiyenga yaaga n baa tua o tudima padili. Bi baa tieni yaa bogidili n doagidi ke bi teni ga Li Miali Diedo ki padi ki mia sugili o tuonbiadi po. O baa cuani yaa yonŋanma n kali leni mi kpama, kilo bonba taa bebe lan tua mi jiema paabu leni mi kpama litidi boagidima.

²² O go baa cuani kpaajefanmu lie yaaka kpaajenawuundi lie nani wan pia yaa banlu. Yenga baa tua ti tuonbiadi sugili miabu padili, ki liega mo n tua li padijuukaali.

²³ Li daniili daali o baa taa ki cuani laa paabu kuli ki teni o kopadiciamo o ŋanbima po, ki nan yaa se u Kadikaanu gbandieli buliñoabu kani Li Miali Diedo nintuali.

²⁴ O kopadiciamo baa taa mi kpama litidi boagidima leni mi tudima padili yaa pebiga ki tieni yaa bogidili n doagidi ke o teni la Li Miali Diedo.

²⁵ Lani o baa kodi mi tudima padili pebiga yeni. O kopadiciamo baa taa mi soama ki tieni ma yua n bua ki ŋanbi yeni yaa jientubifaagu po, o jiennubijali po leni o jientajenbijali po.

²⁶ Lani o kopadiciamo baa taa mi kpama litidi boagidima yeni ki cabi ma o gannupuogu nni,

²⁷ ki tu o nubili mi kpama yeni niinni ki miimii taalima lele Li Miali Diedo nintuali.

²⁸ O baa ñani mi kpama leni o nubili ki tieni ma yua n bua ki ŋanbi yeni yaa jientubifaagu po, o jiennubijali po leni o jientajenbiajali po wan bi kpa tieni mi tudima padili soama naankani.

²⁹ Yaa kpama n sieni o kopadiciamo nupuogu nni yeni, o baa tieni ma yua n bua ki ŋanbi yeni yaa yuli po. Lani n tie wan mia opo sugili o tudima po Li Miali Diedo nintuali.

³⁰ Lanwani o kopadiciamo baa taa mu kpaajefanmu bi ti kpaajenawuundi yeni siiga yendo ki padi o wan tua ti tuonbiadi sugili miabu padili.

³¹ O go baa padi o lielo wan tua li padijuukaali. Yeni o kopadiciamo baa mia sugili Li Miali Diedo nintuali yaa nilo n bua ki ŋanbi yeni po.»

³² Lani n tie yaa gbaado n luo kaa pia yaala n dagidi o ŋanbima po yaa balimaama.

Li dieli goana po lega

³³ Li Miali Diedo den maadi Musa leni Alono ki yedi:

³⁴ «Yi yaa kua Kanana diema nni, min baa pa yi yaa diema yeni, o nilo yaa pia li dieli yin baa diedi yaa diema nni yeni ke n pua laa dieli leni mi gbaadima yaa calimu yeni,

³⁵ yua n die li dieli yeni baa gedi o kopadiciamo kani ki yedi o: ‹N laa yaa bonla n naani leni mi gbaadima yaa legili n dieli po.›

³⁶ Hali ke o kopadiciamo daa kua ki diidi li dieli yeni, o baa teni ban kpa ñani yaa tiadi n ye li dieli nni kuli, ke yaala n ye lienni n da *joagini. Lani o kopadiciamo baa kua ki diidi li dieli legili bonŋanla.

³⁷ O kopadiciamo baa diidi li legili yeni. O yaa laa li goanli yeni po ke li legili moani, yaaka ke li tie waanuama, ke li legili kani mo mia,

³⁸ o baa ña lienni ki luoni bu buliñoabu hali dana lele.

³⁹ Li daleleeli daali o kopadiciamo go baa goa ki diidi li bonŋanla. O yaa laa ke li legili yeni talini li dieli goanli kani,

⁴⁰ o baa teni ban ñani yaa tana n pia a lega yeni ki ban lu hali u dogu niinpo, ti joagindi kaanu.

⁴¹ O go baa teni ban koadi ki ñani li dieli tugu nni yaa boalima kuli ki wodi mi tama yeni kuli ki ñani ma niinpo ki lu ti joagindi kaanu.

⁴² Bi baa taa tantoana ki tieni a tankpiala kaanu ki buuni ti tansoangidi ki boali li dieli kuli.

⁴³ Ama bi yaa sua ke u yianu yeni go fii ki tieni a lega li dieli nni,

⁴⁴ o kopadiciamo go baa goa diidi li bonŋanla. O yaa laa ke a lega yeni talini boncianla li dieli po, li tie yaa gbaadima yaa buoli n puodi. Li dieli yeni joagini.

⁴⁵ Bi baa mudi ki bolini li dieli yeni, li tana, li daadi leni li tama kuli ki tugi ki ñani likuli u dogu niinpo ki gedini ti joagindi kaanu.

⁴⁶ Yaa nilo n den kua laa dieli nni lin lo yaa yogunu baa ye leni o joangidi hali ku yenjuogu.

⁴⁷ Yaa nilo n den duani laa dieli nni kuli baa ŋuudi o tiadi. Yua n den dini li dieli yeni niinpo mo baa ŋuudi o tiadi.

⁴⁸ Ama o kopadiciamo yaa goa kua li dieli nni ki diidi li bonŋanla ki laa ke a lega yeni naa talini ban go den boali li yeni yaa puoli po, o baa doagidi ki waani ke li dieli yeni ŋani, kelima li legili yeni bodi.

⁴⁹ O baa taa ki cuani nuani lie, sedili daadi, i gaalimoani leni isope daadi li dieli yeni niini mo.

⁵⁰ O baa kodi nuanyenga ki yini ga ti tandi tiagu po, mi ñinpuubikaama nni.

⁵¹ O baa taa sedili daagu leni i gaalimoani leni isope daadi leni yaa nuanga n fo yeni ki tuuni ban kodi yaa nuanga yaa soama nni, ki miimii li dieli goana po taalima lele.

⁵² Wan kubi yaala ki ŋanbi li dieli yeni tie ki nuanga soama leni mi ñinpuubikaama leni yaa nuanga n fo, leni sedili daagu leni isope daagu leni i gaalimoani.

⁵³ O baa ŋa ki nuanfuodiga u dogu niinpo i kuani nni. Yeni n tie wan baa ŋanbi li dieli yeni maama ke li baa ŋanbi.»

⁵⁴ Laa bali maama tie ti naabisinkuadi po, mi gbaadima po,

⁵⁵ ti tiayiekaadi po, a diena lega po, mi moalima po, mu calimu po leni a lega po.

⁵⁶ Laa balimaama bangi bi niba ti joagindi n ye yaa yogunu leni mi ŋanbima n ye yaa yogunu.

⁵⁷ Lani n tie mi gbaadima yaa balimaama.