Levi 13 - Gourmanchéma Bible

¹ Li Miali Diedo go den maadi Musa leni Alono ki yedi:

² «O nilo yaa sua ke o gbanu pia maalima, yaaka caliga bi yaa legipienli n naani leni mi *gbaadima, ban cuani o o kopadiciamo Alono kani, yaaka o bijaba yaaba n tie bi kopadicianba yeni siiga nni yendo yaa kani.

³ O kopadiciamo baa diidi li legili yeni bonŋanla o nilo yeni gbanu po. O yaa sua ke li legili yeni yaa kobidi pieni ki go sua ke li legili yeni kani yaa gbangu mia, li tie gbaadima yaa legili. Yaa kopadiciamo n biigi o yeni baa doagidi ki waani ke laa nilo *joagini.

⁴ Li yaa tie ke o sua ke li legili yeni yaa gbangu naa mia ke li kobidi mo naa pieni, o kopadiciamo yeni baa piadi ki luoni yaa nilo n pia li legili yeni hali dana lele.

⁵ Li daleleeli daali o kopadiciamo baa diidi o bonŋanla. O yaa sua ke li legili yeni naa talini ki pugini o gbanu po, o baa piadi ki luoni o miliema hali dana lele goga.

⁶ Li daleleeli daali o kopadiciamo go baa diidi o mi liema. O yaa sua ke li legili bua ki bodi, ke laa pugidi o gbanu po, o kopadiciamo baa doagidi ki waani ke o nilo yeni ŋani, ke li tie calimu bebe. O nilo yeni baa ŋuudi o tiadi ki go ŋanbi cain.

⁷ Ama yaa nilo n den waani o kopadiciamo o calimu leni o legili, ke o kopadiciamo doagidi ki waani o ke o ŋani yeni, yaa yuandi ki sua ke li legili talini o gbanu po, o go baa gedi miliema o kopadiciamo kani. O kopadiciamo go baa diidi o calimu.

⁸ O yaa sua ke mu calimu yeni talini o nilo yeni gbanu po, o kopadiciamo baa doagidi ki waani ke o nilo yeni joagini. Li tie gbaadima.

⁹ Mi gbaadima yaa legili yaa ye o nilo gbanu po, bi baa gedini o o kopadiciamo kani wan diidi o bonŋanla.

¹⁰ O gbanu yaa pia yaa maalima n pieni, ke likani kobidi mo pendi ke li legili yeni gbangu go goa moandi, li tie ke o gbaadikpelima n fii laa nilo gbanandi nni.

¹¹ O kopadiciamo baa doagidi ki waani ke o joagini, o kan piadi ki luoni o kelima li doagidi ke o joagini.

¹² Mi gbaadima daano yeni yaa gbanu po kuli yaa tieni mu calimu, ki cili o yuli po ki jiidi hali o taana po, o kopadiciamo n diidi o naankani kuli yaa pia mu calimu,

¹³ o kopadiciamo yeni yaa laa ke mu calimu bobi o gbanu kuli, o baa doagidi ki waani ke o nilo yeni ŋani, kelima o gbanu kuli n pendi maama yeni, o ŋani.

¹⁴ Ama yaa daali ke bi diidi ki laa ke o nilo yeni gbanu cili ki tieni a legimoana, laa nilo joagini.

¹⁵ O kopadiciamo yaa laa a legimoana yeni, o baa doagidi waani ke o nilo yeni joagini. Yaa gbanandi n pia a legimoana yeni joagini kelima li tie gbaadima.

¹⁶ A legimoana yeni yaa lebidi ki pendi, o nilo yeni baa gedi ki waani o kopadiciamo.

¹⁷ O kopadiciamo baa diidi o bonŋanla, o yaa sua ke a lega yeni kuli pendi, o baa doagidi ki waani ke o nilo yeni lega ŋanbi, ke o nilo yeni mo ŋani.

¹⁸ O nilo yeni yaa den pia li sinakpinli ke li soangi ki gbeni,

¹⁹ o yaa sua ke li sinakpinli n den ye yaa kaanu yeni moali ki pieni, bi li yaa tieni li legimoanli, wan gedi ki waani o kopadiciamo.

²⁰ O kopadiciamo baa diidi o bonŋanla. O yaa sua ke li legili yeni kobidi pendi, o baa doagidi ki waani ke o nilo yeni joagini kelima gbaadima yaa legile, yaali n legidi li sinakpinli yeni yaa nayiagu nni.

²¹ Ama o kopadiciamo yaa laa ke li legili naa pia kobipiendi, ke li gbangu mo naa mia, ke yaala n bi moani yeni bua ki bodi, o baa piadi ki luoni li daano hali dana lele.

²² Lani, o yaa sua ke li legili yeni talini o nilo yeni gbanu po, o baa doagidi ki waani ke o nilo yeni joagini. Li tie gbaadima yaa legili.

²³ Ama o yaa sua ke li legili se yenma ki naa talini, li tie li sinakpinli yaa nayiagu bebe. O baa doagidi ki waani ke o nilo yeni ŋani.

²⁴ Li yaa tie ke o nilo gbanu po pia yaa kaanu n kabi ki boandi kelima mi fantama n fuli o likani, ke li kaanu cili ki tieni yaa legili n pieni, yaaka yaali n moani, o kopadiciamo baa biigi li legili yeni.

²⁵ Li legili yeni yaa kobidi yaa pendi ke li gbangu mo mia, li tie mi gbaadima n doagidi mi fantama n fuli ki kabi o gbanu naani yeni. O kopadiciamo baa doagidi ki waani ke o nilo yeni joagini kelima li tie gbaadima yaa legili.

²⁶ O kopadiciamo yaa laa ke li legili kobidi naa pendi, ke li gbangu mo naa mia, ke yaala n moani mo bua ki bodi, o baa piadi ki luoni o nilo yeni dana lele.

²⁷ Li danleleeli daali o kopadiciamo go baa diidi o nilo yeni bonŋanla. O yaa sua ke li legili yeni talini, o kopadiciamo baa doagidi ki waani ke o nilo yeni joagini. Li tie gbaadima yaa legili.

²⁸ Ama o yaa sua ke li legili se yenma ki naa talini o nilo yeni gbanu po, ke yaali n moani yeni mo bua ki bodi, li tie mi fantama yaa juuma yaa legili bebe. O kopadiciamo baa doagidi ki waani ke o nilo yeni ŋani, kelima li tie mi fantama juuma yaa nayiagu bebe.

²⁹ Li yaa tie ja bi pua n pia ti naabisinkuadi o yudi nni yaaka o langbiadi nni, o kopadiciamo baa diidi li legili yeni bonŋanla.

³⁰ O yaa sua ke likani gbangu mia ke ti yudi mo ñili ki duudi, o kopadiciamo baa doagidi ki waani ke laa nilo joagini. Laa naabisinkuadi buolu tie li yuli leni li langbiali yaa gbaadima.

³¹ O kopadiciamo yaa laa ke ti naabisinkuadi yeni yaa lega naa mia, ke ti yukobiboandi naa ye, o baa piadi ki luoni yua n pia ti naabisinkuadi yaa lega yeni hali dana lele.

³² O kopadiciamo go baa diidi li legili yeni li daleleeli daali bonŋanla. O yaa sua ke li legili yeni naa talini ke likani yudi naa duudi ke li legili mo naa mia,

³³ o baa teni o nilo yeni n kuo, ama o kan kuo yaa kaanu n pia ti naabisinkuadi yeni. O kopadiciamo baa luoni o mi liema hali dana lele goga.

³⁴ Dana lele yaa pendi, o kopadiciamo baa diidi ti naabisinkuadi yeni bonŋanla. O yaa sua ke li legili naa talini, ke likani gbangu naa mia, o baa doagidi ki waani ke o nilo yeni ŋanbi. O baa ŋuudi o tiadi ki yuandi ki yaa ŋani cain.

³⁵ Ama ku naabisinkuagu yeni yaa talini o gbanu po, wani yua ke bi diidi o ki yedi ke o ŋani yeni, o kopadiciamo go baa goa ki diidi o bonŋanla.

³⁶ O yaa sua ke li legili yeni talini o nilo yeni gbanu po o kopadiciamo kan go lingi yaa kobidi n duudi yaa ye likani kaa, laa nilo li joagine.

³⁷ Ama o yaa sua ke li legili yeni naa talini ke ti yukobiboandi mo pudi likani, o baa jagi ke ku naabisinkuagu yeni gbeni, o ŋanbi mo n yeni. O kopadiciamo baa doagidi ki waani ke o ŋani cain.

³⁸ Li yaa tie ke ja bi pua gbanu po pia mu calipienmu,

³⁹ o kopadiciamo baa diidi o bonŋanla. O gbanu yeni yaa calimu yaa pendi waamu bebe, li tie ŋmaali n cuo o. Laa bia.

⁴⁰ Yaa nilo yaa yuli n tie yuminminli laa bia.

⁴¹ Li yaa tie li cili o yutunli ki yaa caa hali o yuli siiga n naa pia yudi, o tie yupidili. Laa bia.

⁴² O nilo yuli yaa pidi puoli bi liiga, ke li pia yaa legili n pieni ki go moani, li fidi ke li tie gbaadima n doagidi li yupidili puoli bi li liiga.

⁴³ O kopadiciamo baa diidi o bonŋanla ki le li legili yeni yaa moali ki pieni ki go moani, o yupidili yeni po, lan tie liiga bi puoli, ki naani leni mi gbaadima yaa lega o nilo gbanu po, laa nilo tie gbaado.

⁴⁴ O kopadiciamo baa doagidi ki waani ke o joagini kelima o yulega ya n ye o yupidili puoli bi li liiga yeni po.

⁴⁵ Gbaado kuli baa laa ti tiacadinti, ki kan yaa ciibi liba. O go baa pii o ñoabu ki yaa kpaani ki tua: ‹Joagindi! Joagindi!›

⁴⁶ O yaa ye leni a lega yeni, o baa ye leni o joagindi o baa ye o bebe, o baa piadi ki ña li nagili nni ki yaa ban ye.

A lega ti tiayiekaadi po

⁴⁷ Gbaadima lega yaa ye yaa tiayiekaadi n tie pekobidi bi *len po,

⁴⁸ bi a yaa ye yaa gaali bi yaa suobu n tie len bi pekobidi, bi a yaa go ye yaa tiagu n jabi leni ku gbangu po,

⁴⁹ a legimoana leni mi legiwaanuama yaa ye ti tiadi po bi ku gbangu po, bi i gaali leni u suobu po, bi yaa bonla n jabi leni ku gbangu kuli po, a tie gbaadima yaa lega yo. Bi baa waani laa tiadi o kopadiciamo.

⁵⁰ O kopadiciamo baa diidi ti tiadi yeni yaa lega ki bili ti li dieli nni ki luoni ti hali dana lele.

⁵¹ Li daleleeli daali o go baa diidi ti tiadi yeni yaa lega bonŋanla. Li yaa tie gaali, bi suobu, bi gbangu bi yaa tiadi n tie gbanjabikaadi kuli po, li tie yaa gbaadima n puodi, ti tiadi yeni joagini.

⁵² Ban laa a lega yaa gaali bi yaa suobu n tie len, bi ti pekobidi po, bi yaa bonla n jabi leni ti gbandi po, o baa sia ki buoni laa tiadi kuli cain, kelima li tie yaa gbaadima n puodi.

⁵³ Ama o kopadiciamo yaa laa ke li legili yeni naa talini ti tiayiekaadi yeni po, lan tie gaali bi suobu po bi yaa bonla n jabi leni ti gbandi po,

⁵⁴ o baa teni ban ŋuudi u yianu yeni n cuo naankani. Lanwani o go baa piadi ki luoni ti li dieli nni hali dana lele.

⁵⁵ Bi yaa ŋuudi ti tiadi yeni ke dana lele pendi, o kopadiciamo go baa diidi a lega yeni kani bonŋanla. O yaa sua ke li legili yeni naa lebidi ke li naa talini, ku tiagu yeni joagini. U yianu yeni n dini ku tiagu yeni niini bi ku tugu nni kuli. Bi baa sia laa tiagu .

⁵⁶ Ama o kopadiciamo yaa laa ke bi ŋuudi ti tiadi ke li legili yeni pendi ki bua ki bodi, bi baa jia ki ñani yaa kaanu n pia li legili yeni ti tiadi kani bi ku gbangu kani bi gaali bi suobu kani.

⁵⁷ Li yaa tie ke li legili go tieni ti tiadi po, bi i gaali bi u suobu po, bi yaala n jabi leni ku gbangu po, li tie mi gbaadima yaa lega n legidi ti tiadi yeni po. Bi baa sia lan cuo yaala kuli cain.

⁵⁸ Ban den ŋuudi yaa tiadi yaaka yaa gaali bi yaa suobu, yaa kaa yaa bonla n jabi leni ti gbandi, ke a lega bodi, bi go baa ŋuudi ti miliema lan ŋanbi cain.»

⁵⁹ Lani n tie mi gbaadima n cuo yaa tiayiekaadi ke ti tie ti pekobidi bi len bi i gaali leni u suobu, bi yaa bonla n jabi leni ti gbandi yaa *balimaama. Lani n tie yaala n baa fidi ki doagidi ki waani ke li ŋani bi ke li joagini.