Levi 12 - Gourmanchéma Bible

¹ Li Miali Diedo den maadi leni Musa ki yedi:

² «Waani Isalele yaaba yaa maama n tie na: O pua yaa punbi ki mali bonjaga, o baa ye leni o joagindi hali dana lele, nani wan den ye o ŋmaalo nni ke li tie maama. O baa ye leni o joagindi hali laa dana banlu.

³ Li daniili daali bi baa kuani ki biga ku ciagu.

⁴ O pua yeni go baa guudi piitaa n dana taa o ŋanbima yaa po. O kan kua u *kaangagidiŋamu nni hali o ŋanbima dana yeni yaa pendi.

⁵ O yaa mali bonpuoga, o baa ye leni o joagindi hali piiga n dana naa, nani wan den ye o ŋmaalo nni ke li tie maama. O go baa guudi piiluoba n dana luoba o ŋanbima yaa po.

⁶ Li yaa tie bonjaga bi bonpuoga yaa madi po ke o ŋanbima dana pundi, o baa taa yaa pebiga n pia binyenli li padijuukaali po, ki go taa ku kpaajenawuungu bi ki kpaajefanga ti*tuonbiadi sugili miabu padili po ki cua ki teni o kopadiciamo u *Kadikaanu gbandieli kani.

⁷ O kopadiciamo baa ga ki padi ba Li Miali Diedo nintuali. O baa mia opo o tuonbiadi sugili, yeni o baa ŋanbi. Lani n tie yaa *balimaama n bili yua n mali bonjaga bi bonpuoga po.

⁸ O pua yeni yaa kan fidi ki baa ki pebiga, o baa taa kpaajefanmu lie bi kpaajenawuundi lie ki cuani. Yendo baa tua li padijuukaali, o lielo mo baa tua ti tuonbiadi sugili, lani, o baa ŋanbi.»