Levi 11 - Gourmanchéma Bible

¹ Li Miali Diedo den maadi Musa leni Alono ki yedi ba:

² «Waani mani Isalele yaaba yaa maama n tie na: Diidi mani ki tinga nni yandi siiga yin baa ŋmani yaadi:

³ Yi baa fidi ki ŋmani yaa yanga n pia mi taabadima ki go bugidi.

⁴ Ama yi kan ŋmani yaa yandi n bugidi bebe, yaaka yaa yandi n pia mi taabadima bebe. Yeni yaa po yin da ŋmani yaa yandi n tiene: Ku yoyuogu ku bugidi, ama ku naa pia taabadima, yi baa yaa nua gu ke ku *joagini.

⁵ Li joamabili, li bugidi, ama li naa pia taabadima, yi baa nua li ke li joagini.

⁶ Ki jakpewonga yaaga n bugidi ama ki naa pia taabadima, yi baa nua kani mo ke ki joagini.

⁷ O duolo, yua n pia mi taabadima ama waa bugidi. Yi baa nua o mo ke o joagini.

⁸ Yin da ŋmani laa yandi nandi, yin da sii li yankpiendi mo. Yi baa yaa nua ti ke ti joagini.

⁹ Diidi mani yaa bonfuoda n ye mi ñima nni yin baa ŋmani yaaba nne: Yi baa ŋmani yaa jami n pia yaala n todi ba ke bi dugi ki go pia a poaga kuli.

¹⁰ Ama yaa bonfuodibila n ye mi ñincianma nni leni i kpeni nni kuli ki dugi, bi ki balini kuli, ki naa pia janlelebidi leni poagidi, yi baa yaa nua ba ke bi tie yipo ti cagindi bonla.

¹¹ Bi baa yaa tie yipo ti cagindi, yin da ŋmani bi nandi. Yi baa nua laa bonfuoda kpiema moko ke bi tie yipo ti cagindi bonla.

¹² Yaala n ye mi ñima nni ki naa pia janlelebidi leni poagidi kuli, baa tie yipo ti cagindi.

¹³ Diidi mani i nuani siiga yi n baa tie yipo ti cagindi ke yi kan ŋmani i nne: O yobilo, ku kaciigu, koasinkoanli

¹⁴ li kafenli, a puakenleda leni yaaba n tie bi yaa buolu kuli.

¹⁵ Li kankali leni li yaa buoli kuli.

¹⁶ Ku tataagu, li juuli, mi ñincianma nni yaa fengu, ki kafenga leni ki yaa buolu kuli.

¹⁷ Li juuli, ñindugijanboandi leni ki jubalikpendiga.

¹⁸ Li yienli, jeebugi leni ku kulijaŋmaangu.

¹⁹ Goliya, o kpenjanlondo leni yaaba n tie o yaa buolu kuli, ciliboe leni ti janjandi.

²⁰ Yaa bonfuodibila n pia i fiabi ki yugi, ki go cuoni taana naa ki tinga po kuli, baa tie yipo ti cagindi bonla.

²¹ Ama yaa bonfuodibila n pia i fiabi, ki cuoni taana naa kuli yaa siiga, yi baa fidi ki ŋmani yaaba n cuoni taana naa ki pia taafoagida lie ki dobili tiipo.

²² Yeni yaa po yi baa fidi ki ŋmani yaa bonbuoli n tie ne: i naaci, a gbangbaana leni bi yaa buoli kuli.

²³ Yaa bonfuoda n sieni ki pia i fiabi ki yugi ki go cuoni taana naa kuli baa tie yipo ti cagindi bonla.

O nilo n baa sii yaala lan joagini o

²⁴ Ti yantiandi siima baa fidi ki joagini yi: yaa nilo n sii li bonkpienla, o baa ye leni o joagindi hali ku yenjuogu.

²⁵ Yua n tugi li bonkpiema, o baa ŋuudi o tiadi kuli ki yaa ye leni o joagindi hali ku yenjuogu.

²⁶ Yaa yandi n naa pia taabadima ki naa bugidi kuli, yi baa yaa nua ti ke ti joagini. Yua n sii ti kuli baa joagini oba.

²⁷ Yaa yandi n cuoni taana naa ki tie taacibidi kuli, yi baa nua ti ke ti joagini. Yua n sii laa yankpiendi kuli baa ye leni o joagindi hali ku yenjuogu.

²⁸ Yua mo n tugi laa yankpienga baa ŋuudi o tiadi ki yaa ye leni o joagindi hali ku yenjuogu. Yi baa nua laa yandi kuli ke ti tie yipo ti joagindi.

²⁹ Diidi mani yaa bonfuoda n balini tiipo yaa siiga yin baa nua yaaba ke bi joagini: Li soali, o dapolo, o dabuno leni bi yaa buoli kuli.

³⁰ Li badili, li sadimadili, li kunkuli, o yua leni o kankanminatuolo.

³¹ Yi baa nua laa bonla kuli ke li tie yipo ti joagindi. Laa bonfuoda buoli kuli yaa siiga, yua n sii li bonkpienla kuli baa ye leni o joagindi hali ku yenjuogu.

³² Laa bonfuoda bonkpiema yaa baa yaali yaa po kuli, laa bonla moko baa joagini, li yaa tie yaa tiagu n tie ti daadi, tiayiekaagu, gbangu, kpalipiagu, baa ŋan kubi yaa tiagu a tuonli po, a baa nua ke ku joagini. A baa baa mi ñima ki ŋuudi gu. Ku baa ye leni ku joagindi hali ku yenjuogu. Li yaa pendi ku baa ŋanbi.

³³ Yaala n kpie tandi tiagu nni, ke li baa lipo, laa bonla baa joagini. Yi baa mudi laa tiagu.

³⁴ Li ñima n wuli yaa jiema po kuli baa joagini. Yaa bonñokaala n kua laa tiagu nni kuli baa joagini.

³⁵ Laa bonkpiema yaa baa tiaguba kuli po, li yaa tie dupenpuakaanu po, bi fanu po, yi baa mudi la kelima li joagini. Yi baa nua la ke li joagini.

³⁶ Ama li yaa tie ñinbunli nni yaaka caana nni, mi ñima n yaba naani ke o baa lienni, laa ñima baa ŋani. Ama yaa nilo n sii laa kpiemo kuli o baa joagini oba.

³⁷ Laa bonkpienla yaa baa bonbuoliba nni, yi baa ŋani.

³⁸ Ama yua n wogini laa bonbuoli ñima nni ke laa bonkpiemo baa lienni, yi baa nua laa bonbuoli ke i joagini.

³⁹ Li yaa tie ke yin ŋmani yaa yanbuoli yaa niinni yaa yanga yaa kpe, yua n sii ki yankpienga yeni baa ye leni o joagindi hali ku yenjuogu.

⁴⁰ Yaa nilo n ŋmani laa yankpienga baa ŋuudi o tiadi ki yaa ye leni o joagindi hali ku yenjuogu. Yua mo n taa ki ñani ki yankpienga yeni baa ŋuudi o tiadi ki yaa ye leni o joagindi hali ku yenjuogu.

⁴¹ A bonfuoda yaaba n fuli bi tugidi po kuli baa tie yipo ti cagindi. Yi kan tuo ki ŋmani a.

⁴² Yi kan ŋmani yaa bonfuoda n balini tiipo, yaaka yaaba n fuli bi tugidi po, yaaka yaaba n cuoni ki pia taana naa, bi yaaba n pia a taana boncianla kuli, kelima bi baa tie yipo ti cagindi bonla.

⁴³ Yin da tuo ki joagini yiba leni laa bonfuoda yaaba n balini ki tinga po yin da joagini yi yula leni laa bonfuoda.

⁴⁴ Kelima n tie Li Miali Diedo yi Tienu, yi baa gagidi ki ŋanbidi yi yula, ke yin yaa ŋani cain, kelima n gagidi ki ŋani cain. Yin da joagini yiba leni laa bonfuoda yaaba n balini tiipo yeni.

⁴⁵ N tie Li Miali Diedo yua n den teni ke yi ñani Ejipiti diema nni, ke min yaa tie yi Tienu. Yi baa gagidi ki ŋanbidi yi yula kelima n gagidi ki ŋani.»

⁴⁶ Lani n tie ti yandi, ti bonyugiditi leni yaa bonfuoda n ye mi ñima leni yaa bonfuoda n balini tiipo kuli yaa*bali maama.

⁴⁷ Yeni yi baa fidi ki gagidi ki bandi yaala n joagini leni yaala n ŋani, yin baa ŋmani yaa yandi leni yin kan ŋmani yaa yandi yaa paadima.