Levi 10 - Gourmanchéma Bible

¹ Alono bijaba, Nadabi leni Abihu den taa ti fantantiadi, yua kuli yengu yengu ki padi mi fantama ki maani lipo tulale. Bi den kuani u *Kadikaanu gbandieli nni, Li Miali Diedo nintuali fantanlanma, Li Miali Diedo n den kuani ba yaala.

² Lanyogunu-lanyogunu mi fantama den ñani Li Miali Diedo nintuali ki sia ki buoni ba. Bi den kpe lankani Li Miali Diedo nintuali.

³ Musa den yedi Alono: «U Tienu Li Miali Diedo den tuodi ki kadi ki waani yi lane wan den yedi: ‹N bua ke yaa niba n nagidi nni n yaa fangi n gagidiŋanma, ki kpiagi nni bi niba kuli nintuali.› » Alono den ŋmini suo.

⁴ Lani Musa den yini Mikayeli leni Elisafani, Alono baa naataanu Usieli bijaba, ki yedi ba: «Nagini mani ki taa yi kpiiba yeni ki ñani ba li nagili niinpo ki foagidi ba leni u*kaangagidiŋamu.»

⁵ Bi den nagini ki taa a tinkpila yeni leni bi liada ki ñani ba li nagili niinpo, nani Musa n den yedi ba maama.

⁶ Musa den maadi leni Alono, leni o bijaba Eleyasala leni Itamali, ki yedi: «Yin da ŋa yi yudi ki kan ŋanbi ti, yin da padi yi tiadi ki doagidi ke yi ye leni mi kuuma paboanli ke yin da ti kpe, yin go da ti fiini Li Miali Diedo pali li nitaanli kuli po. Cedi mani yi kpiiba, Isalele yaaba kule n mua i kumoe Li Miali Diedo n teni ke mi fantama kpa yaaba yeni po.

⁷ Yin da fuadi mani u Kadikaanu gbandieli buliñoabu kani, ke yin da ti kpe, kelima yi bani ke ban sogi yi yaa kpama yeni gagidi Li Miali Diedo po.» Bi den tieni Musa n den waani ba yaala.

Li dañoli yaa bali maama

⁸ Li Miali Diedo den maadi leni Alono ki yedi o:

⁹ «Fini leni a bijaba n da ño duven bi dabiadimaba kuli yi yaa baa kua u Kadikaanu gbandieli nni. Yeni yi kan kpe. Laa *balimaama baa yaa ye hali yaa yogunu kuli, yinba leni yi puoliŋuani po.

¹⁰ Yeni yi baa fidi ki gagidi ki bandi yaala n kua leni yaala n ki kua siiga ki go gagidi yaala n *joagini leni yaala n ŋani cain yaa siiga,

¹¹ ki go bangi Isalele yaaba Li Miali Diedo n den puogi Musa ke o bili yipo yaa bali maama kuli.»

Ti padinandi yaa bali maama

¹² Musa go den maadi leni Alono leni o bijaliediba yaaba n sieni Eleyasala leni Itamali ki yedi ba: «Yin taa mani ban ñani yaala a padijuukaana padijiedi nni ki je li*padibinbinli kani ke *dabinli ki ye lienni, kelima mi tie yaa bonla n gagidi ki ŋani hali bonŋanla.

¹³ Yi baa je ma yaa kaanu n gagidi. Li tie fini leni a bijaba yaa biinu, ban baa padi ki juu yaa pada Li Miali Diedo nintuali kuli siiga. Lani n tie Li Miali Diedo n den waani nni maama.

¹⁴ Ban tieni yaa bogidili n doagidi ke bi teni la Li Miali Diedo li bengunli leni li panli kuli, bi puni fini leni a bijaba leni a bisiaba yin yaa ŋmani ti yaa kaanu n gagidi. Li tie fini leni a bijaba yaa biinu Isalele yaaba n puuni yaa taanyenma pada yaa niinni.

¹⁵ Isalele yaaba baa cuani yaa kpama ke bi baa sia ki buoni. Bi baa taani ki cuani ma leni li panli leni li bengunli, o kopadiciamo n baa taa yaala ki tieni yaa bogidili n doagidi ke o teni la Li Miali Diedo. O yaa tieni yaa bogidili n doagidi ke o teni la Li Miali Diedo, laa nandi baa yaa tie fini leni a bijaba yaa biinu. Li tie yaa balimaama n baa yaa ye hali yaa yogunu kuli, ki yaa caa hali yi puoliŋuani, nani Li Miali Diedo n den bili maama.»

¹⁶ Musa den lingi i candanbaani padiŋuabuali yeni nandi ki sua ke bi sia ki buoni ti cain. O pali den biidi Alono bijaba Eleyasala leni Itamali po.

¹⁷ O den yedi ba: «Be yaa po ke yii ŋmani i candanbaani padiyanga yeni nandi yaa kaanu n gagidi nni? Li tie yaa bonla n gagidi ki ŋani hali bonŋanla. Li Miali Diedo den puni yi laa bonla ke yin ñani li nitaanli tagili ki go mia bipo sugili Li Miali Diedo nintuali.

¹⁸ Diidi, yii kuani ki padiyanga yeni soama u kaangagidiŋamu tugu nni. Lanwani yi bi baa ŋmani ti nandi yeni u kaangagidiŋamu nni, nani U Tienu n den waani nni maama.»

¹⁹ Alono den goa ki yedi Musa: «Diidi, dinla bi bi padi bi candandi padili leni bi padijuukaali Li Miali Diedo nintuali. Ama yaa bonla n bi tieni nni dinla ne, n yaa bi ŋmani i candanbaani padinandi yeni, nani li bi baa mangi Li Miali Diedo bii?»

²⁰ Musa den gbadi mi maama yeni ki saa mipo moamoani.