Kolosi 4 - Gourmanchéma Bible

¹ Yinba canbaanba, yin yaa tiendi mani yi yonbi po yaala n tiegi leni yaala n pundi, ki yaa tiani ke yi moko pia Canbaa tanpoli po.

I tundi Jesu yaaba po

² Yin yaa jaandi mani U Tienu ki da cedi, ki da yoaligi, ki yaa tuondi o mani.

³ Yin yaa jaandi o mani tipo ke wan pa ti u sanu tin fidi ki yaa wangi o Laabaaliŋamo, ki doagidi o *bondoaginkaala yaala n tie Kilisiti maama fuuli. Li tie laa maama po ke n ye ne li kpaadidieli nni.

⁴ Yin go yaa jaandi mani npo ke min maadi laa maama nani lan pundi min maadi maama.

⁵ Yin yaa ye leni yaaba n kaa daani leni mi yanfuoma, ki da tuo yin ye leni ba yaa yogunu n bia fanma.

⁶ Yi maama n yaa mani yogunu kuli, ki tie nani yaa jiema n pia mi yaama ke li dagidi yeni. Li pundi yin yaa bani ki guani nilo kuli po yaa maguankaama n dagidi.

I fuondijuodike

⁷ Tikika baa waani yi n laabaalo kuli. O tie ti kpibuado leni ti todika tin dugi yua po, leni ti naacenlielo o Diedo tuonli nni.

⁸ N soani o yikani lani yaa po lige, ke yin bandi lan tie tipo maama, wan mo n paagi yi pala.

⁹ Ti kpibuado Onesima yegi leni o. O moko tie nidugika ki tie yi siiga yua. Bi baa waani yi nekanba laabaalo kuli.

¹⁰ N kpaadilielo Alisitaka fuondi yi. Banabasa yiabiga Maka moko fuondi yi. N den tuodi ki teni yi li ñoabonli o maama po. O yaa cua yikani, yin ga mani o cangu bonŋanla.

¹¹ Jesu, ban go yi yua Jusitusa, moko fuondi yi. Yaa Jufinba n ye ne kuli siiga, bani bebe n tie n tuonsoanlieba ki tuuni *U Tienu diema tuonli. Bi paagi n pali boncianla.

¹² Epafasa yua n tie yi siiga yua ki go tie Jesu Kilisiti naacemo moko fuondi yi. O moa yipo yogunu kuli o jaandi nni, ki miadi yipo ke yin yaa tie yaaba n dagidi cain, ki bani U Tienu n bua yaala, ki yaa se ke li pa U Tienu sanŋoadima nni.

¹³ N tieni opo siedi ke o tuuni yipo leni li yankuali boncianla, yinba leni yaaba n ye Layodise leni yaaba n ye Iyelapoli kuli.

¹⁴ Ti buado lotoli Luka leni Demasa moko fuondi yi.

¹⁵ Yin fuondi mani ti kpiiba yaaba n ye Layodise kuli, ki go fuondi Ninfa, leni Kilisiti n yini yaaba yaaba n taagi o diegu nni.

¹⁶ Yi yaa cogi li naa tili, yin teni ban cogi li Kilisiti n yini yaaba yaaba n ye Layodise po moko. Layodise yaaba mo n soani yipo ban baa yaa tili, yin cogi li.

¹⁷ Yin yedi Alikipa: «Ŋan fangi a yuli leni o Diedo n puogi a yaa tuonli, ki soani li ki dudi.»

¹⁸ Mini Polo n diani yaa fuondi n tie na leni n nuceli ki fuondi yi. Yaa tiani mani n kpaadi po. U Tienu yaa *ŋanbili n yaa ye leni yi.