Kolosi 2 - Gourmanchéma Bible

¹ N bua yin bandi min moa yaa muacianli yinba leni yaaba n ye Layodise po yaa po leni yaaba n daa laa n nunga kuli po.

² N tiendi yeni ke ban baa li papaali, ki taani yenma mi buama nni, ki yaa pia yaa yanfuoma n dagidi ke yin bandi yin dugi yaala yaa po cain. Li go tie ke yin bandi U Tienu *bondoaginkaala, lani n tie Kilisiti.

³ Mi yanfuoma leni U Tienu bandima ŋalimani kuli wuo wani Kilisiti yaa niinni.

⁴ N waani yi laa maama kuli ke oba kuli n da boandi yi ki tulini yi leni mi mamanma.

⁵ Kelima baa ke mii ye leni yi n gbanandi nni, n ye leni yi n yantiali nni ki pia li pamanli leni min nua ke yi dagidi leni yiyaba maama, ke yi *dandanli mo se ke li pa Kilisiti nni.

Kilisiti n puni yi yaa miali

⁶ Yin den tuo Jesu Kilisiti o Diedo yeni, yin yaa tuugi mani leni o yi yema kuli nni,

⁷ ki yaa pia yi jiini o niinni ki suagi liiga o sanŋoadima nni. Yin go yaa se ke li pa yi dandanli nni nani ban den bangi yi maama. Yi pala n yaa gbie leni i tuondi opo hali ke li kandi.

⁸ Yin fangi mani yi yula ki da tuo ke oba kuli n cuo yi yama leni o nisaalo yanfuoma yaama n ŋua bi nisaaliba bangima, yaama n tie fanma fanma ki tie boandi ki ŋua bi nisaaliba danbogida leni ŋanduna paaciami, ki naa ŋua Kilisiti.

⁹ Kelima U Tienu n tie maama kuli ye Kilisiti gbanandi nni ki dagidi.

¹⁰ Yi mo pia li bonla kuli ke li dagidi o yaa niinni, wani yua n tugi li yuli ki die yaaba n tie mi diema danba leni u paaciamu danba kuli.

¹¹ O yaa niinne, ke yi kua yaa koanciagu n naa tie o nisaalo nuu n tieni yaala, gu tie Kilisiti n tieni yaala, lani n tie ke yi landi ti nisaali-gbanandi tagibiadu.

¹² Nani ban den taani ki piini yi leni Kilisiti kelima mi *batisima po yeni, yi go fii bi tinkpiba siiga o yaa niinni ki taani leni o, kelima li dandanli U Tienu yua n den fiini o bi tinkpiba siiga paaciamu yaa po.

¹³ Yinba yaaba n den kpe kelima yi *tuonbiadi leni yin kaa den kua koanciagu yi gbanandi nni maama po, U Tienu goa ki puni ti li miali kelima o yaa po: Ki puni ti sugili ti tuonbiadi kuli po.

¹⁴ O den bolini yaa tili yaa diani N den buni ki cuo ti ki doagidi Tin den yie o mabilikaama maama, Ki kpaa ki tabini laa tili Li *dapoanpoanli po ki bolini li.

¹⁵ O den dindi yaaba n tie mi diema danba Leni i paaciami danba kuli bi bali, Ki doagidi mi tagima kuli po Ke o paani ba, Kelima li dapoanpoanli po.

¹⁶ Lani yaa po, yin da tuo ke oba kuli n jia yi ti buudi kelima yin di ki go ñu yaala po, bi lan tie yaa *jaanma dana po, yaaka i ŋmapaani jaanma dana, yaaka mi *fuodima dana po.

¹⁷ Laa bonla kuli tie yaala n baa ti cua yaa jinjingu, li bonmoanla liba tie Kilisiti.

¹⁸ Yin da tuo niloba kuli n fie yi nuama panpaani nani wan bua maama, baa yaaba n kpali ke bi pia li yumiinli ki jaandi malekinba. Bi puni bi yula li bonlekaala po, ki gbengidi bi yula fanma fanma bi gbanandi yantiana po.

¹⁹ Baa tuugi leni yua n tie li yuli, ti gbanandi kuli n tuugi yenma ki go baadi yaala n dagidi yua yaa kani kelima i jiini leni a tuga po, ki kpedi nani U Tienu n puni maama.

Ki kpe leni Kilisiti ki go yaa ye ki fo leni o

²⁰ Yi yaa kpe leni Kilisiti, yi paadi leni ŋanduna maasuagu. Be yaa po ke yi go tuo ke ŋanduna kuana die yi nani yi da tie ŋanduna yaaba yeni?

²¹ Laa kuana nne: Ŋan da taa, ŋan da leni, ŋan da sii.

²² A kuli maadi yaa bonla n pia mi tienma ki baa bodi yaa maama. A kuli ŋua bi nisaaliba n bili ki bangi yaala bebe.

²³ A kuana yeni tie nani a pia mi yanfuoma kelima a cedi bi niba n gandi ban baa jaandi maama, ki go bili bi niba n yaa miindi bi yula ki wangi bi gbanandi fala. Ama ŋaa pia mayuli ki baa todi bi niba ban yaa paani bi gbanandi bonbuakaala.