Jude 1 - Gourmanchéma Bible

I fuondi

¹ Mini Juda, yua n tie Jesu Kilisiti naacemo ki go tie Jaka waalo, n diani li tili yipo, yinba U Tienu yua n tie Baa n yini yaaba ki go bua yaaba, ki kubi yaaba Jesu Kilisiti po.

² Mi niñingbadima, mi yanduanma leni mi buama n yaa pugidi yipo hali boncianla.

Bi bangi-faadanba

³ N buakaaba, n den bua hali boncianla ki diani yipo yaala n tie tikuli n taani ki pia yaa *tindima yaa po. Ama n den sua ke li tie npo tiladi min diani ki tundi yi ke yin koani li *dandanli koanli, U Tienu n den teni o *nigagidiŋanba yaa dandanli yenma u yogunu kuli po.

⁴ Kelima bi nitianba wuoni ki kua yi siiga, i Diani n den maadi yaaba yaa bujiali cuonu hali yogu. Bi tie U Tienu yiekaaba, yaaba n lebidi ti Tienu *ŋanbili ke lan tua mi conconma bonla. Bi go yie Jesu Kilisiti, wani yua bebe n tie ti Canbaa leni ti Diedo.

⁵ Baa ke yi bani yaala n tie na kuli bonŋanla, n bua ki go tiadi yi ke o Diedo den faabi o niba Isalele yaaba ki ñani ba Ejipiti nni. Ama o den yuandi ki bolini bi siiga yaaba n naa den dugi opo.

⁶ Yaa malekinba n naa den kubi ban pia yaa bali, ki ŋa bi yekaanu, U Tienu kpaa ba yaa kpaadi n baa ye hali yaa yogunu kuli, ki kubi ba li *biigili nni hali li bujiali cuonu dacianli n cua.

⁷ Li go tie yeni Sodoma leni *Gomola leni bi tinkundogi yaaba po, yaaba n den tieni nani laa malekinba, ki puni bi yula ki tiendi mi conconma leni ti cagindi buoli kuli po. Baa moala bi laadi yaa fantama n kan gbindi yaa buudi fala, ki tie bi niba kuli po li bondiidikaala ki tuodi ki tundi ba.

⁸ Baa yeni, laa jaba yaa yanmaalima n cuo ba maama po teni ke bi cagini bi yula, ki fali U Tienu bali, ki sugidi o malekinba yaaba n pia ti kpiagidi.

⁹ Lanwani baa malekinba yudaano *Miseli n den nia leni Sutaani Musa o kpiemo gbanandi po yaa yogunu, waa den tuo ki maadi o buudi leni sugidi maama. Ama o den yedi o: «O Diedo n yie apo.»

¹⁰ Ama laa jaba sugidi ban kaa bani yaala. Baa ban bani yaala bi ŋua bi yanmaalima nani ti yandi yeni ki bolini bi yula.

¹¹ Fala n baa bipo, kelima bi ŋoadi Kayina n den ŋua yaa sanu. Bi go luni bi yula *Balaama yaa yaadima nni kelima bi bua ki baa mi panpaani. Bi fiini mi janjanma ki bodi nani Kole yeni.

¹² Li tie bani n *joagini yin n taani leni yi kpiiba ki di yaa jiema. Lankane bi yen di ki go ñu ke li pendi, kaa jie fe, ki nua bi yaa yula bebe. Bi tie nani u faalu n tudi yaa tawala ke ŋaa pia ñima yeni. Bi go tie nani li fali yaa tiidi n naa loni baa i yogunu, ama ki kuodi ki kpe ke bi ŋabi i yeni.

¹³ Bi doagidi bi tuona yaa n pia i fe nani mi ñincianma ñinguona n lengidi ki lu ti ñinpunpudi li boanjaali po maama yeni. Bi go tie nani yaa ŋmabila n yaadi yeni. U Tienu bili bipo ke bi kaanu baa ye li biigicianli nni hali yaa yogunu kuli po.

¹⁴ Li go tie bani yaa po ke Enoka yua n den tie nifiima lele ki cili hali Adama kani, den pua sawali ki yedi: «Diidi ki le, o Diedo kpendi leni o *nigagidiŋanba tudatuda bam.

¹⁵ O baa jia ti buudi leni bi niba kuli, ki cuo yaaba n yie o kuli kelima ban yie o ki tieni yaala yaa po. O go cuo ti *tuonbiadi danba yaaba n yie o yeni, kelima ban sugidi o yaa sugidi yaa po kuli.»

¹⁶ Laa niba tie yaaba n yenbidi, yaaba yaa pala n biidi bi yema po. Bi ŋua bi gbanandi bonbuakaala, ki maadi mi japaamaama, ki banbidi bi niba ke ban baa bikani li baali.

I tundijuodike

¹⁷ Ama yinba n buakaaba, yin yaa tiani mani ti Diedo Jesu Kilisiti tondiba n den tuodi ki waani yi yaama.

¹⁸ Bi den tua yi: «Mi juodima yogunu li ñuali danba baa ye, yaaba n ŋua bi gbanandi bonbuakaala, ki yie U Tienu.»

¹⁹ Laa niba tie yaaba n tiendi yi siiga nni mi paadima, ki ŋua bi gbanandi bonbuaka-biadila kaa pia U Tienu Fuoma.

²⁰ Ama yinba n buakaaba, yin yaa suagi liiga yi dandanli yaali n gagidi ki ŋani boncianla nni, ki yaa jaandi leni o U Tienu Fuoma Yua yaa paalu.

²¹ Yin yaa kubi mani yi yula U Tienu buama nni, ki gu ti Diedo Jesu Kilisiti n pa yi yaa miali n kan gbeni kelima o niñingbadima po.

²² Yin yaa gba mani mi niñima bi nitianba yaaba yaa yama n bangi po.

²³ Yin faabi ba ki lobidi ba mi fantama nni. Yin yaa gba nitoaba po yaa niñima n kali leni i jeje, ki nan yaa nani baa bi tiayiekaadi, ban den joagini yaadi leni bi gbanandi bonbuakaala.

Ti pagidi U Tienu po

²⁴ U Tienu fidi ki kubi yi ke yin da tuudi ki baa, ki go sieni yi o kpiagidi nintuali ke yi naa pia ban baa fidi ki kuli yi leni yaala, leni li pamancianli.

²⁵ Wani U Tienu bebe yua n tie ti Candaano, kelima Jesu Kilisiti yua n tie ti Diedo po, n yaa baadi ti kpiagidi, ti jigidi, u paaciamu leni li bali, yaa yogunu n pendi, moala leni yaa yogunu kuli! Amina!