Josue 9 - Gourmanchéma Bible

¹ Yaa diema n ye Judana nintuali, lani n tie yaa diema n ye a juana nni, leni yaama n ye ku joaloangu nni, leni yaama n baali mi ñincianma ki tandi ki gedi hali Libani diema, yaa badiba kuli den gbadi Ayi dogu bolinma laabaali. Lanwani bani Heta yaaba, Amola yaaba, Kanana yaaba, Felesa yaaba, Hefa yaaba, leni Jebusa yaaba yaa batieba yeni

² kuli den taani ñoabu ki bua ki tuogi Josue leni Isalele yaaba kuli bu toabu.

³ Gabaono dogu yaaba moko den gbadi Josue n den soani Jeliko leni Ayi yaa tuona.

⁴ Bi den tieni u fanu ki bogini mi sancenjiema ki tuni bi ŋunbi a kpalipacala leni yaa dayuadi n cadi ke bi goa ki ŋaŋali.

⁵ Bi den pili ban kpakpa yaa cacaakpela, ki lani a tiacala. Bi dupen den kuodi ke li gunbili kua o.

⁶ Bi den gedi Josue kani ke o ye Giligali po li nagili nni ki yedi wani leni Isalele yaaba kuli: «Ti ñani hali yaa diema n foagi. Ti mia yin kuani o *ŋantaado leni ti ki loli ku danligu leni ti.»

⁷ Isalele yaaba den goa ki yedi ba: «Li fidi ke yi ye yaa kaanu n ki foagi leni ti. Ti baa ga lede ki loli ku danligu leni yi?»

⁸ Bi den goa ki yedi Josue: «Ti tie a naacenba.» O den yedi ba: «Yi tie ŋmenbe? Yi ñani le?»

⁹ Bi den goa ki yedi o: «Tinba a naacenba ñani hali yaa diema n foagi boncianla ki cua kelima ti gbadi ke bi maadi a Tienu, Li Miali Diedo maama. Ti gbadi wan den tieni Ejipiti nni yaala kuli,

¹⁰ leni wan den soani Amola yaaba badiliediba yaaba n ye Judana puoli maama, lani n tie Hesiboni bado Sihoni, leni Basana yaa bado Ogi yua n den ye Asitaloti.

¹¹ Lanwani ti nikpela leni ti diema yaaba kuli den yedi ke tin bogini mi jiema li sancenli po, ki fii ki cua ki tuogi yi, ki tua yi naacenba, ki mia yin loli leni ti ku danligu.

¹² Diidi mani ki le ti dupen. Tin den taa o ki ñani ti diema nni ki kpendi ne, o da den li tuone. Moala o kuodi ki cabidicabidi.

¹³ Yaa dayuadi n tie na, ti den gbieni ti ke ti tie bonpandi, yi laa tin papadi maama. Ti tiadi leni ti cacaadi kuli cadi kelima tin cuoni yaa bancianli po.»

¹⁴ Isalele yaaba den tuo ki ga Gabaono yaaba yeni sancenjiema ki naa mia Li Miali Diedo wan doagidi bipo ban baa tieni maama.

¹⁵ Josue den dagini leni ba ki loli ku danligu leni ba ki yedi ke o kan kpa ba. Isalele yaaba yudanba den poli ke li baa yaa tie yeni.

¹⁶ Ban den loli laa danligu ke dana taa pendi, Isalele yaaba den gbadi ke bi tie bi kuantalieba ki ye bi siiga.

¹⁷ Isalele yaaba den cuoni ki pundi bi dogi li dataali. Bi dogi den tie Gabaono, Kefila, Beeloti leni Kilijati-Jealima.

¹⁸ Baa den kpa ba kelima bani Isalele yaaba yudanba den taa bi Tienu Li Miali Diedo yeli ki poli ke bi kan kpa ba. Ama Isalele yaaba kuli den yenbidi yenbidi bi yudanba po.

¹⁹ Bi yudanba den yedi ba: «Ti kan fidi ki sii ba kelima ti den taa tinba Isalele yaaba Tienu, Li Miali Diedo yeli ki poli.

²⁰ Ti kan kpa ba, ke U Tienu pali n da fii tipo, kelima tin den poli yaa poli po. Ama, diidi tin baa tieni ba maama:

²¹ Tin cedi mani ban yaa ye, ama bi baa yaa pe tipo ti daadi, ki go yaa yii tipo mi ñima.»

²² Josue den yini Gabaono yaaba yeni ki yedi ba: «Be n teni ke yi boandi ti ki yedi ke yi ñani hali foagima, ja yi nan ye ti siiga?

²³ Moala yi ye leni ti solindi, yi kan ña ti yonbidi nni, yi baa yaa pe ti daadi, ki yii mi ñima n Tienu diegu po.»

²⁴ Bi den goa ki yedi Josue: «Yaala n teni ke ti tieni laa bonla tie ke ti den gbadi ke Li Miali Diedo a Tienu den teni o naacemo Musa li ñoabonli ke wan pa yi mi naa diema kuli yin diedi ma, ki go bolini mi niba kuli ban da ye yi siiga. Lane yi cuama teni ke ti jie hali boncianla ti miana po.

²⁵ Moala ti ye a nuu nni, tieni ti nani ŋan sua ke li pundi maama.»

²⁶ Josue den tieni nani lan den bili maama, ki ga ba Isalele yaaba nuu nni ke baa kpa ba.

²⁷ Ama hali laa daali o den bili ke bi baa yaa pe ti daadi, ki yii mi ñima li nitaanli po leni Li Miali Diedo*padibinbinli po, wani U Tienu n baa gandi naani. Bi tiendi yeni hali dinla.