Josue 8 - Gourmanchéma Bible

¹ Li Miali Diedo den yedi Josue: «Ŋan da jie, da teni lan wudi a gbanu. Ŋan taa bi toatieba kuli yin gedi ki ban baa Ayi dogu. Diidi, n baa teni a Ayi bado leni o diema kuli a nuu nni.

² Ŋan tieni laa dogu leni u bado nani ŋan den tieni Jeliko leni u yaa bado maama. Bonyenla bebe, yin taa mani u bonpiakaala leni u yandi yi yula po lan tua ti fagidi. Ŋan teni toatietianba n wuoni u dogu puoli po.»

³ Josue den fii leni bi toatieba kuli ki baa gedi ki ban baa Ayi. O den gandi jakoanda tudapiitaa (30 000) ki soani ba ku ñiagu

⁴ ki teni ba yaa ñoabonli n tie na: «Yin ban wuoni mani u dogu puoli po. Yin da foagidi mani leni u dogu boncianla, ki bogini ki yaa guu.

⁵ Mini leni yaa niba n ye leni nni kuli baa nagini u dogu. U dogu yaaba yaa ñani ki baa tuogi leni ti, ti baa lebidi ki sani nani mi kpiama yeni.

⁶ Bi baa ŋoadi ki deli ti hali ki foagidi leni u dogu, kelima bi baa yedi: ‹Isalele yaaba sani nani mi kpiama yeni.›

⁷ Lanyogunu yin fii ki ña yi wuonkaanu ki baa u dogu, kelima Li Miali Diedo yi Tienu baa taa u ki teni yi nuu nni.

⁸ Yi yaa paadi u dogu yeni yaa yogunu, yin juu u mani ki tieni nani U Tienu n bili maama. Min teni yaa ñoabonli n yeni.»

⁹ Josue den soani ba ke bi fii ki gedi ki ban wuoni ki guu. Betela leni Ayi siiga, Ayi puoli po. Josue den dua yaa toatieba n sieni siiga laa ñiagu.

¹⁰ Josue den fii ku tiŋapanpangu ki goandi o toatiecaga. Wani leni Isalele nikpela kuli den kua bi liiga ke bi gedi ki baan baa Ayi.

¹¹ Yaa toatieba n den ye leni o kuli den gedi ki nagini u dogu. Ban den kuli Ayi yaa yogunu, bi den kpa bi toanagili jienu po. Ku joaloangu den poa bani leni u dogu siiga.

¹² Josue den taa jaba tudamuu (5 000) ki soani ba ke bi ban wuoni ki kuu Ayi puoli, Ayi leni Betela siiga.

¹³ Bi toatieba den kpa bi toanagicianli u dogu jienu po, ke bi naa toatieba mo ban wuo u dogu puoli po. Laa ñiagu Josue den duani ku joaloangu nni.

¹⁴ Ku tiŋapanpangu, Ayi bado n den laa lani, wani leni u dogu yaaba kuli den jaligi ki ñani ki gedi, ki baan tuogi leni Isalele yaaba bu toabu ban den kpa tuogi leni ba naani, Judana tialu nni. Waa den bani ke bi toatieba wuo u dogu puoli po ki guu.

¹⁵ Josue leni Isalele yaaba kuli den tieni nani Ayi yaaba paadi ba yeni ki sani ki teli mi fanpienma po.

¹⁶ Bi den taani yaa jaba n sieni u dogu nni kuli ke bi ñani ki ŋoadi ki deli ba. Josue leni Isalele yaaba den tiini ke bi ŋua hali ki ban foagidi leni u dogu.

¹⁷ Baa jayendo naa den sieni Ayi dogu nni. Bikuli den ñani ki ŋoadi ki deli Isalele yaaba ki ŋa u dogu ke u bilinciamu buliñoabu yaa.

¹⁸ Li Miali Diedo den yedi Josue: «Tandi a kpaanli ki tegini Ayi, kelima moala n baa teni a u.» Josue den tandi o kpaanli ki tegini Ayi.

¹⁹ Wan den tandi o nuu yaa yogunu, yaa jaba n den wuo yeni den jaligi ki ñani bi wuonkaanu nni ki kua u dogu nni ki baa u ki juu u.

²⁰ Ayi yaaba n den gbegi ki diidi bi puoli po, bi den laa ke i muñii ña u dogu nni ki do hali tanpoli. Baa den pia ban baa fidi ki sani ki gedi naani ki ciadi kelima ban den ŋua ki deli Isalele yaaba yaaba den lebidi ki tuogi leni ba.

²¹ Josue leni Isalele yaaba kuli n den laa ke yaaba n wuo yeni baa u dogu ke u muñii fii ki do, bi den lebidi ki tuogi leni Ayi yaaba.

²² Isalele yaaba yaaba n den juu u dogu yeni mo den ñani u dogu nni ki tuogi leni ba ke bani Isalele yaaba den taani ki lindi ki cebini Ayi yaaba i kaani kuli ki ku ba. Baa den ŋa baa niyendo ke o fo, oba ki den sani ki cia.

²³ Bi den cuo Ayi bado bebe ki gedini o Josue kani.

²⁴ Isalele yaaba den kpa bi yibalinba ban den ŋoadi ki deli ba ki kua yaa fanpienma nni. Li yaa puoli Isalele yaaba den lebidi ki guani Ayi nni ki kpa yaaba n sieni lienni kuli.

²⁵ Laa daali bi den kpa Ayi yaaba kuli, bi jaba leni bi puoba. Bikuli den tie piiga n niba tudalie (12 000).

²⁶ Josue den tiani o kpaanli ki tiegi Ayi hali Isalele yaaba n ban bolini laa dogu yaaba kuli ki gbeni.

²⁷ Isalele yaaba den taa bi yula po u dogu bonpiakaala leni u yandi ke li tua ti fagidi nani Li Miali Diedo n den waani Josue maama.

²⁸ Josue den juu Ayi ki teni ke u tua diegbena yaa baa ye hali dinla.

²⁹ O den teni ke bi soadi Ayi bado bu tibu po, ki ŋa o likani hali ku yenjuogu. U yienu n den bua ki baa yaa yogunu, Josue den teni ke bi joandi o ki luni o u dogu bilinciamu buliñoabu kani ki dogini opo tankogicianli. Li ye likani hali dinla.

Josue cogi U Tienu balimaama Ebali juali kani

³⁰ Josue den maa li *padibinbinli Li Miali Diedo, Isalele yaaba Tienu po Ebali juali yuli po.

³¹ O den maa li nani Li Miali Diedo naacemo Musa n den bili Isalele yaaba po maama, nani lan diani wani Musa*balimaama tili nni maama. Bi den maa laa padibinbinli leni yaa tana n ki kpiedi, baa den sii ŋa leni kudi. Bi den padi lipo a padijuukaana leni taanyenma pada U Tienu po.

³² Likani Josue den diani a tana po ki togidi Isalele yaaba nintuali Musa n den diani yaa bali maama.

³³ Isalele yaaba leni bi nikpela leni bi yudanba leni bi bujiaba, leni yaaba n den tie nilanba ki ye bi siiga kuli den se Li Miali Diedo *ŋantaadikpaku ganu leni ku jienu, Lefi buolu yaaba bi kopadicianba yaaba n bugi ku kpaku yeni nintuali. Bi niba boagidima den se ki goa Galisima juali po, boagidima mo Ebali juali po, nani Musa n den bili ke ban tieni maama ki gaali Isalele yaaba.

³⁴ Lani yaa puoli Josue den cogi U Tienu bali maama kuli, li seli leni ti solindi kuli nani lan den diani li bali maama tili nni maama.

³⁵ Josue den cogi bipo Musa n den bili yaa ñoabonbilikaana kuli. Waa den ŋa baa mayenma kaa cogi ma Isalele yaaba nitaanli po, bi jaba leni bi puoba leni a bila leni yaa nilanba n den ye bi siiga kuli.