Josue 7 - Gourmanchéma Bible

¹ Isalele yaaba den tudi tudibiadima U Tienu n den kuani ba yaa kuali ki yedi ke ban da taa wan yedi ban bolini yaala yeni niinni. Juda buolu yua Akana den taa ban den baa bolini yaala siiga bonliba. Akana den tie Selaka puoliŋuanu. Selaka den mali Sabidi, ke Sabidi mo mali wani Akana baa Kalima. Akana n den taa yaala n kua yeni ke Li Miali Diedo pali den fii Isalele yaaba po.

² Josue den soani bi jaba ke bi fii Jeliko ki gedi Ayi dogu po yu n ye Betela puoli ki nagi leni Beti-Afeni. O den yedi ba: «Yin gedi mani ki ban goandi laa diema.» Bi den gedi ki ban goandi Ayi.

³ Bi den goa ki cua Josue kani ki yedi o: «Laa tie tiladi ŋan teni bi toatieba kuli n gedi ki ban baa Ayi. Toatieba tudalie (2 000) bi tudataa (3 000) baa dagidi. Ŋan da coagi bi toatieba kuli, kelima Ayi yaaba naa fuu.»

⁴ Lanwani nani toatieba tudataa yeni den fii ki gedi. Ama Ayi yaaba den deli ba ke bi sani.

⁵ Bi den ku Isalele yaaba siiga nani piitaa n niba luoba, ki deli yaaba n sieni ki ñani u dogu bilinciamu buliñoabu kani ki yaa caa hali Sebalima dogu. Ayi yaaba den pua ki yadi ba li juali jiidima. Li den wudi Isalele yaaba gbani ke baa go pia papaali.

⁶ Li paboanli po Josue leni Isalele yaaba nikpela den padi bi tiadi ki wuli bi yula po mi tama. Bi den laabi Li Miali Diedo *ŋantaadikpaku nintuali ki yaa caa hali ku yenjuogu.

⁷ Josue den yedi: «Ŋain, o Diedo Li Miali Diedo, be yaa po ke a duoni ti Judana ki taa ti ki teni ti yibalinba Amola yaaba ki baa bolini ti? Ti yaa den bani ti cedi ki ye nepo yaa boanduoli.

⁸ O Diedo, Isalele yaaba n gbali bi yibalinba ki lebidi ki sani yeni, n baa yedi be?

⁹ Kanana yaaba leni mi diema na yaaba kuli baa gbadi likuli ki lindi ki cebini ti ki bolini ti yela ŋanduna nni. A baa tieni be ki doagidi a yeli kpiagidi?»

¹⁰ Li Miali Diedo den yedi Josue: «Ŋan fii. Be yaa po ke a laabi nande?

¹¹ Isalele yaaba tieni ti *tuonbiadi. Bi miidi min den bili bipo yaa *ŋantaado. Bi taa li bonla min den yedi ban bolini yaala yeni siiga, ki suni la, ki wuoni bi tiadi nni.

¹² Lani yaa po n teni ke Isalele yaaba kan fidi ki tuogi leni bi yibalinba lan gedi kaanu. Bi baa yaa lebidi ki tiini kelima ban taa yaala n den baa bodi yeni teni ke bi kua mi bodima nni. N kan go yaa ye leni yi, yi yaa ñani yaala n baa bodi yeni yi siiga, ki bolini la.

¹³ Ŋan fii ki bogini bi niba ki waani ba ke ban gagidi ki ŋanbi bi yula saala po, kelima mini Li Miali Diedo bi Tienu yedi ba mine: Min den yedi yin bolini yaala yeni li bontianla ye yi siiga. Yi kan fidi ki tuogi leni yi yibalinba lan gedi kaanu, se yi ñani la yi siiga.

¹⁴ Lanwani li yaa fii ki faa, yin nagini mani n nintuali buolubuolu. N yaa cuo yaa buolu, ban nagini diegu diegu. N yaa cuo yaa diegu, gu niba n nagini dansanu dansanu N yaa cuo yaa dansanu, u niba n nagini niyendi yendo.

¹⁵ N yaa cuo yua n taa yaala n den baa bodi yeni, ban juu o, wani leni wan die yaala kuli, kelima o miidi n ŋantaado ki tieni tuoncagindi yinba Isalele yaaba siiga.»

¹⁶ Josue den fii ku tiŋapanpangu ki teni ke Isalele yaaba nagidi U Tienu nintuali buolubuolu. Li den cuo Juda yaa buolu.

¹⁷ O den teni ke Juda buolu nagini diegu diegu, ke li den cuo Selaka yaa diegu. O den teni ke Selaka diegu yaaba nagini dansanu dansanu ke li den cuo Sabidi.

¹⁸ O den teni ke Sabidi dansanu yaaba nagini niyendi yendo ke li den cuo Akana, yua n tie Sabidi bijua Kalima yaa biga. Sabidi mo den tie Juda buolu yua Selaka yaa bijua.

¹⁹ Josue den yedi Akana: «N bijua ŋan kpiagi Isalele yaaba Tienu, Li Miali Diedo ki pagi o, ki waani nni ŋan tieni yaala ki da wuoni nni liba.»

²⁰ Akana den goa ki yedi Josue: «Li tie moamoani ke n tudi Li Miali Diedo Isalele yaaba Tienu po. Min tieni yaala nne:

²¹ N den laa ti fagidi siiga kpaligolikaŋanbu ke bu ñani Mesopotami diema po, leni ŋanjilifa kujapiena kobilie, leni wula bonmunmunli ke li kpiagu pundi kilo boagidima. N den laa lankuli ke n yama kua lienni ke n taa. Likuli wuo tinga nni n gbandieli siiga ke ŋanjilifa ye li tiipo.»

²² Josue den soani bi niba ke bi sani ki gedi li gbandieli po. Ti tiadi yeni kuli den wuo Akana gbandieli nni, ke ŋanjilifa ye tiipo.

²³ Bi den ñani likuli li gbandieli nni ki gedini Josue leni Isalele yaaba kuli po ki bili la Li Miali Diedo nintuali.

²⁴ Josue leni Isalele yaaba kuli den taani ki taa Selaka bijua Akana, leni ŋanjilifa leni bu kpaligolikaabu leni wula bonmunmunli yeni kuli, leni Akana bijaba leni o bisiaba kuli, leni o ne, leni o ŋunbi, leni o pe, leni o gbandieli, leni wan pia yaala kuli, ki gedini Akoli joaloangu po.

²⁵ Josue den yedi Akana: «Be yaa po ke a faligi ti? Li Miali Diedo baa faligi a dinla.» Lani Isalele yaaba kuli den lugidi o a tana ki kpa o. Bi den kpa o niba kuli yeni, ki juu o bonpiakaala kuli.

²⁶ Bi den dogini opo a tana boncianla. Li tankogili yeni baa ye hali dinla. Li tie lani yaa po ke bi yi laa joaloangu Akoli hali dinla. Li yaa puoli U Tienu pali den jiidi.