Josue 6 - Gourmanchéma Bible

¹ Bi den luoni Jeliko bilinciamu buliñoana ki ñaginñagini kelima Isalele yaaba po. Niloba ki den ña, niloba ki den kua.

² Li Miali Diedo den yedi Josue: «Diidi ki le, n teni a Jeliko leni u bado leni u jakoanda kuli a nuu nni.

³ Yin gaani ki lindi mani u dogu, fini leni bi toatieba kuli. Yin gaani mani ki lindi u dogu daali kuli yenma. Yin yaa tiendi yeni hali dana luoba.

⁴ *Kopadicianba lele baa kua yaaba n bugi ku*ŋantaadikpaku liiga ki yaa kubi kakacinba lele ki piebi ki cuoni. Li daleleeli daali yin lindi mani u dogu taalima lele ke bi kopadicianba yeni piebi kakaci.

⁵ Yi yaa gbadi ke bi waagi ki piebi ki kpaani yaa yogunu, bi niba kuli n tiani boncianla. Lanyogunu liga u dogu bilinciamu baa baa ki mumudi. Lanwani bi niba kuli n do ki kua u dogu nni ke yua kuli tiegi o nintuali.»

⁶ Nuni bijua Josue den yini bi kopadicianba ki yedi ba: «Yin taa mani ku ŋantaadikpaku ki bugi. Kopadicianba lele mo n yaa kubi kakacinba lele ki ga ku liiga ki yaa cuoni.»

⁷ O den yedi bi niba kuli. «Yin cuoni mani ki lindi u dogu. Yaa jaba n muubi ti toatiadi n kua ku ŋantaadikpaku liiga ki yaa cuoni.»

⁸ Josue n den maadi leni bi niba ki gbeni, yaa kopadicianba n kubi kakacinba yeni den ga ku ŋantaadikpaku liiga ki cuoni ki piebi.

⁹ Yaa jaba n muubi ti toatiadi den cuoni yaa kopadicianba n piebi kakacinba liiga. Bi naa toatieba den ŋa gu puoli po. Yaaba n den piebi kakacinba yeni den piebi bi cenli nni kuli.

¹⁰ Josue den tuodi ki waani bi niba kuli ke ban yaa ŋmini suo ki da teni ban gbadi bi ñoabu nni. Ban da maadi liba kuli hali wan baa ti waani ba yaa daali ban tiani.

¹¹ Josue den teni ke bi taa Li Miali Diedo ŋantaadikpaku ki bugi ki gaani ki lindi u dogu. Bi den lindi u yenma ki guani ki kua li nagili nni ki duani likani.

¹² Josue den yagidi ki fii. Bi kopadicianba den taa Li Miali Diedo ŋantaadikpaku ki bugi.

¹³ Yaa kopadicianba n kubi kakacinba yeni didi den ga ku ŋantaadikpaku liiga ki cuoni ki piebi. Yaa jaba n muubi ti toatiadi den ga bi liiga ki cuoni. Bi cenli nni kuli bi den piebi kakacinba.

¹⁴ Li dalieli bi den gaani ki lindi u dogu yenma ki guani ki kua bi nagili nni. Bi den tiendi yeni daali kuli hali dana luoba.

¹⁵ Li daleleeli daali bi den yagidi ki fii ki gaani ki lindi u dogu nani ban yen tiendi maama. Bi den lindi taalima lele. Laa daali bebe ke bi den lindi u dogu taalima lele.

¹⁶ Mi taleleedima bi kopadicianba n den piebi kakacinba, Josue den yedi bi niba: «Tiani mani kelima U Tienu puni yi ke yin paadi u dogu.

¹⁷ Yin bolini u mani wuni leni yaala n ye u niinni kuli kelima u tie Li Miali Diedo n die yaala. Ama yin cedi Lahaba leni yaaba n ye leni o o diegu nni kuli, kelima o den wuoni tin den soani yaa tonda.

¹⁸ De yin fangi mani yi yula, oba n da sii yaala n baa bodi yeni siiga liba, kelima yi yaa taa lienni bonliba, yi baa kuani Isalele yaaba nagili fala leni mi bodima nni.

¹⁹ Ŋanjilifa leni wula kuli leni yaa tiadi n tie kumoandi leni yaadi n tie kuboandi kuli baa tua Li Miali Diedo yaala, ki kua o ŋalimankaanu nni.»

²⁰ Bi kopadicianba den piebi kakacinba. Bi niba n den gbadi ke bi piebi yaa yogunu, bi den tiani boncianla ke u dogu bilinciamu den mudi ki baa u kuli. Bi niba kuli den doni ki kua u dogu nni ke yua kuli tiegi o nintuali. Bi den baa u dogu ki fie u,

²¹ ki bolini yaala n ye lienni kuli, bi jaba leni bi puoba, a bila leni a nikpela, i ne leni i pe leni i ŋunbi kuli. Bi den ku bikuli leni mu jugisiemu.

Josue teni ke bi cedi Lahaba leni o diegu yaaba

²² Josue den yedi yaa jaliediba n den goandi mi diema yeni ke ban kua li poconconli Lahaba diegu nni ki ñani o, wani leni o deni yaaba kuli, nani ban den poli ki yedi o ke bi baa tieni maama.

²³ Bi den kua ki ñani Lahaba leni o baa leni o naa, o naataanjaba leni o naataanpola, leni o niba yaaba n sieni kuli. Bi den ñani ba ki gedini ba Isalele yaaba nagili kunu.

²⁴ Lani bi den juu u dogu yeni leni yaala n ye lienni kuli. Bi den taa ŋanjilifa leni wula leni yaa tiadi n tie kumoandi leni kuboandi bebe ki kuani U Tienu kaangadiko ŋalimankaanu nni.

²⁵ Josue den cedi Lahaba leni o baadiegu yaaba leni o kpiiba kuli ke bi fo. Wani Lahaba baa ye Isalele yaaba siiga hali dinla, kelima o den wuoni Josue n den soani yaa tonda ke bi goandi Jeliko.

²⁶ Laa daali Josue den soli yaa solindi n tie na: «Yaa ja n fii ki baa maa Jeliko dogu na kuli, ti solindi n yaa ye leni o. O yaa puu u tanpuuli yaa yogunu, o bijakpelo baa kpe, o yaa sieni u bilinciamu buliñoana yaa yogunu, o bijuogu baa kpe.»

²⁷ U Tienu den ye leni Josue. O yeli den kpedi ki ñani mi diema nni kuli.