Josue 5 - Gourmanchéma Bible

¹ Amola yaaba yaaba n den ye Judana nintuali, leni Kanana yaaba yaaba n den ye mi ñincianma kunu yaa badiba kuli den gbadi ke Li Miali Diedo teni ke Judana kuodi ke Isalele yaaba baa ki duodi. Li den wudi bi gbani boncianla, bi den luo li papaali kelima Isalele yaaba po.

² Laa yogunu Li Miali Diedo den yedi Josue: «Ŋan ŋanbi a tana ŋan tua jugisiemu ki kuani ku caliegu Isalele yaaba yaaba n daa kua po.»

³ Josue den ŋanbi a tana ki kuani Isalele yaaba ku koanciagu ban yini yaa juali ti “Punjuodi” juali kani.

^4-5 Isalele yaaba n den ñani Ejipiti nni, yaa jaba n den pundi ki gedi toabu kuli den kua ku koanciagu. Ama laa nifiima kuli den kpe mi fanpienma nni. Die ban den mali yaa bonjala li sancenli nni ki den kua koanciagu. Li tie lani yaa po yo ke Josue den kuani ba.

⁶ Kelima Isalele yaaba den cuoni mi fanpienma nni bina piinaa hali ke yaa jaba n den ñani Ejipiti nni ki pundi ki gedi toabu ki naa cengi ki tuo Li Miali Diedo maama kuli den kpe. U Tienu den poli ki yie bipo ki waani ba ke o kan teni ban le wan den poli ki niani ke o baa pa bi yaajanba yaa diema, mi naaŋanma leni ti siadi n dua yaa diema nni yeni.

⁷ U Tienu den teni ke bi bila n ga bi kaanu ki kua mi diema nni. Josue den kuani bani bi bila yene ku koanciagu kelima baa den kuani ba koanciagu li sancenli nni.

⁸ Ban den kuani Isalele yaaba kuli ku koanciagu ki gbeni, bi den ye li nagili nni hali ban ban paagi.

⁹ Li Miali Diedo den yedi Josue: «Dinla n ñani yipo Ejipiti fe.» Lani yaa po bi den yini laa kaanu Giligali. Likani baa yi yene hali dinla.

Isalele yaaba jaani mi Pendima jaanma Giligali kani

¹⁰ Isalele yaaba n den ye bi nagili nni Giligali yeni, den jaani mi *Pendima jaanma o ŋmaalo piiga n danaali daali ku yenjuogu, lankani, Jeliko tialu nni.

¹¹ Mi Pendima jaanma daali yaa fiifaama, bi den dini Kanana diema jiema. Bi den taa mi diema kpaangu ki ŋanbi yaa dupen n kaa pia *dabinli leni i disagidi ki dini laa daali.

¹² Isalele yaaba n den dini mi diema jiema yeni, *mana yua n den ña tanpoli ki baali yeni den sedi kaa go baali. Baa go den baadi mana, bi den di Kanana diema yaa jieme laa binli.

Josue maadi leni Li Miali Diedo toagoli yudaano

¹³ Dayenli Josue den kuu leni Jeliko dogu. O den yaadi ki noanli o liiga ki sua ke o ja se o nintuali ki noadi ki jugisiega ki muubi. Josue den nagini o ki yedi o: «A tie ti yaa po yua bi, bi ti yibalinba yaa po yua yo?»

¹⁴ O den goa ki yedi o: «Mii tie bi siiga oba. N tie Li Miali Diedo toagoli yudaano yo. N pundi moala nne.» Lani Josue den labini ki pugi o ki yedi: «N daano, a bua ki puogi mini a naacemo be?»

¹⁵ Li Miali Diedo toagoli yudaano den yedi Josue: «Ŋan piti a cacaadi kelima ŋan se yaa kaanu yeni gagidi U Tienu po.» Josue den tieni wan yedi yaala.