Josue 4 - Gourmanchéma Bible

¹ Isalele yaaba kuli n den duodi Judana ki gbeni, Li Miali Diedo den yedi Josue:

² «Yin gandi Isalele yaaba buoli siiga piiga n jaba lie, buolu kuli siiga jayendo

³ ki waani ba ke ban goa ki kua ki ban taa piiga n tana lie Judana siiga, bi kopadicianba n se naani yeni. Ban taa ŋa ki ña ki ban bili yin baa duani naani.»

⁴ Josue den yini wan den gandi Isalele yaaba siiga yaa piiga n jaliediba yeni,

⁵ ki yedi ba: «Yin kua mani Judana siiga, Li Miali Diedo yi Tienu *ŋantaadikpaku nintuali kani, nilo kuli n taa tanyenliyenli, lan taani ki tua piiga n tana lie, Isalele yaaba buoli coali n de maama.

⁶ Laa tana baa yaa tiadi yi yaala n tieni Judana ne. Dayenli yi bila yaa ti buali yi laa tana n bua ki yedi yipo yaala,

⁷ yin waani ba ke U Tienu ŋantaadikpaku n den pundi Judana yaa yogunu, Judana ñima den jia gu nintuali. Gun den bua ki duodi, mi ñima den jia. Laa tana baa yaa tie Isalele yaaba po bontiadikaala hali yaa yogunu kuli.»

⁸ Bi piiga n niliediba yeni den tieni Josue n den yedi ba yaala. Bi den taa piiga n tana lie Judana siiga ke a coali de leni Isalele yaaba buoli n de maama, nani Li Miali Diedo n den waani Josue maama. Bi den taa ŋa ki gedini ŋa ki bili ban den baa dua naani.

⁹ Josue mo den sieni piiga n tana lie Judana siiga, yaa kopadicianba n den bugi ku ŋantaadikpaku n den se naani. A baa ye likani hali dinla.

¹⁰ Yaa kopadicianba n den bugi ku ŋantaadikpaku den se Judana siiga hali bi niba n ban tieni ki gbeni Li Miali Diedo n den waani Josue wan yedi ba yaala. Li den tieni nani Musa n den waani Josue maama. Ku niligu den jaligi ki duodi.

¹¹ Bi niba kuli n den duodi ki gbeni, bi kopadicianba den duodi leni ku ŋantaadikpaku ki ga ku niligu liiga.

¹² Lubena buolu yaaba leni Gada buolu yaaba leni Manase buolu yu n tie boagidima den taa bi toatiadi ki ga Isalele yaaba yaaba n sieni liiga, ki duodi nani Musa n den yedi ba maama.

¹³ Yaa jaba n den taa bi toatiadi ki bogini bu toabu po den bua ki pundi niba tudapiinaa (40 000). Bi den duodi Judana, Li Miali Diedo nintuali ki pundi Jeliko tialu nni.

¹⁴ Laa daali Li Miali Diedo den kpiagi Josue Isalele yaaba nintuali ke bi den fangi o hali o miali banlu kuli nani ban den fangi Musa maama.

¹⁵ Li Miali Diedo den yedi Josue:

¹⁶ «Ŋan waani yaa kopadicianba n bugi ku ŋantaadikpaku ban ña Judana nni.»

¹⁷ Josue den waani ba ke ban ña.

¹⁸ Yaa kopadicianba n bugi ku ŋantaadikpaku n den ñani Judana nni yaa yogunu ke bi taana ŋma li boanjaali, Judana ñima go den guani mi kaanu ki gbie ki yayadi i kaani kuli nani man den kpa yadi maama.

¹⁹ Ku niligu den duodi Judana li binli ŋmakpialo yaa danpiiga daali ki kpa bi nagili Giligali dogu kani Jeliko puoli.

²⁰ Josue den sieni Giligali ban den ñani Judana nni yaa piiga n tanlieda.

²¹ O den yedi Isalele yaaba: «Saala po yi bila yaa ti buali yi yaa tana n tie na n bua ki yedi yaala,

²² yin togidi ba li fuuli ki waani ba Isalele yaaba n den duodi Judana taakuoma maama.

²³ Kelima Li Miali Diedo yi Tienu den teni ke Judana kuodi ke yikuli den baa ki duodi nani wan den tieni mi ñincianmoanma maama ke ti den baa ki duodi.

²⁴ O den tieni yeni ke ŋanduna nibuoli kuli n bandi ke wani Li Miali Diedo paalu yaba, ke yimo n yaa fangi o yaa yogunu kuli.»