Josue 3 - Gourmanchéma Bible

¹ Josue den yagidi ki fii ki ñani Sitimi dogu, wani leni Isalele yaaba kuli. Bi den pundi Judana ki jiidi likani ki baa yuandi ki duodi.

² Dana taa n den pendi, bi yudanba den gaani li nagili nni kuli

³ ki yedi bi niba kuli: «Yi yaa laa ke bi kopadicianba, bani Lefi buolu yaaba, taa Li Miali Diedo yi Tienu *ŋantaadikpaku ki bugi, yin fii mani ki ña yin ye naani ki ŋoadi gu.

⁴ Gu baa waani yi yin baa tagini yaa sanu, kelima yi daa kpa tagini laa sanu. Ama yinba leni kuni siiga baa yaa pia yaa banli n pundi kilodajenbiyenga. Yin da nagini gu.»

⁵ Josue de yedi ku niligu: «Yin gagidi ki ŋanbi mani yi yula kelima saala U Tienu baa tieni yi siiga mi bancianma.»

⁶ Josue den yedi bi kopadicianba: «Yin taa mani U Tienu ŋantaadikpaku ki bugi ki ga ku niligu liiga ki yaa cuoni.» Bi den taa gu ki bugi ki ga ku niligu liiga ki cuoni.

⁷ Li Miali Diedo den yedi Josue: «Dinla n baa cili ki kpiagi a Isalele yaaba kuli n le ki bandi ke n ye leni a nani min den ye leni Musa maama.

⁸ Ŋan waani yaa kopadicianba n bugi ku ŋantaadikpaku ke bi yaa li pundi ki kua mi ñima nni yaa yogunu ban sedi u ñinkunu.»

⁹ Josue den yedi Isalele yaaba: «Nagini mani ne ki cengi Li Miali Diedo yi Tienu ñoabona.

¹⁰ Yaala n baa teni yin bandi ke U Tienu yua n fo ye yi siiga, ke o baa deli yipo Kanana yaaba, Heta yaaba, Hefa yaaba, Felesa yaaba, Giligasa yaaba, Amola yaaba leni Jebusa yaaba tie line:

¹¹ Bi baa bugi wani ki tinga kuli Diedo ŋantaadikpaku gun kua yi liiga Judana ñima nni.

¹² Moala yin gandi mani piiga n niba lie yinba Isalele buolu yaaba siiga, lani n tie buolu kuli niyendo.

¹³ Yaa kopadicianba n bugi ku ŋantaadikpaku yeni taana yaa sii Judana ñima yaa yogunu, mi ñima baa jia. Yaa ñima n ña ganu po ki kpendi yeni baa sedi nani li goanli yeni.»

¹⁴ Ku niligu den ñani bi gbandiena nni ki baa duodi Judana. Yaa kopadicianba n bugi ku ŋantaadikpaku den ga bi liiga ki cuoni.

¹⁵ Li den tie u jetaagu yogunu, Judana ñima n yen gbie ki yayadi ki kua a boanjaana nni yaa yogunu. Yaa kopadicianba n den bugi ku ŋantaadikpaku n den pundi Judana ke bi taana sii mi ñima,

¹⁶ yaa ñima n ña ganu po ki kpendi den sedi nani li goanli yeni hali foagima ki nagi leni Adama dogu ki ku leni Saditani dogu. Yaa ñima n tiini ki caa jienu po, Alaba yaa ñincianma yaama n caa mi ñincianyaama po, den jia cain. Lani ku niligu den duodi ki tiegi Jeliko.

¹⁷ Yaa kopadicianba n den bugi ku ŋantaadikpaku den se u kpenkuomu siiga ke Isalele yaaba kuli do Judana taakuoma. Bi den se lienni hali bi niba kuli n ban do ki gbeni.