Josue 24 - Gourmanchéma Bible

¹ Josue den taani Isalele yaaba buolu kuli Sikema dogu nni. O den yini bi nikpela, bi yudanba, bi bujiaba leni bi koanbala. Bi den cua U Tienu nintuali.

² Josue den yedi bi niba kuli mine: «Li Miali Diedo, Isalele yaaba Tienu yedi: ‹Hali hali yogu yi yaajanba, lani n tie Abalahama leni Nahola baa Tela diegu yaaba, den kaa u kpenciamu Yufilata duoli ki ŋua i *buli.

³ Mini U Tienu den ñani yi yaaja Abalahama Yufilata duoli ki teni ke o gaangaani Kanana diema nni kuli. N den puni o i puoliŋuani boncianla. N den puni o Isaaka,

⁴ ki puni Isaaka mo Jakobo leni Esayu. N den puni Esayu yaa diema n pia a juana ki yi Seyili, ke o diedi ma ki kali lienni. Ama Jakobo leni o bijaba wani den gedi Ejipiti po.

⁵ N den ti soani Musa leni Alono ki luni Ejipiti yaaba fala buoli boncianla, ki yuandi ki ñani yi buolu yaaba likani.

⁶ Yi yaajanba n den ñani Ejipiti nni ki ban pundi mi ñincianma kani. Ejipiti yaaba den fii leni bi tandanba leni bi toateliti ki ŋoadi hali ki ban pundi mi ñincianmoanma kani.

⁷ Lanwani yi yaajanba den mua ki mia mini Li Miali Diedo ke n den teni ke li *biigili tieni yi buolu yaaba leni Ejipiti yaaba siiga. N den teni ke mi ñincianma guani ki milini ba. Yi bani bonŋanla min den soani Ejipiti yaaba maama. Li yaa puoli yi buolu yaaba den waagi ki ye mi fanpienma nni.

⁸ Lani n pendi n den gobidi ki gedini yi Amola yaaba diema nni, yaaba n den kaa Judana duoli. Bi den tuogi leni yi bu toabu, ama n den teni ke yi paadi ba. Yi den diedi bi diema kelima n den bolini ba yipo.

⁹ Moabi diema bado *Balaaka, Tisipoli bijua, moko den fii ki tuogi leni yi bu toabu. O den soani ke bi ban yini Beola bijua *Balaama ke wan cua ki soli yi.

¹⁰ Ama mii den bua ki cengi Balaama. Lanwani o den gaali yi. Yeni, n den faabi yi Balaaka nuu nni.

¹¹ Yi den duodi Judana ki ban pundi Jeliko, Jeliko yaaba den tuogi leni yi bu toabu. Amola yaaba, Felesa yaaba, Kanana yaaba, Heta yaaba, Giligasa yaaba, Hefa yaaba leni Jebusa yaaba moko den tuogi leni yi bu toabu. N den teni ke yi paadi bikuli.

¹² N den teni ke a naalonlonbiada kua yi liiga ki deli Amola yaaba badiliediba. Yi jugisiemu leni yi dabana ki den pia kuli lan tieni yaala lienni.

¹³ Yeni n den puni yi yin ki koni yaa diema, ki puni yi yin ki maa yaa dogi ke yi ye i niinni, ki go puni yi yin ki ŋuu yaa duven tiidi leni *olifie tiidi yi yaa bonluonkaala n tie yipo jiema.› »

Isalele yaaba gandi ke bi baa yaa ŋua U Tienu

¹⁴ Lanwani Josue go den yedi ba: «Moala yin fangi mani Li Miali Diedo ki yaa ŋua o leni i moamoani leni yaa yantiali n ki pia janbi. Yin ñani mani yi siiga yi yaajanba n den ŋua yaa buli Yufilata kpenciamu duoli po, leni Ejipiti po, ki yaa ŋua Li Miali Diedo.

¹⁵ Yi yaa bua ki yaa ŋua Li Miali Diedo, yin gandi mani dinla yin bua ki yaa ŋua yua, li yaa tie yi yaajanba n den ŋua yaa buli Yufilata duoli po yo, bi li yaa ko tie Amola yaaba, yin ye yaaba yaa diema nni, n ŋua yaa buli yo. Mini leni n diegu yaaba wani, ti baa yaa ŋua Li Miali Diedo yo.»

¹⁶ Isalele yaaba den goa ki yedi: «U Tienu ñ luoni tipo tin ŋa Li Miali Diedo yaa ŋoadima ki ŋoadi bontoala,

¹⁷ kelima Li Miali Diedo ti Tienu n den ñani ti ti yonbidi nni Ejipiti diema nni, tinba leni ti yaajanba. Wani n den kubi ti ti sancenli nni kuli leni tin den poandi yaa nibuoli kuli siiga.

¹⁸ O den deli tipo i nibuoli kuli leni Amola yaaba yaaba n den kpa ye mi naa diema nni. Lani yaa po ti moko baa yaa ŋua wani Li Miali Diedo yo, kelima wani n tie ti Tienu.»

¹⁹ Ama Josue den yedi Isalele yaaba: «Yi kan fidi ki yaa ŋua Li Miali Diedo, kelima o tie U Tienu ki gagidi ki ŋani cain, ki go pia li *nunponli mo. O kan tieni yipo sugili yi yiema leni yi *tuonbiadi kuli po.

²⁰ Yi yaa lebidi ki ŋa o ki ŋoadi bi nilanba buli, o baa lebidi o yama ki tieni yi yaala n bia ki bolini yi, baa ke o den kpa tieni yipo yaala n ŋani.»

²¹ Bi niba kuli den yedi Josue: «Li kan tua yeni, kelima ti baa yaa ŋua Li Miali Diedo lige.»

²² Lane Josue den yedi ba: «Yi tie yi yula po siedi ke yinba yiba n gandi ke yi baa yaa ŋua Li Miali Diedo.» Bi den goa ki yedi o: «Nn, ti tie!»

²³ O go den yedi ba: «Lanwani yin ñani mani bi nilanba buli yi n ye yi siiga, ki ŋanbi ki tabini Li Miali Diedo, Isalele yaaba Tienu, leni yi pala kuli.»

²⁴ Bi niba kuli den yedi Josue: «Ti baa yaa ŋua Li Miali Diedo ti Tienu, ti baa tuo ki yaa tiendi wan yedi yaala.»

²⁵ Laa daali Josue den kuani o *ŋantaado U Tienu leni Isalele yaaba siiga, ki go ŋa bipo a ñoabona leni mi mabilikaama Sikema.

²⁶ Josue den diani laa maama kuli U Tienu *bali maama tili nni. O den taa ku tanciangu ki sieni gu bu ticianbu tinga, yaa kaanu n gagidi Li Miali Diedo po kani.

²⁷ Lani Josue den yedi ku niligu kuli: «Diidi ki le mani, ku tanciangu ne baa yaa tie tipo siedi, kelima gu gbadi Li Miali Diedo n maadi ti yaa maama kuli. Lani yaa po gu baa yaa tie yaa siedi n se ki yie yipo ke yin da yie yi Tienu ki ŋa o ki ŋoadi bontoala.»

²⁸ Lani yaa puoli Josue den cabi ku niligu ke yua kuli lebidi ki kuni wan den baa yaa diema po.

Josue kuuma

²⁹ Lani yaa puoli Nuni bijua Josue, Li Miali Diedo naacemo, den kpe ki pia kobiga n bina piiga.

³⁰ Bi den piini o wan den baa yaa diema yaa niinni, Timinati-Selaki dogu nni, Efilayima juana nni, Gaasi juali jienu po.

³¹ Isalele yaaba den ŋua Li Miali Diedo Josue miali dana banlu kuli, leni yaa nikpela n den laa Li Miali Diedo*ŋanbili Isalele yaaba po ke Josue kpe ki ŋa ba moko yaa miana dana yaa banlu kuli.

³² Isalele yaaba den piini Sikema dogu nni ban den ñani Josefi kpaba yaa Ejipiti nni. Bi den piini a lankani, Jakobo n den da yaa tinga Sikema baa Hamola yaabila kani ki pani yaa ligi n yi kesita bonba piiga. Laa tinga den tua Josefi buolu yaaba yaa tinga.

³³ Alono bijua Eleyasala moko den kpe ke bi piini o Gibeya nni, ban den puni o bijua Finea yaa dogu ke u ye Efilayima juana nni.