Josue 23 - Gourmanchéma Bible

¹ Li Miali Diedo den ga Isalele yaaba yaa yibalinba n den lindi ba kuli kani, ki teni ke bi fuodi ke li waagi. Josue den podi boncianla.

² Lanwani Josue den yini ki taani Isalele yaaba kuli, bi nikpela, bi buoli yudanba, bi bujiaba leni bi koanbala, ki yedi ba: «N podi hali boncianla.

³ Yi laa Li Miali Diedo yi Tienu n soani mi diema ne niba maama kelima yipo, kelima wani oba n den koani yipo.

⁴ Diidi mani, n toani tiatia ki boagidi ki teni yi buoli yaa nibuoli n sieni ke ti daa paadi i yaa diema, leni min den kpa bolini yaa nibuoli kuli yaa diema, ki cili Judana ki yaa caa hali mi ñincianma Meditelane po, nintuali po.

⁵ Li Miali Diedo yi Tienu baa deli ba yipo, ki teni bi yaa laa yi ban sani. Yi baa diedi bi diema nani wan den niani yi maama.

⁶ Ama yin moandi mani bonŋanla ki tuo ki yaa ŋua yaala n diani Musa *balimaama tili nni kuli ki tiendi man yedi yaala. Yin da jadi ki ŋa ma baa waamu.

⁷ Yin da taani leni yaa nibuoli n sieni ki ye yi siiga ne. Yin da taa bi *buli yela, yin da taa bi yela ki poli mo, yin da ŋoadi ba mani, yin da gbaani ki kpiagi ba.

⁸ Ama yin yaa taabi mani Li Miali Diedo yi Tienu nani yin tieni maama ki pundi hali dinla.

⁹ Li Miali Diedo deli yipo yaa nibuoli n yaba ki go pia u fidu boncianla, hali moala niloba kuli ki fidi ki tuogi leni yi ke li gedi kaanu.

¹⁰ Yi siiga niyendo den yen deli niba tudili kelima Li Miali Diedo yi Tienu den koani yipo, nani wan den yedi yi maama.

¹¹ Lanwani yin fangi mani yi yula ki yaa bua Li Miali Diedo yi Tienu.

¹² Yi yaa yaadi ki ŋa o ki taani leni yaa nibuoli n sieni ki ye yi siiga, yinba leni bani yaa taani yiyaba, yi yaa pia i ŋantaadi leni ba,

¹³ yin bandi cain ke Li Miali Diedo yi Tienu kan go deli laa nibuoli yipo. Ama bi baa yaa tie yipo nani ku diagu leni u taalu yeni, bi baa waani yi fala nani i fibi n baa yaa pua yi puolisiiga, bi nani i konkoni n baa yaa ye yi nuni nni maama yeni. Li baa yaa ŋua yeni hali ke yi siiga oba kan sieni Li Miali Diedo yi Tienu n puni yi yaa dieŋanma ne niinni, yi baa bodi.

¹⁴ Diidi ki le mani, moala n dana tuoni. Yin bandi mani leni yi pala kuli leni yi yantiana kuli ke Li Miali Diedo yi Tienu n den niani yi yaa ñoanianŋami kuli baa yendu ki tua mafanma, laa ñoaniani kuli kua cain.

¹⁵ To, nani Li Miali Diedo yi Tienu n den niani yi yaa ñoanianŋami kuli n kua maama, wan maadi yipo yaa mabiadima kuli moko baa tieni yene. O baa bolini yi cain, yi siiga oba kan sieni wan puni yi yaa dieŋanma ne niinni.

¹⁶ Yi yaa miidi Li Miali Diedo yi Tienu n bili yipo yaa*ŋantaado, yi yaa ŋoadi i nilanbuoli n ŋua yaa buli ki gbaani ki kpiagi yi, Li Miali Diedo pali baa fii yipo, yi baa bodi tontoni, yi siiga oba kan sieni wan puni yi yaa dieŋanma ne niinni.»