Josue 22 - Gourmanchéma Bible

¹ Lanwani Josue den yini Lubena buolu yaaba, Gada buolu yaaba leni Manase buolu yaaba boagidima

² ki yedi ba: «Yi tuo ki ŋoadi Li Miali Diedo naacemo Musa n den bili yipo yaa ñoabona kuli, ki go tieni n mo n yedi yi yaala kuli.

³ Lan waagi ki pundi hali yaa bianu nne kuli yii ŋa yi lieba, yeni n doagidi ke yi tuo ki kubi Li Miali Diedo yi Tienu ñoabona.

⁴ Moala Li Miali Diedo yi Tienu puni yi lieba ke bi baa ki kali bi diema nni nani wan den niani ba maama. Lanwani yi di baa fidi ki lebidi ki guani yi denpo. Yin guani ki ban kali Li Miali Diedo naacemo Musa n den boagidi ki teni yi yaa diema nni, Judana puoli po.

⁵ Yin faami ki tuo ki yaa ŋua Li Miali Diedo naacemo Musa n den soagini yi yaa *balimaama be. Lani n tie yin yaa bua Li Miali Diedo yi Tienu, ki tuo ki yaa tiendi wan bua yaala, ki yaa kubi o ñoamabona, ki yaa taabi o ki tuuni opo leni yi pala kuli, leni yi yantiana kuli.»

⁶ Li yaa puoli Josue den gaali ba ki cabi ba,

^7-8 ki yedi: «Yin taa mani yin baa yaa piacianma: I yankuli, ŋanjilifa, wula, ti kumoandi, ti kuboandi leni ti tiayiekaadi kuli boncianla ki kuni. Yin ban boagidi leni yi lieba laa fagidi, tini yin fie yaadi yi yibalinba kani.» Musa den teni Manase buolu yaaba boagidima ki tinga Basana nni, Judana puoli po. Josue den teni mi boagidiliema mo ki tinga Judana kpenu nintuali nani wan den teni yaa buoli n sieni maama.

⁹ Lubena buolu yaaba, Gada buolu yaaba leni Manase buolu yaaba den lebidi ki kuni bi denpo. Bi den ŋa Isalele yaaba yaaba n sieni Silo, Kanana diema nni. Bi den guani Galaadi yaa diema nni, ban den baa yaama nani Li Miali Diedo n den wani Musa maama.

Yaa buoli n ye Judana boanduoli maa li padibinbinli

¹⁰ Lubena buolu yaaba, Gada buolu yaaba leni Manase buolu yaaba boagidima n den pundi Judana kpenu kani ki da ye Kanana diema nni, bi den maa yaa *padibinbinli n yaba boncianla ki kuu u kpenu.

¹¹ Isalele yaaba kuli den gbadi ke bi niba tua: «Diidi, Lubena buolu yaaba, Gada buolu yaaba leni Manase buolu yaaba boagidima maa padibinbinli Judana kani, ki goa Isalele yaaba po, Kanana diema nni.»

¹² Isalele yaaba n den gbadi laa laabaali, bikuli den taani Silo kani ki baa gedi ki ban baa ba.

¹³ Isalele yaaba den soani o kopadiciamo Eleyasala bijua Finea, Galaadi diema nni wan ban maadi leni ba.

¹⁴ Bi den teni ke yudanba piiga, buolu kuli yudanyendo, yegi leni o. Bikuli den tie diedanbe Isalele yaaba siiga.

¹⁵ Bi den gedi Lubena buolu yaaba, Gada buolu yaaba leni Manase buolu yaaba boagidima kani Galaadi diema nni ki caa ba Isalele yaaba yaaba n sieni tondu ki yedi:

¹⁶ «Yin tieni yaa tudibiadima Isalele yaaba Tienu po ne mo bua ki yedi be? Be yaa po ke moala yi yaadi ki ŋa Li Miali Diedo ki maa yi yaa padibinbinli ki fiini Li Miali Diedo po mi yiema?

¹⁷ Peyoli po ti den kpa tieni *tuonbiadi yaadi yaa panpaani n baa jagi tipo baa ke Li Miali Diedo den teni ke laa yogunu o falabiado jiidi o niba po. Lani daa dagidi?

¹⁸ Ña yi didi go yaadi ki ŋa Li Miali Diedo? Yi yaa fiini Li Miali Diedo po mi yiema dinla, saala o pabienli baa jiidi Isalele yaaba kuli yula poe.

¹⁹ Yi yaa nua ke yi diema *joagini kaa dagidi Li Miali Diedo po, yin goa ki kua wan die yaa diema nni, o yekaanu n ye naani. Yin goa ki kua ki baa mu tinmu ti siiga. Ama yin da fiini yiema Li Miali Diedo po leni tinba yaa po ki kandi ki ŋa Li Miali Diedo ti Tienu padibinbinli ki go maa bontoali.

²⁰ Sedaka puoliŋuanu Akana n den tudi tudibiadima U Tienu n den kuani ba yaa kuali ki yedi ke ban da taa wan yedi ban bolini yaala yeni niinni, Li Miali Diedo pabienli ki den cuo Isalele yaaba kuli ka te? Wani Akana bebe ka den bodi o tudima yeni po.»

²¹ Lubena buolu yaaba, Gada buolu yaaba leni Manase buolu yaaba boagidima den goa ki yedi Isalele buolu yaaba yaaba n sieni yudanba yeni line:

²² «U Tienu, U Tienu, Li Miali Diedo, U Tienu, U Tienu wani Li Miali Diedo bani yaala yaa po ke ti tieni yeni. Isalele yaaba kuli moko baa bandi la. Li yaa tie ke ti fiini yieme, bi ke ti tieni tudibiadime Li Miali Diedo po, wan da cedi tin yaa ye.

²³ Li yaa tie ke ti maa ti padibinbinceli ki bua ki yaadi ki ŋa Li Miali Diedo ki yaa padi lipo a padijuukaana bi ki yaa kpendinni bu paabu U Tienu po, bi ki yaa padi i jaandi yaa pada, U Tienu wani oba n cuo ti u cuonbiadu.

²⁴ Laa tie yeni ka ba. Ama ti tieni yeni kelima ti jie saala po, yi yaabila n da yedi ti yaa yaabila: ‹Be yaa*ŋantaado n ye yinba leni Li Miali Diedo, Isalele yaaba Tienu siiga?

²⁵ Li Miali Diedo wani oba poani Judana ke u tie u bianu tinba leni yinba Lubena buolu yaaba leni Gada buolu yaaba siiga, yii pia ŋantaadoba kuli leni U Tienu.› To, yeni mo, yi yaabila baa teni ke ti yaa yaabila kan go yaa kpiagidi Li Miali Diedo.

²⁶ Lani yaa po yo ke ti jagi ki maa li naa padibinbinli. Ama laa tie ke ti baa yaa padi lipo a padijuukaana bi paditoana ka.

²⁷ Tin bua yaala bebe tie ke li naa padibinbinli n tua siedi tinba leni yinba leni ti yaabila leni yi yaa yaabila kuli po ke ti pia u sanu ki kpiagi Li Miali Diedo leni ti padijuukaana, sugili pada leni i jaandi yaa pada. Yeni yi yaabila kan fidi ki yedi ti yaa yaabila ke baa pia ŋantaadoba leni Li Miali Diedo.

²⁸ Ti yedi ti yama nni ke bi yaa ti faa ki maadi tinba, bi ti yaabila laa maama, ti baa fidi ki goa ki yedi ba: ‹Diidi mani ti yaajanba den maa yaa padibinbinli n tie na ki nandi li leni Li Miali Diedo padibinbinli. Die baa den maa li ki baa yaa padi lipo padijuukaana, bi paditoana ka, ama ke lin yaa tie siedi tinba leni yinba siiga.›

²⁹ Lanwani tii tia ke tin fiini yiema Li Miali Diedo po, bi ki yaadi ki ŋa o ki maa padibinbinli ki yaa padi lipo a padijuukaana bi ki yaa kpendinni likani bu paabu bi ki yaa padi paditoana ka. Tii bua ki padi potogu kaa tie Li Miali Diedo padibinbinli yaali n ye o yekaanu nintuali po.»

³⁰ O kopadiciamo Finea, leni Isalele yaaba yudanba leni bi diedanba n den gbadi Lubena buolu yaaba, Gada buolu yaaba leni Manase buolu yaaba n yedi yaala, bi pala den mangi.

³¹ O kopadiciamo Eleyasala bijua Finea den yedi ba: «Moala ti bandi ke Li Miali Diedo ye leni ti, kelima yii tudi opo nani tin bi tama ke yi tudi yaa tudibiadima. Lanwani yi kan kuani Isalele yaaba Li Miali Diedo cuonbiadu nni.»

³² Li yaa puoli o kopadiciamo Eleyasala bijua Finea leni Isalele yaaba yudanba den cabi Lubena buolu yaaba leni Gada buolu yaaba, ki lebidi. Bi den ñani Galaadi diema nni ki guani Kanana yaa diema nni ki togidi Isalele yaaba yaaba n sieni ban ban laa bine ke bi yedi yaala.

³³ Bi moko yaa pala den mangi. Bi den tuondi U Tienu. Baa go den maadi ke bi baa gedi ki ban baa Lubena buolu yaaba leni Gada buolu yaaba ki bolini bi diema.

³⁴ Lubena buolu yaaba leni Gada buolu yaaba den yedi: «Li naa padibinbinli tie tipo siedi ke Li Miali Diedo tie U Tienu.» Lanwani bi den yini li “Siedi.”