Josue 21 - Gourmanchéma Bible

¹ Lefi buolu yaaba yudanba den cua ki laa o kopadiciamo Eleyasala leni Nuni bijua Josue leni Isalele yaaba yudanba,

² ban den ye Silo, Kanana diema nni, ki yedi ba: «Li Miali Diedo den teni Musa li ñoabonli ke ban teni ti i dogi tin baa yaa ye naani leni laa dogi gaanma ti yandi n yaa kpaa.»

³ Lanwani Isalele yaaba den baa ban gandi bi diema nni yaa dogi leni i gaanma ki teni Lefi buolu yaaba nani Li Miali Diedo n den yedi maama.

⁴ Bi den toani tiatia ke Lefi bijua Kehati puoliŋuani baa u biinkpialu. Bi go den toani tiatia ke bi siiga o kopadiciamo Alono yaa yaabila baa piiga n dogi taa ke yi ye Juda buolu yaaba leni Simeyono buolu yaaba leni Benjamina buolu yaaba diema nni.

⁵ Kehati puoliŋuani yaaba n sieni den baa dogi piiga ke yi ye Efilayima buolu yaaba diema nni leni Dana buolu yaaba diema nni leni Manase buolu yaaba boagidima yaaba n ye Judana nintuali po yaa diema nni.

⁶ Bi go den toani tiatia ke Gelisoni yaa puoliŋuani mo baa piiga n dogi taa Isakala buolu yaaba diema nni leni Asela buolu yaaba diema nni leni Nefitali buolu yaaba diema nni leni Manase buolu yaaba boagidima yaaba n kaa Basana nni yaa diema nni.

⁷ Melali yaa puoliŋuani den baa piiga n dogi lie ke yi ye Lubena buolu yaaba diema nni leni Gada buolu yaaba diema nni leni Sabulono buolu yaaba yaa diema nni.

⁸ Isalele yaaba den toani tiatia ki tenteni Lefi buolu yaaba laa dogi leni i gaanma, nani Li Miali Diedo n den yedi Musa maama.

⁹ Diidi ban den toani tiatia ki teni ba Juda buolu yaaba diema nni leni Simeyono buolu yaaba yaa diema nni yaa dogi.

¹⁰ Lefi bijua Kehati puoliŋuani, Alono yaabila, n den ga laa dogi kelima bani n den baa u biinkpialu.

¹¹ Bi den teni ba Kilijati-Aliba dogu lani n tie Aliba dogu. Aliba yeni n den tie Anaka baa. Bi go yi laa dogu Ebiloni. U den ye Juda buolu yaaba juali nni. Bi den teni ba laa dogu leni u gaanma.

¹² Ama li den sua ke bi teni Jefune bijua Kalebi u dogu yeni n den die yaa kuani leni yaa tinkundogi wani yo.

¹³ Ebiloni yeni den tie i wuonkaani dogi yaa niinni doyendu. O kopadiciamo Alono yaabila n den baa yaa dogi ki pugidi laa dogu po den tie Libina,

¹⁴ Jatili, Esitemoa,

¹⁵ Holono, Debili,

¹⁶ Ayini, Juta leni Beti-Semesi. Likuli den taani ki tie dogi yia leni i gaanma, ki ye Juda leni Simeyono buolu yaaba diema nni.

¹⁷ Benjamina buolu yaaba yaa diema nni mo, bi den baa Gabaono, Geba,

¹⁸ Anatoti leni Alimoni. Likuli tie dogi naa leni i gaanma.

¹⁹ Bi kopadicianba, Alono yaabila yeni, n den baa yaa dogi kuli den taani ki tie piiga n dogi taa leni i gaanma.

²⁰ Ban go den toani tiatia, Kehati puoliŋuani yaaba yaaba n sieni den baa Efilayima buolu yaaba diema nni yaa dogi n tie na:

²¹ Sikema, yu n den tie wuonkaanu ki ye li juali nni, Geseli,

²² Kibiti-Sayimi leni Beti-Holoni. Likuli den tie dogi naa leni i gaanma.

²³ Dana buolu yaaba yaa diema nni bi go den baa dogi naa leni i gaanma: Eliteke, Gibetoni,

²⁴ Ayalona leni Gati-Limoni.

²⁵ Manase buolu yaaba boagidima yaaba n den kaa nintuali po yaa diema nni mo, bi den baa dogi lie leni i gaanma: Taanaki leni Gati-Limoni.

²⁶ Lanwani ban den baa yaa dogi kuli den taani ki tie dogi piiga leni i gaanma.

²⁷ Lefi bijua Gelisoni yaa puoliŋuani den baa dogi lie leni i gaanma Manase buolu yaaba boagidima yaaba n den kaa puoli po yaa diema nni. Lani n tie Basana nni Golani dogu yu n den tie i wuonkaani dogi yeni niinni doyendu, leni Beesitila dogu.

²⁸ Isakala buolu yaaba diema nni, bi den baa dogi naa leni i gaanma: Kisijoni, Dabilati,

²⁹ Jalimuti leni Eni-Ganimi.

³⁰ Asela buolu yaaba diema nni bi go den baa dogi naa leni i gaanma: Misekayeli, Abidoni,

³¹ Helikati leni Lehobi.

³² Nefitali buolu yaaba yaa diema nni mo bi den baa dogi taa leni i gaanma. Lani n tie Kedesi, yu n den tie i wuonkaani dogi siiga doyendu ki ye *Galile nni, Hamoti-Dodi leni Kaditani.

³³ Bani Gelisoni puoliŋuani yeni n den baa yaa dogi kuli den taani ki tie piiga n dogi taa leni i gaanma.

³⁴ Lefi buolu yaaba yaaba n den sieni ki tie Melali puoliŋuani den baa dogi naa leni i gaanma Sabulono buolu yaaba diema nni. Lani n tie Jokineyami, Kadita,

³⁵ Limina leni Nahalali.

³⁶ Lubena buolu yaaba diema nni bi den baa dogi naa leni i gaanma. Lani n tie Betisedi, Jaatisa,

³⁷ Kedemoti leni Mefaati.

³⁸ Gada buolu yaaba yaa diema nni mo, bi den baa dogi naa leni i gaanma. Lani n tie Lamoti dogu ki ye Galaadi nni ki tie i wuonkaani dogi siiga doyendu, Mahanayima, Hesiboni,

³⁹ leni Jayesedi.

⁴⁰ Ban den toani tiatia, Lefi buolu yaaba, yaaba n den tie Melali puoliŋuani, n den baa yaa dogi kuli den tie piiga n dogi lie.

⁴¹ Lefi buolu yaaba n den baa Isalele yaaba diema nni yaa dogi kukuli den taani ki tie piinaa n dogi nii.

⁴² Bi den teni ba dogu kuli leni u gaanma.

⁴³ Li Miali Diedo den teni Isalele yaaba wan den niani ke o baa pa bi yaajanba yaa diema kukuli. Bi den diedi ma ki kali mi niinni.

⁴⁴ Li Miali Diedo den puni ba mi yanduanma bi diema gaanma kuli nani wan den niani bi yaajanba moko maama. O den teni ke bi paadi bi yibalinba kuli, ke bi siiga oba kuli ki den fidi ki tuogi leni ba ke li gedi kaanu.

⁴⁵ Yeni Li Miali Diedo n den niani Isalele yaaba yaa ñoaniani kuli den kua. Baa yendu ki den tua mafanma.