Josue 20 - Gourmanchéma Bible

¹ Li Miali Diedo den yedi Josue:

² «Ŋan waani Isalele yaaba ke ban gandi yaa dogi n baa yaa tie i wuonkaani, nani min den waani Musa maama.

³ Li yaa tua jalibu ke nilo kpa o lielo kaa bua, o baa fidi ki sani ki ban wuoni laa dogi siiga doyendu nni, ki faabi leni yua n baa tu o kpiemo po li panli.

⁴ Yua n kpa o nilo yeni yaa ban pundi u dogu yeni buliñoabu kani, ban kadi mi maama naani yeni, o baa sedi ki togidi likani nikpela yaala n tieni. Bani mo baa cedi wan kua u dogu nni ban baa kaanu ki teni wan yaa ye.

⁵ Yua n baa tu li panli yeni yaa ŋoadi o hali u dogu yeni kani, a nikpela yeni kan ñani yua n kpa o nilo yeni ki teni o, kelima waa bua ka ki kpa o, laa tie ke o bi nani o ka.

⁶ O baa yaa ye u dogu yeni niinni hali likani nitaanli yaa jia o buudi leni hali yua n tie bi kopadicianba bado yeni yaa kpe. Li yaa puoli o baa fidi ki goa ki kuni o denpo, wan den ñani yaa dogu nni ki sani yeni.»

⁷ Isalele yaaba den gandi Kedesi dogu yu n ye *Galile nni, Nefitali juali nni, leni Sikema dogu yu n ye Efilayima juali nni, leni Kilijati-Aliba dogu yaaka Ebiloni yu n ye Juda juali nni.

⁸ Judana boanduoli, Jeliko puoli po mo, bi den gandi Betisedi yu n ye u tialu fanpienma nni, Lubena buolu yaaba diema nni, ki go gandi Lamoti yu n ye Galaadi nni, Gada buolu yaaba diema nni, leni Golani dogu yu n ye Basana nni, Manase buolu yaaba yaa diema nni.

⁹ Bi den gandi laa dogi ke yin tua i wuonkaani Isalele yaaba po leni yaa nilanba n ye bi siiga po. Yeni, yua n kpa nilo kaa bua, baa sani ki kua lienni ki cia yua n baa tu li panli, ban da kpa o ke li nitaanli daa jia o buudi.