Josue 19 - Gourmanchéma Bible

¹ Ban den toani tiatia, Simeyono buolu yaaba n den ga u biinlielu. Bi diema den ye Juda buolu yaaba yaa diema siiga.

² Yaa dogi n den ye bi diema nni den tie Beli-Seba, Seba, Molada,

³ Hatisali-Suali, Bala, Atisema,

⁴ Elitoladi, Betuli, Holima,

⁵ Tisikilagi, Beti-Malikaboti, Hatisadi-Susa,

⁶ Beti-Lebaoti leni Saduseni. Likuli den tie piiga n dogi taa leni i tinkundogi.

⁷ Li go den pia Ayini, Limoni, Etedi leni Asana, dogi naa leni i tinkundogi,

⁸ ki taani leni yaa tinkundogi n ye laa gaanma, ki yaa caa hali Baalati-Beli dogu yu n go tie niganu yaa Lamati. Likuli den tie Simeyono buolu yaaba yaa biinu.

⁹ Bi den ñani Juda buolu yaaba yaa diema nne Simeyono buolu yaaba yaa biinu, kelima Juda buolu yaaba n den baa yaa diema den yaba ki kandi bipo. Lani yaa po yo ke Simeyono buolu yaaba diema den ye bani Juda buolu yaaba yaa yaama siiga.

Sabulono buolu yaaba n baa yaa diema

¹⁰ Ban den toani tiatia, Sabulono buolu yaaba n den ga u biintaalu. Bi diema den tandi ganu po ki ban pundi hali Sadidi dogu.

¹¹ U bianu den ñani lankani ki teli nintuali po ki ban pundi Madeyala dogu, ki pendi ki ñani Dabeseti dogu, ki ban dagini yaa kpenu n puubi Jokineyami dogu puoli.

¹² U den ñani Sadidi ki gondi ki teli puoli ki ban pundi hali Kisiloti-Talidi dogu bianu. U den tagini ki ñani Dabilati dogu ki ban gedi hali Jafia dogu.

¹³ U den suagi ki go teli puoli ki ban ñani Ita-Katisini ki gedi Gita-Hefedi. U den ban dagini Limoni dogu, ki pegidi ki cubini Neya dogu.

¹⁴ Nijienu po u bianu den ligini Hanatoni dogu ki ban tuoni Jifita-Eli joaloangu.

¹⁵ Mi diema yeni den pia piiga n dogi lie leni i tinkundogi. Yaa dogi n tie na den tie laa dogi siiga i tiami: Katati, Nahalali, Simidoni, Jideyala leni Betelema.

¹⁶ Laa dogi kuli den ye ban toani tiatia ke Sabulono buolu yaaba baa yaa diema yaa niinni.

Isakala buolu yaaba n baa yaa diema

¹⁷ Ban den toani tiatia, Isakala buolu yaaba n den baa u biinnaalu.

¹⁸ Yaa dogi n den ye bi diema nni den tie Jisileeli, Kesuloti, Sunemi,

¹⁹ Hafadayima, Sioni, Anahadati,

²⁰ Labiti, Kisijoni, Abetisi,

²¹ Demeti, Eni-Ganimi, Eni-Hada leni Beti-Patisetisi.

²² U bianu den tagini ki ñani Taboli, Sasatisima, Beti-Semesi ki ban juodi Judana kani. Bi diema den pia piiga n dogi luoba leni i tinkundogi.

²³ Laa dogi kuli den ye ban toani tiatia ke Isakala buolu yaaba baa yaa diema yaa niinni.

Asela buolu yaaba n baa yaa diema

²⁴ Ban den toani tiatia, Asela buolu yaaba n den baa u biinmuulu.

²⁵ Yaa dogi n den ye bi diema nni den tie Helikati, Hali, Beteni, Akesafi,

²⁶ Alameleki, Ameyadi leni Misali. Nintuali po u bianu ŋoadi Siholi-Libinati kpenu ki gedi ki ban tuoni Kalimeli juali.

²⁷ Puoli po u den teli Beti-Dagoni dogu ki ban pundi Sabulono buolu yaaba diema leni Jifita-Eli joaloangu nni. U den pegidi ki teli nijienu po ki ban tuoni Beti-Emeki leni Neyieli. U den ŋoadi yeni ki ban cua ki ñani yaa dogi n tie na: Kabuli,

²⁸ Ebiloni, Lehobi, Hamoni leni Kana, ki ban dagini Sidoni u dociamu.

²⁹ Lankani u bianu den gondi ki teli Lama dogu leni ban maa i bilinciami ki lindi Tili dogu yu. U den suagi ki teli Hosa dogu, ki cua ki ñani Mahalabi, Akisibi,

³⁰ Uma, Afeka leni Lehobi, ki ban juodi Meditelane ñincianma kani. Mi diema dogi kuli den taani ki tie piilie n dogi lie leni i tinkundogi.

³¹ Laa dogi kuli den ye ban toani tiatia ke Asela buolu yaaba baa yaa diema yaa niinni.

Nefitali buolu yaaba n baa yaa diema

³² Ban den toani tiatia, Nefitali buolu yaaba n den baa u biinluobilu.

³³ Niganu po bi diema bianu den cili Helefi dogu leni Tisaananimi dogu ticianbu seni kani, ki cua ki ñani Adama-Nekebi leni Jabineeli ki gedi Lakumi dogu, ki ban dagini Judana.

³⁴ Nintuali po u bianu den pegidi ki teli Asinoti-Tabodi, ki cua ki pendi u ki gedi Hukoki dogu. Ganu po u den balini Sabulono buolu yaaba diema, nintuali po mo, u den balini Asela buolu yaaba yaa diema. Puoli po Judana kpenu n den tie u bianu.

³⁵ Yaa dogi n den pia i bilinciami ke i maa ki lindi den tie: Tisidimi, Tiseli, Hamati, Lakadi, Kineleti,

³⁶ Adama, Lama, Hasoli,

³⁷ Kedesi, Edileyi, Eni-Hatisodi,

³⁸ Jileyoni, Migidali-Eli, Holemi, Beti-Anati leni Beti-Semesi. Likuli den tie piiga n dogi yia leni i tinkundogi.

³⁹ Laa dogi kuli den ye ban toani tiatia ke Nefitali buolu yaaba baa yaa diema yaa niinni.

Dana buolu yaaba n baa yaa diema

⁴⁰ Ban den toani tiatia, Dana buolu yaaba n den baa u biinleleelu.

⁴¹ Yaa dogi n den ye bi diema nni den tie Tisolea, Esitaoli, Idi-Semesi,

⁴² Saalabini, Ayalona, Jitila,

⁴³ Elona, Timinati, Ekiloni,

⁴⁴ Eliteke, Gibetoni, Baalati,

⁴⁵ Jehudi, Bene-Bedaki, Gati-Limoni,

⁴⁶ Me-Jadikoni leni Lakoni, leni yaa tinga n lindi Jafa dogu.

⁴⁷ Dana buolu yaaba diema, den ŋmadi ba ke bi gedi ki ban baa Lesemi dogu ki paadi u. Bi den kpa u niba ki diedi u cain ki kali lankani. Bi den taa bi yaaja Dana yeli ki yini u dogu yeni Dana.

⁴⁸ Laa dogi kuli den ye ban toani tiatia ke Dana buolu yaaba baa yaa diema yaa niinni.

Bi teni Josue Timinati-Selaki dogu

⁴⁹ Isalele yaaba n den boagidi mi diema ki gbeni, bi den teni Josue u biinu bi diema nni.

⁵⁰ Bi den ŋoadi Li Miali Diedo ñoabonli ki teni Josue wan mia yaa dogu, lani n tie Timinati-Selaki dogu ki ye Efilayima juana nni. Josue den goa ki maa u ki kali lankani.

⁵¹ Lani n tie o kopadiciamo Eleyasala leni Nuni bijua Josue leni Isalele yaaba yudanba n den toani tiatia ki boagidiboagidi yaa biini. Bi den ye Silo dogu nni, Li Miali Diedo nintuali, u *Kadikaanu gbandieli buliñoabu kani ki boagidiboagidi. Lani, bi den boagidi mi diema ki gbeni.