Josue 18 - Gourmanchéma Bible

¹ Isalele yaaba n den paadi mi diema, bikuli den taani Silo dogu nni ki tii likani u *Kadikaanu gbandieli.

² Bi siiga buoli lele n den sieni kaa baa tinmu.

³ Lanwani Josue den yedi ba: «Yi baa guudi hali u laa yogunu ki diedi Li Miali Diedo yi baanba Tienu n puni yi yaa diema?

⁴ Yin gandi buolu nni kuli jaba taa. N baa soani ba ban gaani ki goandi mi diema, ki diidi bonŋanla ban bua yaala n tua bi buolu tinga, ki diani gan tietie maama ki goa ki waani nni.

⁵ Bi baa boagidi mi diema kaani lele. Juda buolu yaaba baa yaa ye bi yaa diema nni niganu po, Josefi yaa puoliŋuani mo n yaa ye bi yaa diema nni nijienu po.

⁶ Yin diani i kaanleleedi yeni n tietie maama ki bibili yi biani ki goa ki waani nni. Lani, n baa toa tiatia Li Miali Diedo ti Tienu nintuali ki teni buolu kuli u biinu.

⁷ Lefi buolu yaaba kan baa yi siiga biinu, kelima bi yaa biinu tie ban yaa tuuni Li Miali Diedo po ki padi a pada. Gada buolu yaaba, Lubena buolu yaaba leni Manase buolu yaaba boagidima mo baa bi yaa biini Judana boanduoli no. Li Miali Diedo naacemo Musa wani oba n den boagidi ki teni ba.»

⁸ Ban den gandi yaa jaba ke ban gedi ki ban goandi mi diema n den bogini ki baa gedi, Josue den teni ba yaa ñoabonli n tie na: «Gedi mani ki ban gaani mi diema yeni niinni, ki ŋanbi ki diidi ma bonŋanla, ki goa ki waani nni man tietie maama. Lanwani n baa toa tiatia Silo ne Li Miali Diedo nintuali, ki boagidi ki teni yua kuli o biinu.»

⁹ Bi jaba yeni den gedi ki ban gaani mi diema nni kuli. Bi den diani ki boagidiboagidi ma kaani lele, ki waaniwaani kaanu kuli n tietie maama leni yaa dogi n yeye lienni. Li yaa puoli bi den goa ki cua Silo, Josue kani li nagili nni.

¹⁰ Josue den toani bipo tiatia Silo yeni Li Miali Diedo nintuali ki boagidi mi diema bani Isalele yaaba siiga. O den teni buolu kuli yaaba bi biinu.

Benjamina buolu yaaba n baa yaa diema

¹¹ Ban den toani tiatia, Benjamina buolu yaaba n den kpa ga bi yaa biinu. Ban den baa yaa diema den ye Juda buolu yaaba diema leni Josefi puoliŋuani yaa diema siiga.

¹² Nijienu po bi diema bianu den cili Judana kpenu kani. U den tagini Jeliko dogu jienu po, ki pendi ki poandi a juana nni ki teli nintuali po ki ban dagini Beti-Afeni fanpienma.

¹³ U bianu den ñani lankani ki teli Lusi dogu, ki ban cua ki ñani Lusi dogu yu n go yi Betela yeni ganu po. U den poandi yaa juali n ye jiidima yaa Beti-Holoni ganu po ki gedi Ataloti-Adali.

¹⁴ Li juali yeni nintuali po, u bianu den gondi ki teli niganu po ki ban tuoni Kilijati-Baali dogu yaaka Kilijati-Jealima ki tie Juda buolu yaaba yaa dogu. U bianu n den tagini maama nintuali po n yeni.

¹⁵ Niganu po u bianu den ñani Kilijati-Jealima ki pendi ki teli nintuali po ki ban dagini Nefitoa ñinbuna kani.

¹⁶ U den ñani lankani ki jiidi ki ban pundi yaa juali n kaagi Hinomi joaloangu ki ye Kefayima yaaba yaa joaloangu jienu po. U den bali Hinomi joaloangu, Jebusa yaaba juaga ganu po, ki jiidi ki ban pundi hali Eni-Logeli ñinbunli kani.

¹⁷ U den gondi ki teli jienu po, Eni-Semesi dogu po, ki suagi ki pundi Geliloti ki tiegi Adumini gbangbanli. U den jiidi ki pundi Lubena bijua Bohana Tanli,

¹⁸ ki poandi Judana tialu nni ki tagi yaa juali n ye u tialu yeni niinni jienu po.

¹⁹ U den suagi ki ñani Beti-Hogila dogu jienu po ki ban dagini mi ñincianyaama n juodi naani nijienu po, Judana kpenu n cua ki kua lienni naani. U bianu n den tagini maama niganu po n yeni.

²⁰ Puoli po, Judana kpenu n den tie u bianu. Lani n tie Benjamina buolu yaaba n den baa yaa diema biani.

²¹ Benjamina buolu yaaba n den die yaa dogi n tie na: Jeliko, Beti-Hogila, Emeki-Ketisitisi,

²² Beti-Alaba, Tisemalayimi, Betela,

²³ Afimi, Pada, Ofili,

²⁴ Kefadi-Amoniyi, Ofini leni Geba. Likuli tie piiga n dogi lie leni i tinkundogi.

²⁵ Li go den pia Gabaono, Lama, Beeloti,

²⁶ Mitisipa, Kefila, Motisa,

²⁷ Dekemi, Jidipeeli, Tadeyala,

²⁸ Tisela, Elefi, Jebusa, lani n tie Jelusalema, Gibeyati leni Kilijati, piiga n dogi naa leni i tinkundogi. Likuli den tie Benjamina buolu yaaba yaa biinu.