Josue 17 - Gourmanchéma Bible

¹ Bi den toani tiatia ki teni Manase buolu yaaba moko bi yaa biinu kelima Manase den tie Josefi bijakpelo. Li den sua ke bi teni Manase bijakpelo Makili, Galaadi baa Galaadi diema leni Basana Judana boanduoli no, kelima o den tie jakoando.

² Bi den toani tiatia ki teni Manase buolu yaaba yaaba n sieni mo bi yaa biini. Li den tie Josefi bijua Manase bijaba Abieseli, Heleki, Asilieli, Sikema, Hefeli, leni Semida.

³ Tiselofadi ki den pia bonjaga. Wani Tiselofadi yeni den tie Hefeli bijua, ke Hefeli mo tie Galaadi bijua, Galaadi mo n yaa tie Manase bijua Makili yaa biga. Waa den pia bonjaga, ama o den pia a bonpola. Bi den yi Mala, Noa, Hogila, Milika leni Tilitisa.

⁴ Bi den gedi ki laa o kopadiciamo Eleyasala leni Nuni bijua Josue leni Isalele yaaba yudanba ki yedi ba: «Li Miali Diedo den waani Musa ke wan boagidi ki teni timo ti yaa biinu ti buolu yaaba siiga.» Bi den teni ba bi yaa biinu bi baa naataanjaba siiga.

⁵ Lanwani Manase buolu yaaba den baa biinpiiga kaa taa leni Galaadi leni Basana diema yaama n ye Judana boanduoli.

⁶ Kelima baa den teni Manase buolu yaaba bi jaba bebe ka mu tinmu, bi den teni bi puoba moko, ke Galaadi yaa diema mo tie Manase buolu yaaba yaaba n sieni yaa biinu.

⁷ Manase buolu yaaba diema banlu den ñani Asela dogu ki yaa caa hali Mikimetati dogu ki ye Sikema dogu puoli. U den ñani Mikimetati yeni ki teli niganu ki ban dagini Eni-Tapua dogu yaaba kani.

⁸ Tapua dogu den ye Manase buolu yaaba diema bianu kani. Bani Manase buolu yaaba n den die u gaanma tinga. Ama Efilayima n den die u dogu wuni uba wani.

⁹ U bianu den gedi ki ban tuoni Kana kpenu niganu yaa jaali kani. Die yaa dogi n den ye u kpenu ganu po den tie Efilayima buolu yaaba yaa dogi baa ke i den ye Manase buolu yaaba yaa diema nni. U bianu den ñani lankani ki gedi u kpenu jienu po ki pendi ki ban dagini Meditelane ñincianma.

¹⁰ Yeni, Efilayima buolu yaaba den die niganu po, Manase buolu yaaba mo n yaa die nijienu po. Meditelane ñincianma n den tie bi bianu nintuali po. Asela buolu yaaba den ye Manase buolu yaaba jienu ki kpigi ki goa nintuali po, Isakala buolu yaaba mo n yaa ye bi jienu ki kpigi ki goa puoli po.

¹¹ Isakala leni Asela buolu yaaba diema nni, Manase buolu yaaba den baa yaa dogi n tie na: Beti-Seyani leni Jibileama leni yin den die yaa dobila, leni Doli, Eni-Doli, Taanaki, Megido leni i niba leni i tinkundogi, lani n tie Dodi gaanma tinbuona.

¹² Ama Manase yaaba yeni ki den fidi ki deli laa dogi niba, lanwani bani Kanana buolu yaaba yeni den suagi ki ye likani.

¹³ Baa Isalele n den ti baa u paalu ki pugini, baa den deli ba, bi den teni ke bi tuuni a tuona leni u paalu.

¹⁴ Josefi puoliŋuani den cua ki yedi Josue: «Be yaa po ke a boagidi ki teni ti biinyendu bebe, tinba yaaba ke Li Miali Diedo seligi ti ki teni ke ti yaba boncianla?»

¹⁵ Josue den yedi ba: «Yi yaa yaba ki sua ke Efilayima juali kan dagidi yi, yin gedi ki ban pedi Felesa yaaba leni Lefayima yaaba fuali ki pugini.»

¹⁶ Josefi puoliŋuani den goa ki yedi: «Li tie moamoani ke li juali kan dagidi ti. Ama Kanana buolu yaaba yaaba n ye i tiali nni leni yaaba n ye Beti-Seyani leni u tinkundogi nni leni yaaba n ye Jisileeli joaloangu nni kuli pia toateliti ke ti tie kudi.»

¹⁷ Josue den yedi Josefi puoliŋuani, lani n tie Efilayima buolu yaaba leni Manase buolu yaaba boagidima yeni: «Yi yaba ki go pia u fidu mo boncianla. Lanwani yi kan baa biinyendu bebe.

¹⁸ Yaa juali n tie fuajali yeni baa tua yi yaa yaala. Yin pedi li ki diedi likani cain. Yi baa fidi ki deli ki ñani Kanana buolu yaaba likani baa ke bi pia yaa toateliti n tie kudi ki go pia u fidu mo.»