Josue 16 - Gourmanchéma Bible

¹ Ban den toani tiatia ke Josefi buolu yaaba baa yaa diema den cili puoli po Judana kpenu kani, Jeliko kulima, Jeliko ñinbuna kani. U bianu den ñani Jeliko ki poandi mi fanpienma nni, ki ban kua Betela juali nni.

² U den ñani lankani ki gedi Lusi dogu, ki ban tagini ki ñani Ataloti, Adika yaaba n ye naani.

³ U den ñani lankani ki jiidi ki teli nintuali, ki goa Jafileti yaaba diema po, ki poandi Beti-Holoni jiidima leni Geseli dogu, ki ban dagini Meditelane.

⁴ Josefi puoliŋuani, lani n tie Manase buolu yaaba leni Efilayima buolu yaaba, den boagidi laa diema bi siiga.

Efilayima buolu yaaba yaa biinu

⁵ Efilayima buolu yaaba n den baa yaa diema bianu den cili puoli po, Ataloti-Adali dogu kani ki yaa caa hali tanpoli yaa Beti-Holoni,

⁶ ki ban dagini Meditelane yaa ñincianma. Nijienu po u den balini Mikimetati dogu ki gondi ki teli puoli Taanati-Silo dogu ki tagini ki ñani Jonoaki dogu.

⁷ U bianu yeni den ñani lankani ki jiidi ki gedi Ataloti leni Naadata ki ñani Jeliko ki ban dagini Judana kpenu.

⁸ U den ñani Tapua ki teli nintuali Kana kpenu po, ki gedi ki dagini Meditelane ñincianma kani. Lani n tie Efilayima buolu yaaba n den baa yaa diema.

⁹ Bi go den pugini ba yaa dociami leni yaa dobila n kukuu ba ki ye Manase buolu yaaba diema nni.

¹⁰ Efilayima buolu yaaba ki den deli Kanana yaaba, yaaba n den ye Geseli dogu nni. Bi baa ye likani Efilayima buolu yaaba siiga hali dinla. Ama Efilayima yaaba den teni ke bi tuuni a tuona leni paalu.