Josue 15 - Gourmanchéma Bible

¹ Ban den toani tiatia ke Juda buolu yaaba baa yaa diema den tandi niganu po ki goa puoli waamu ki ban dagini Edomi bianu. Hali niganu cain den tie Tisini fanpienma.

² Lanwani niganu po bi diema bianu den cili mi ñincianyaama juodima kani, mi ñima n lugi ki tinga naankani.

³ U bianu yeni den cua ki ñani Akilabima gbangbanli kani leni Tisini fanpienma ganu po. Kadesa-Balineya ganu po mo, u den cua ki ñani Hetisiloni kani ki yaa caa Adali dogu, ki ban gondi ki teli Kadika.

⁴ U den suagi ki ñani Atisimoni dogu ki ban caa hali Ejipiti kpenu ki ban tuoni mi ñincianma Meditelane. Lani n tie Juda buolu yaaba banlu niganu po.

⁵ Puoli po mo, bi diema bianu den tie mi ñincianyaama ki yaa caa ki ban dagini hali Judana n cua ki kua laa ñima nni naani. Nintuali po mo u bianu den cili lankani,

⁶ ki taa ki gedi Beti-Hogila dogu, ki ñani Beti-Alaba dogu ki suagi ki pundi hali Lubena bijua Bohana Tanli.

⁷ U den poandi Akoli joaloangu nni ki gedi Debili dogu. Nijienu po, u den gondi ki teli Giligali, Adumini gbangbanli nintuali, u kpenu ganu po. U den bali Eni-Semesi ñima ki ban pundi hali Eni-Logeli.

⁸ U den ñani lankani ki poandi Hinomi joaloangu, Jebusa yaaba juaga jiidima ganu po, Jelusalema dogu n ye naani. U den tagini ki doni yaa juali n ye Hinomi joaloangu nintuali leni Befayima buolu yaaba yaa joaloangu jienu po.

⁹ U den ñani li juali yeni yuli po ki gondi ki teli Nefitoa ñinbuna, ki suagi ki gedi Efilona juali dogi po, ki pendi ki teli Baala dogu yaaka Kilijati-Jealima.

¹⁰ U banlu den ñani lankani ki teli nintuali yaa juali Seyili jiidima ganu po, Kesaloni dogu kani, ki jiidi ki gedi Beti-Semesi, ki ban ña Timina dogu.

¹¹ U den pendi ki teli Ekiloni dogu ganu po, ki gondi ki cubini Sikidoni dogu. U den ñani Baala juali po ki teli Jabineeli, ki gedi ki ban dagini Meditelane ñincianma.

¹² Nintuali po bi diema bianu den tie Meditelane. Lani n tie Juda buolu yaaba n den baa yaa diema biani.

¹³ Jefune bijua Kalebi den baa o biinu Juda buolu yaaba siiga, nani Li Miali Diedo n den yedi Josue maama. Bi den teni o Kilijati-Aliba dogu yu n go tie Ebiloni. Aliba yeni tie Anaka baa.

¹⁴ Kalebi den deli ki ñani Anaka buolu yaaba, lani n tie o yaabitaada Sesayi, Ahimani leni Talimayi puoliŋuani.

¹⁵ O den ñani lankani ki gedi ki ban baa Debili dogu yaaba. Debili den kpa yi Kilijati-Sefedi.

¹⁶ Wani Kalebi den yedi: «Yua n fidi ki paadi Kilijati-Sefedi n baa pa o n bisalo Akisa wan tua o pua.»

¹⁷ Kalebi waalo Kenasa bijua Otinieli den paadi u dogu yeni ke Kalebi puni o o bisalo Akisa ke o tua o pua.

¹⁸ Wan den pundi Otinieli kani, o den tundi wani Otinieli ke wan mia o baa Kalebi u kuanu. Wani Akisa n den pundi o baa kani ki jiidi o ŋunbo po, o baa den buali o wan bua yaala.

¹⁹ O den goa ki yedi o: «N cua miaboe. Pa nni naani n pia a ñinbuna moko kelima ŋan puni nni yaa tinga nijienu po yeni tie tinkuonge, ñima ki ye.» Lanwani Kalebi den puni o yaa ñinbuna n ye naanpo n duobi leni naanpo n jiidi.

²⁰ Lani n tie Juda buolu yaaba n den baa yaa diema ki ŋoadi nani bi diedi n de maama.

²¹ Yaa dogi n den ye Juda buolu yaaba diema nni niganu po ki goa bani leni Edomi u bianu po den tie yaa dogi n tie na: Labitiseli, Edeli, Jagudi,

²² Kina, Dimona, Adada,

²³ Kedesi, Hasoli, Itani,

²⁴ Sifi, Telema, Beyaloti,

²⁵ Hasoli-Hadata, Kilijoti-Hetisiloni yu n go yi Hasoli,

²⁶ Amami, Sema, Molada,

²⁷ Hatisali-Gada, Sesimomi, Beti-Paleti,

²⁸ Hatisali-Suali, Beli-Seba, Bisijotija,

²⁹ Baala, Ijimi, Atisema,

³⁰ Elitoladi, Kesili, Holima,

³¹ Tisikilagi, Madimana, Sansanna,

³² Lebayoti, Silihimi, Ayini, leni Limoni. Likuli taani ki tie piilie n dogi yia leni i tinkundogi.

³³ Yaa dogi n den ye u tialu nni den tie: Esitaoli, Tisolea, Asina,

³⁴ Sanoa, Eni-Ganimi, Tapua, Enami,

³⁵ Jalimuti, Adulama, Soko, Aseka,

³⁶ Saadayimi, Aditayima, Gedela, leni Gedelotayimi. Likuli tie piiga n dogi naa leni i tinkundogi.

³⁷ Li go den pia Tisenani, Hadasa, Migidali-Gada,

³⁸ Dileyani, Mitisipa, Jokiteeli,

³⁹ Lakisi, Botisikati, Egilona,

⁴⁰ Kaboni, Lakimasi, Kitilisi,

⁴¹ Gedeloti, Beti-Dagoni, Naama leni Makeda. Likuli tie piiga n dogi luoba leni i tinkundogi.

⁴² Li go den pia yaa dogi n tie na: Libina, Etedi, Asanai,

⁴³ Jifita, Asina, Netisibi,

⁴⁴ Keyila, Akisibi leni Madesa. Yini mo dogi yia leni i tinkundogi.

⁴⁵ U tialu yeni niinni go den pia Ekiloni leni wun den die yaa dogi leni u tinkundogi,

⁴⁶ leni yaa dociami leni yaa dobila n den lindi Asidodi ki ye Ekiloni leni Meditelane siiga kuli,

⁴⁷ leni Asidodi leni Gasa leni yin den die yaa dociami leni i tinkundogi, ki yaa caa hali Ejipiti kpeni leni Meditelane jaali.

⁴⁸ Yaa dogi n den ye li juali nni den tie Samidi, Jatili, Soko,

⁴⁹ Danna, Kilijati-Sanna yu n go yi Debili,

⁵⁰ Anabi, Esitemo, Anima,

⁵¹ Gosena, Holono, leni Gilo. Likuli taani ki tie piiga n doyendu leni i tinkundogi.

⁵² Li go den pia Alabi, Duma, Eseyani,

⁵³ Janumi, Beti-Tapua, Afeka,

⁵⁴ Humita, Kilijati-Aliba, yu n go yi Ebiloni, leni Tisioli. Likuli den tie dogi yia leni i tinkundogi.

⁵⁵ Li go den pia Mayona, Kalimeli, Sifi, Juta,

⁵⁶ Jisileeli, Jokideyami, Sanoa,

⁵⁷ Kayini, Gibeya, leni Timina. Likuli tie dogi piiga leni i tinkundogi.

⁵⁸ Li go den pia Haluli, Beti-Tisuli, Gedoli,

⁵⁹ Maadati, Beti-Anoti, leni Elitekoni. Likuli tie dogi luoba leni i tinkundogi.

⁶⁰ Li go pia Kilijati-Baali, yu n go yi Kilijati-Jealima leni Laba, dogi lie leni i tinkundogi.

⁶¹ Yaa dogi n den ye mi fanpienma nni den tie Beti-Alaba, Midini, Sekaka,

⁶² Nibisani, Idi-Hamela, leni Eni-Gedi. Likuli tie dogi luoba leni i tinkundogi.

⁶³ Juda buolu yaaba ki den fidi ki deli Jebusa yaaba yaaba n den ye Jelusalema. Lanwani Jebusa yaaba leni Juda buolu yaaba baa ki taa ye Jelusalema dogu nni hali dinla.