Josue 14 - Gourmanchéma Bible

¹ Diidi o kopadiciamo Eleyasala leni Nuni bijua Josue leni Isalele buoli yaaba yudanba n den boagidi Isalele yaaba yaa tinmu Kanana diema nni.

² Bi den toani tiatia ki boagidi ki tenteni yaa boyiadi leni yaa boagidima n sieni bi yaa tinmu, nani Li Miali Diedo n den waani Musa maama.

³ Musa den boagidi ki teni i buoliedi leni boagidima bi yaa biinu Judana duoli po no. Ama waa den teni Lefi buolu yaaba wani biinu.

⁴ Josefi yaabila den boagidi ki tie buoli lie, lani n tie Manase leni Efilayima. Lefi buolu yaaba wani ki den baa tinga mi diema nni. Ban den baa yaala bebe den tie ban baa yaa ye yaa dogi nni leni yaa tinmu n lindi laa dogi bi yandi po.

⁵ Isalele yaaba den boagidi mi diema ki ŋoadi Li Miali Diedo n den waani Musa maama.

Josue teni Kalebi Ebiloni diema

⁶ Dayenli Juda buolu yaaba den nagini Josue kani ban den ye Giligali. Jefune bijua Kalebi, Kenisa buolu yua den yedi wani Josue: «A tiadi Li Miali Diedo n den maadi mini leni fini maama ki yedi o nilo Musa yaala tin den ye Kadesa-Balineya.

⁷ N den pia bina piinaa Li Miali Diedo naacemo Musa n den soani nni ke n ñani Kadesa-Balineya ki ban goandi mi diema. Min den guani n den togidi o ke li tiegi cain tin ban laa yaala.

⁸ Yaaba n den yegi leni nni ki gedi den maadi ki wudi bi niba gbani. Ama mini, n den dugi Li Miali Diedo n Tienu po cain.

⁹ Laa daali Musa den poli ki yedi: ‹;Nan tagini ki goandi yaa fuuli yeni baa tua fini leni a puoli;nuani yaa biinu hali yaa yogunu kuli kelima a dugi Li Miali Diedo U Tienu po.›

¹⁰ Dinla n tie piinaa n bina muu leni Li Miali Diedo n teni Musa laa ñoabonli, Isalele yaaba n den cuoni mi fanpienma nni yaa yogunu. Hali laa yogunu ki taa ki pundi dinla U Tienu teni ke n baa fo nani wan den niani maama. Moala n di pia piinii n bina muu.

¹¹ N baa pa nani min den pa maama, Musa n den soani nni min ban goandi mi diema yaa yogunu. N baa pia u fidu nani lan yogunu yene, ki baa fidi ki tieni bu toabu bi lan tie yaa tuonli kuli.

¹² Lanwani moala ŋan teni nni Li Miali Diedo n den niani li yogunu ke o baa pa nni yaa juali yeni. A den gbadi ke Anaka buolu yaaba ye lienni, ke yaa dociami ke i bilinciami maa ki lindi mo ye lienni. Li Miali Diedo yaa ye leni nni n baa deli ba nani wani oba n den yedi maama.»

¹³ Josue den gaali Jefune bijua Kalebi ki teni o Ebiloni dogu ke u tua o yaa biinu.

¹⁴ Li tie yeni ke hali dinla Jefune bijua Kalebi, Kenisa buolu yua yaabila baa die Ebiloni, kelima o den dugi Isalele yaaba Tienu po cain.

¹⁵ Ebiloni den kpa yi Kilijati-Aliba lani n tie Aliba dogu. Aliba den tie Anaka buolu yaaba siiga, yaa ja yaa yeli n den ñani ki cie. Lani bu toabu den gbeni mi diema nni ke yua kuli fuodi.