Josue 13 - Gourmanchéma Bible

¹ Josue den podi boncianla. Li Miali Diedo den yedi o: «Moala a podi boncianla, ke yaa diema n sieni ke a baa koani ki ga mo nan da yaba boncianla.

² Diidi yaa diema n sieni: Filisiti yaaba yaa diema leni Gesuli yaama,

³ ki cili Sikoli kpenu yu n ye Ejipiti banlu, ki yaa caa hali nijienu po Ekiloni dogu bianu kani. Laa diema kuli tie Kanana yaame. Filisiti yaaba batemuudiba yaaba n die likani tie Gasa bado, Asidodi yua, Asikaloni yua, Gati yua, leni Ekiloni yaa yua, bani batiebimuu leni Afita

⁴ yaaba n die niganu po. Li tie tiladi ŋan paadi Kanana diema kuli leni Sidoni yaaba dogu Meyada, ki yaa caa hali Afeka, Amoni yaaba bianu.

⁵ Li go tie tiladi ŋan paadi Gebali yaaba yaa diema leni puoli po Libani yaa diema kuli, ki cili Baali-Gada dogu yu n ye li juali Helimoni tinga ki yaa caa hali Hamati dogu.

⁶ A go baa paadi li juali nni niba kuli bani Sidoni yaaba, ki cili Libani, ki yaa caa hali Misidefoti-Mayima. N baa deli ba Isalele yaaba po. Ŋan toa tiatia ki boagidiboagidi Isalele yaaba laa diema kuli, nani min waani a maama.

⁷ Isalele yaaba buoli yia leni Manase buolu boagidima da sieni kaa baa biinu. Ŋan boagidi ki teni bani laa diema.»

⁸ Lubena buolu leni Gada buolu leni Manase yaa buolu boagidima den ga bi yaa tinmu Judana boanduoli po. Musa n den boagidi ki teni ba nani Li Miali Diedo n den waani o maama.

⁹ Niganu po bi diema biani den tie Aloyeli dogu yu n ye Alinoni jaali kani leni yaa dogu n ye laa joaloangu siiga. Bi den die Medeba tialu kuli ki yaa caa hali Diboni dogu,

¹⁰ ki taani leni Amola yaaba bado Sihoni dogi kuli. Wani Sihoni den kaa Hesiboni ki die yaa diema n ban pundi hali Amoni yaaba tinga banlu.

¹¹ Bani Lubena buolu leni Gada buolu, leni Manase yaa buolu boagidima yeni go den die Galaadi yaaba diema, leni Gesuli leni Maaka yaa diema, leni Helimoni juali, ki taani leni Basana diema kuli ki ban dagini hali Salika dogu.

¹² O bado Ogi den tie Lefayima buolu kuli siiga yua bebe n sieni. O den kali Asitaloti leni Edileyi yi n ye Basana diema nni ki diedi. O moko yaa diema den taa bi biinu nni. Musa den paadi laa diema batieba kuli ki deli ba.

¹³ Ama Isalele yaaba ki den deli Gesuli yaaba leni Maaka yaaba. Bi baa ye Isalele yaaba siiga hali dinla.

¹⁴ Lefi buolu yaaba bebe n den tie yaaba n ki baa biinu. Bi yaa biinu den ña Isalele yaaba n den kpendinni yaa padijuukaana Li Miali Diedo bi Tienu po yaa niinni, nani wani U Tienu n den niani ba maama.

¹⁵ Musa den boagidi ki teni Lubena buolu yaaba bi yaa tinmu ki ŋoadi nani bi diedi n da maama.

¹⁶ Bi diema banlu niganu po den tie Aloyeli dogu ki ye Alinoni jaali kani leni yaa dogu n ye laa joaloangu siiga. Bi den die yaa tialu n lindi Medeba.

¹⁷ Bi go den die Hesiboni leni u tialu nni yaa dogi kuli, lan tie Diboni, Bamoti-Baali, Beti-Baali-Meoni,

¹⁸ Jahasi, Kedemoti, Mefaati,

¹⁹ Kilijatayima, Sibima, leni Tisediti-Hasasadi dogu yu n ye yaa juali n ye ku laagu nni yuli po,

²⁰ Beti-Peyoli, leni Pisiga juali jiidima leni Beti-Jesimoti.

²¹ Laa den tie yaa dogi n ye i tiali nni bebe ka, Amola yaaba bado Sihoni yua den kaa Hesiboni moko yaa diema kuli den taa bani Lubena yaaba biinu nni. Musa den paadi Sihoni leni wan den die yaa batieba ke bi ye Madiana diema nni, lan tie Efi, Bekemi, Tisuli, Huli leni Leba.

²² Beola bijua *Balaama o lingido den tie Isalele yaaba n den kpa yaaba siiga yendo.

²³ Nintuali po, Judana n den tie Lubena buolu yaaba tinga bianu. Laa dociami leni laa dobila n tie ban den baa yaa biinu ki ŋoadi nani bi diedi n de maama.

²⁴ Musa den boagidi ki teni Gada buolu yaaba bi yaa tinmu ki ŋoadi nani bi diedi n de maama.

²⁵ Bi diema den tie Jayesedi, Galaadi dogi kuli, Amoni buolu yaaba diema boagidima ki ban dagini hali Aloyeli ki kuu Laba.

²⁶ Bi cima den ñani Hesiboni ki ban dagini Lamati-Misepe leni Betonima, ki go ñani Mahanayima ki ban dagini Debili banlu kani.

²⁷ Judana tialu nni mo, bi den die Beti-Halama, Beti-Nimida, Sukoti leni Safoni. O bado Sihoni yua n den kaa Hesiboni, n den die laa dogi. U bianu den tie Judana ki ban dagini nijienu po mi ñincianma Kineleti.

²⁸ Laa dociami leni laa dobila n tie ban den baa yaa biinu, ki ŋoadi nani bi diedi n de maama.

²⁹ Musa den boagidi ki teni Manase buolu boagidima bi yaa tinmu ki ŋoadi nani bi diedi n de maama.

³⁰ Bi diema banlu niganu po den tie Mahanayima dogu. Bi den die Basana diema leni likani bado Ogi n den die yaa diema kuli, leni Jayili dopiiluobidi yi n ye laa gaanma kuli.

³¹ Bani Manase bijua Makili buolu yaaba boagidima go den die Galaadi diema boagidima leni Basana bado Ogi dociankpeliedi Asitaloti leni Edileyi.

³² Lani n tie Musa n den ye Judana duoli Moabi tiali nni Jeliko puoli ki boagidi yaa biini.

³³ Waa den boagidi ki teni Lefi buolu yaaba wani biinu. Li Miali Diedo Isalele yaaba Tienu n tie bi yaa biinu nani wan den yedi ba maama.