Josue 11 - Gourmanchéma Bible

¹ Hasoli bado Jabina n den gbadi Josue n tientieni yaala kuli, o den soani a tonda Madona dogu bado Johabi kani, leni Simidoni leni Akesafi yaa batieba kani.

² O den soani a naa tonda nijienu po juana batieba kani, leni Judana kpenu balinma yaa batieba kani, leni Kineleti yaa ñincianma ganu po, leni ku joaloangu nni yaa batieba kani, leni nintuali po, yaa boanjaali n kuu leni Doli yaa batieba yaa kani.

³ O go den soani yaa niba n tie na moko yaa kani: Kanana yaaba yaaba n ye Judana kpenu puoli leni u nintuali, leni Amola yaaba, Heta yaaba, Felesa yaaba leni Jebusa yaaba yaaba n ye a juana nni, leni Hefa yaaba yaaba n ye Helimoni juali balinma, Mitisipa diema nni.

⁴ Laa batieba kuli den fii leni yaa toatieba n yaba kaa pia coali nani mi ñincianma tanbiima yeni, leni i taami leni toateliti boncianla.

⁵ Bikuli den juogi ki bili ban baa kadi naani, ki gedi ki kpa bi toanagili ki kuu Medoma ñima kani ki baa tuogi leni Isalele yaaba bu toabu.

⁶ Li Miali Diedo den yedi Josue: «Ŋan da jie ba kelima saala u naa yogunu, n baa kpa bikuli Isalele yaaba po. Ŋan jia bi taami taagadibanjiini ki juu bi toateliti.»

⁷ Josue leni o toatieba den gedi ki ludi ba ki baa ba Medoma ñima kani.

⁸ Li Miali Diedo den taa ba ki teni Isalele yaaba nuu nni. Bi den paadi ba ki ŋoadi ki deli ba ki gedi hali u dociamu Sidoni leni Misidefoti-Mayima, nijienu po. Puoli po mo bi den ŋoadi ki deli ba ki pundi hali Mitisipa joaloangu nni. Bi den kpa bikuli baa ŋa baa niyendo leni miali.

⁹ Josue den tieni nani Li Miali Diedo n den yedi o maama: O den jia bi taami taagadibanjiini, ki juu bi toateliti mo.

Isalele yaaba paadi Hasoli dogu

¹⁰ Josue den lebidi ki guani ki baa Hasoli dogu, yu n den kpa tie niganu po diema kuli docianmoanu. O den kpa u bado,

¹¹ ki teni ke bi kpa u niba kuli leni yaala n pia miali ki fo kuli ki den sieni lienni. Bi den juu u dogu.

¹² Josue den paadi bi batieba yaaba n den taani yeni kuli, ki fie bi dogi. O den kpa ba leni bi dogi niba kuli nani Li Miali Diedo naacemo Musa n den bili maama.

¹³ Ama Isalele yaaba ki den juu yaa dogi n ye a juana po, li yaa tie Hasoli, Josue n den juu yu yaaka.

¹⁴ Isalele yaaba den taa bi yula po i dogi yeni bonpiakaala leni i yandi ke li tua ti fagidi. Ama bi den kpa bi niba wani kuli, baa den ŋa yaala n pia miali kuli lienni.

¹⁵ Musa den teni Josue Li Miali Diedo n den teni o yaa ñoabona. Josue den tieni a kuli kaa ŋa liba.

Josue paadi mi diema ki dudi

¹⁶ Josue den paadi mi diema kuli, lan tie li juali nni yaa diema, niganu po yaa yaama, Gosena yaama, u tialu nni yaama, u kpenciamu Judana balinma, leni jienu po yaa juana leni laa tiali.

¹⁷ O den paadi ki kpa yaa batieba yaa diema n cili niganu po Halaka juali kani ki kuu Seyili juali ki yaa caa hali nijienu po Baali-Gada naani n ye Libani joaloangu nni, Helimoni juali kani.

¹⁸ Josue n den tuogi leni laa batieba yaa toabu den waagi boncianla.

¹⁹ Hefa yaaba yaaba n den ye Gabaono bebe n den loli ku danligu leni Isalele yaaba. Yaa dogi n sieni kuli, bi den tieni bu toaboe ki paadi yi.

²⁰ Kelima Li Miali Diedo den teni ke bi juagi bi pala ki tuogi leni Isalele yaaba bu toabu, ke bani Isalele yaaba n kpa ba ki bolini ba cain, kaa gbadi bipo niñima, nani Li Miali Diedo n den waani Musa maama.

²¹ Laa yogunu Josue den gedi ki ban baa Anaka buolu yaaba, yaaba n den ye Ebiloni juana nni, leni Debili juana nni, leni Anabi yaa juana nni, leni Juda leni Isalele diema juana nni kuli. O den kpa ba ki bolini bi dogi kuli cain.

²² Anaka buolu yaaba baa yendo ki den sieni Isalele yaaba diema nni. Bi den sieni Gasa leni Gati leni Asidodi yaa dogi nni bebe.

²³ Yeni Josue den paadi mi diema kuli nani Li Miali Diedo n den waani Musa maama. O den boagidi ma Isalele yaaba. Li yaa puoli Isalele yaaba den fuodi leni bu toabu.