Josue 10 - Gourmanchéma Bible

¹ Jelusalema bado Adoni-Sedeka den gbadi ke Josue baa Ayi dogu ki bolini u ki tieni wuni leni u bado kuli nani wan den tieni Jeliko yaa dogu leni u yaa bado maama. O go den gbadi ke Gabaono yaaba loli ku danligu leni Isalele yaaba ki ye bi siiga.

² Lane o den jie boncianla kelima Gabaono den tie dociamu ki pia ti kpiagidi nani bi badiba n kaa yaa dogi nni yeni, ki yaba ki cie baa Ayi yaa dogu, u jaba kuli mo den tie jakoanda.

³ Lani yaa po Jelusalema bado Adoni-Sedeka yeni den soani ke bi yedi Ebiloni bado Hohama, leni Jalimuti bado Pileyama, leni Lakisi bado Jafiya leni Egilona yaa bado Debili:

⁴ «Cua mani ki todi nni tin tuogi leni Gabaono yaaba bu toabu, kelima bi loli ku danligu leni Josue leni Isalele yaaba.»

⁵ Amola yaaba batieba bonba muu, Jelusalema yua leni Ebiloni yua, leni Jalimuti yua, leni Lakisi yua, leni Egilona yaa yua den taani ki fii leni bi toagola. Ban den ban nagini Gabaono, bi den kpa bi toanagili ki gedi ki baa u.

⁶ Gabaono yaaba den soani Giligali po Josue kani ki yedi o: «Ŋan da yie ke a kan todi tinba a naacenba. Ŋan jaligi ki cua ne ki ga ti. Ŋan todi ti kelima Amola yaaba batieba yaaba n ye a juana nni kuli taani ki baa tuogi leni ti bu toabu.»

⁷ Lanwani Josue den fii Giligali, wani leni o jakoanda, leni o toatieba kuli.

⁸ Li Miali Diedo den yedi Josue: «Ŋan da jie ba, kelima n teni ba a nuu nni, bi siiga nni baa niyendo kan fidi ki sedi ki pani a.»

⁹ Josue den fii Giligali ki cuoni ñamungu ki pundi Amola yaaba kani ki ludi ba.

¹⁰ Li Miali Diedo den teni ke Amola yaaba jie ki lebidi ki sani ke Isalele yaaba ŋoadi ki deli ba. Isalele yaaba den paadi ba cain ki kuu Gabaono kani. Bi den ŋoadi ki deli ba ke bi tagi yaa sanu n cuubi Beti-Holoni, ki kpaani ba ki ban pundi hali Aseka leni Makeda dogi nni.

¹¹ Ban den tiini Isalele yaaba ki ji Beti-Holoni, Li Miali Diedo den teni ke a tatanciama ña tanpoli ki baali bipo hali ki ban pundi Aseka dogu, ke bi bodi. A tatana n den kpa yaaba den yaba ki cie Isalele yaaba n den kpa yaaba leni mu jugisiemu.

¹² Li Miali Diedo n den taa Amola yaaba ki teni Isalele yaaba nuu nni yaa daali, Josue den mia o Isalele yaaba kuli nintuali ki yedi: «Fini u yienu, ŋan sedi Gabaono yuli po, Fini o ŋmaalo, amo n sedi Ayalona joaloangu yuli po.»

¹³ U yienu den sedi, O ŋmaalo moko den jidi o cenli, Hali Isalele yaaba n tu bi yibalinba bi panpaanbiadi. Lankuli diani o Niteginka tili nni ki yedi: U yienu den sedi yuli siiga, U den se hali damunli kaa baa.

¹⁴ Laa daali liiga leni li puoli kuli daa go baa yaa daali n naani leni li, ke Li Miali Diedo cengi o nisaalo miabu yeni: Li Miali Diedo wani oba den todi Isalele yaaba bi toabu nni.

¹⁵ Li yaa puoli Josue leni Isalele yaaba kuli den lebidi ki guani Giligali, bi nagili po.

Josue kpa Amola yaaba badimuudiba yeni

¹⁶ Amola yaaba badimuudiba yeni den sani ki ban wuoni Makeda tanlongu nni.

¹⁷ Bi niba den bandi ke bi wuo lienni ki gedi ki ban waani Josue.

¹⁸ Josue den yedi o niba: «Bindi mani a tanciama ki luoni ku tanlongu yeni buliñoabu, ki sieni bi niba ban yaa guu.

¹⁹ Yin da sedi ki waagi likani, yin sani ki ŋoadi yi yibalinba ki kpedi ki jia ba ki da tuo ban kua bi dogi nni, kelima Li Miali Diedo yi Tienu taa ba ki teni yi nuu nni.»

²⁰ Josue leni Isalele yaaba den paadi Amola yaaba cain. Nitianba bebe den sani ki cia ki ban kua i bilinciami n lindi ki cebini yaa dogi nni.

²¹ Li yaa puoli Isalele yaaba kuli den guani Makeda bi nagili nni Josue kani leni laafia. Mi diema nni oba kuli ki go den tuo ki maadi bipo yaala n bia.

²² Lane Josue den yedi: «Luodi mani ku tanlongu yeni buliñoabu ki ñani bi badimuudiba yeni ki cuani ba n kani ne.»

²³ Bi den tieni wan yedi yaala ki ñani Jelusalema yaa bado, Ebiloni yaa yua, Jalimuti yua, Lakisi yua leni Egilona yaa yua ki cuani ba o kani.

²⁴ Ban den cuani bikuli, Josue den yini Isalele yaaba kuli ki yedi bi toatieba yudanba yaaba n den ye leni o bu toabu nni: «Cua mani ki ŋma bi toatieba na tuli nni.» Bi yudanba yeni den nagini ki ŋma.

²⁵ Josue den yedi ba: «Yin da jie mani, yin da teni lan wudi yi. Yin paagi yiba ki paagi yi pala. Li Miali Diedo baa soani yi yibalinba yaaba n baa tuogi leni yi kuli yene.»

²⁶ Li yaa puoli Josue den kpa bi badimuudiba yeni ki teni ke bi joani ba tiidi muu po. Bi den juani hali ku yenjuogu.

²⁷ U yienu n den baa, Josue den teni ke bi jiini ba. Bi den luni ba ban den wuoni yaa tanlongu nni yeni, ki taa a tanciama ki luoni bu buliñoabu. A tana yeni baa ye likani hali dinla.

Josue paadi niganu po yaa dogi

²⁸ Landaali liga Josue den paadi Makeda dogu, ki kpa u bado leni u niba kuli. Waa den ŋa baa niyendo leni miali. O den soani likani bado nani wan den soani Jeliko yaa yua maama.

²⁹ Josue leni Isalele yaaba den ñani Makeda ki gedi ki ban baa Libina dogu.

³⁰ Li Miali Diedo den taa laa dogu moko leni u bado ki teni Isalele yaaba nuu nni. Bi den kpa u niba kuli kaa ŋa baa niyendo leni miali. Bi den soani u bado nani ban den soani Jeliko yaa yua maama.

³¹ Josue leni Isalele yaaba den ñani Libina ki gedi Lakisi. Bi den kpa bi toanagili ki nagini u dogu ki baa u.

³² Li Miali Diedo den taa Lakisi ki teni Isalele yaaba nuu nni ke bi paadi u li dalieli daali, ki kpa u niba kaa ŋa baa niyendo leni miali, nani ban den tieni Libina maama.

³³ Geseli bado Holama den gedi ke o baan todi Lakisi dogu. Josue den paadi o, wani leni o toatieba ki kpa bikuli kaa ŋa baa niyendo leni miali.

³⁴ Josue leni Isalele yaaba den ñani Lakisi ki gedi Egilona. Bi den kpa bi toanagili ki nagini u dogu, ki baa u.

³⁵ Bi den paadi u landaali liga ki kpa u niba kuli nani ban den soani Lakisi dogu maama.

³⁶ Josue leni Isalele yaaba den ñani Egilona ki gedi ki ban baa Ebiloni.

³⁷ Bi den paadi u ki kpa u bado leni u niba kuli. Bi den fie ki paadi u tinkundogi moko ki kpa laa dogi niba kuli. Josue den soani u nani wan den soani Egilona maama yeni, ki bolini u cain, ki kpa u niba kuli mo kaa ŋa baa niyendo leni miali.

³⁸ Li yaa puoli Josue leni Isalele yaaba den lebidi ki gedi ki ban baa Debili.

³⁹ Bi den paadi wuni leni u bado leni u tinkundogi kuli. Bi den kpa bi niba kuli kaa ŋa baa niyendo leni miali. Josue den soani Debili leni u bado nani wan den soani Ebiloni leni Libina leni u bado maama.

⁴⁰ Josue den paadi mi diema kuli: O den paadi yaa diema n ye a juana nni yaa badiba kuli leni niganu yaama yaa badiba kuli, leni u tialu nni yaama yaa badiba kuli, leni yaama n ye a juana balinma yaa badiba kuli. Waa den ŋa oba kuli leni miali. O den bolini yaala n pia miali ki fo kuli nani Li Miali Diedo, Isalele yaaba Tienu n den bili maama.

⁴¹ Josue den paadi bi batieba yeni kuli ki ña Kadesa-Balineya ki yaa caa hali Gasa. O den paadi Gosena diema kuli ki yaa caa hali Gabaono.

⁴² O den paadi laa diema kuli leni mi batieba kuli fiiyenma, kelima Li Miali Diedo Isalele yaaba Tienu den todi ba bi toabu nni.

⁴³ Li yaa puoli Josue leni Isalele yaaba den lebidi ki guani Giligali, bi nagili po.