Jonasi 3 - Gourmanchéma Bible

¹ Li Miali Diedo go den teni Amitayi bijua Jonasa o ñoabonli ki yedi:

² «Gedi Ninife dociamu nni ki ban kpaani ki waani min soani a yaa tondu.»

³ Jonasa den fii ki gedi Ninife nani Li Miali Diedo n den yedi o maama. Ninife yeni den tie dociamu ke ku poandima pundi dana taa cenli.

⁴ Jonasa den cuoni u dogu yeni niinni dayenli cenli ki kpaani ki tua: «Dana piinaa yaa pendi Ninife baa bodi.»

⁵ Ninife yaaba den ga U Tienu maama ke mi tie moamoani ki lebidi bi yama ki bili ke bi niba kuli n loli bu ñoabu, a nikpiaga leni taliginba kuli den lani li paboanli tiadi.

⁶ Laa laabaalo n den pundi Ninife bado kani, o den fii o bali kalikaanu po ki landi o liadicianli ki lani li paboanli tiadi ki kali mi fantanpienma nni.

⁷ O den teni ke bi kpaani ki yedi: «O bado leni o nikpiaga kuli yedi ke bi niba leni i ne leni i pe n da je liba kuli, ki da ño mo.

⁸ Bi niba leni ti yandi kuli n laa li paboanli tiadi, bi niba kuli n mia U Tienu leni bi fidu kukuli ki lebidi ki ŋa bi sanbiadi kuli leni bi nii n tiendi yaa biadima.

⁹ Li fidi ke yeni U Tienu baa lebidi o yanjagili ki jiini o pali tipo ki kan bolini ti.»

¹⁰ U Tienu n den laa ke bi tieni yeni ki lebidi ki ŋa bi sanbiadi, o den lebidi o yama ki jiini o pali, ki naa go tieni wan den jagi ke o baa tieni ba yaala.