Jonasi 2 - Gourmanchéma Bible

¹ Li Miali Diedo den teni ke o janciamo cua ki nali Jonasa. O den tieni o jamo yeni tugu nni dana taa leni ñadi taa.

² Jonasa den jaandi Li Miali Diedo o Tienu o jamo tugu nni,

³ ki yedi: «N paboanli nni, n jaandi ki mia fini Li Miali Diedo, Ke a guani npo n miabu. Hali bi tinkpiba diema nni N den kpaani ki mia ŋa, Ke a gbadi n nialu.

⁴ A den luni nni mi ñincianma nni, Hali mi ñima tugu nni. Mi ñima den gaani ki lindi ki cebini nni. A ñingola leni a ñinguona kuli den milini nni.

⁵ N den tua: ‹A deli nni ke n foagidi leni a, Ama n go baa le a jaandiegagidikaali.›

⁶ Mi ñima den mundi nni hali ki bua ki ñani n miali, Yeni de, mi ñinñuanma den lindi ki cebini nni. Ti ñinmuadi den fini n yuli.

⁷ N den jiidi ki pundi hali a juana tanpuuna kani, Bi tinkpiba kaanu buliñoana den luoni nni Ke n kan fidi ki ña hali abada. Ama Li Miali Diedo n Tienu, A teni ke n ñani u *kulu yeni niinni leni li miali.

⁸ Min den laa ke mi kuuma dia nni yaa yogunu, N den tiadi fini Li Miali Diedo po, N miabu den pundi a kani, Hali a jaandiegagidikaali nni.

⁹ Yaaba n ŋua i *buli, yi n tie fanma fanma, *Faabima ki ye bipo.

¹⁰ Ama mini n baa yaa yiini ki tuondi a, ki padi apo a pada Ki go kuandi min den niani a yaa ñoaniani. Fini Li Miali Diedo, mi faabima kuli ña a yaa kane.»

¹¹ Li Miali Diedo den maadi leni o jamo yeni Ke o sii Jonasa li boanjaali po.