Joeli 4 - Gourmanchéma Bible

¹ Laa yogunu n baa teni Juda leni Jelusalema yaaba, Yaaba n den ye ti yonbidi nni n lebidi ki kpeni.

² N baa taani i nilanbuoli kuli, Ki jiini ba Josafati jaloangu nni. Lankani n baa bu leni i nilanbuoli yeni, Kelima ban tieni yaala n niba Isalele yaaba yeni. N baa bu i nilanbuoli yeni kelima bi yayadi n niba nibuotoe nni. N baa bu leni ba kelima bi boagidi n diema bi ŋmiali nni.

³ I nilanbuoli yeni toani n niba tiatia. Bi kuadi a bonjabila ki jiadi a poconcona, Ki kuadi a bonpobila ki ñuni bi daama.

⁴ Yinba, Tili leni Sidoni dogi, Yinba, Filisiti tinbuona yaaba, Be yaa po yi lingi nni? Yi bua ki tu nni li panli bi? Li yaa tie yeni wani n baa teni yi tuada n jiidi yi yula po.

⁵ Yi taa n ŋanjilifa leni n wula, Min den pia yaa ŋalimano ke o tie n bonmoanla ki go ŋani yeni. Yi tugi la ki ban bili yi budiena nni.

⁶ Yi kuadi Juda leni Jelusalema diema yaaba Gileka nibuolu po. Yi tieni yeni kelima yi bua ki foagidi ba leni bi diema.

⁷ Ama mini Li Miali Diedo, n baa ñani ba Yin ban kuadi ba naanpo. N baa guani yi biadima panpaani yi yula po.

⁸ N baa kuadi yi bijaba leni yi bisiaba Juda yaaba po, Bimo n kuadi ba Sabe yaaba po, Yaa nibuolu n ye hali foagima yeni. Mini Li Miali Diedo n yedi yeni.

Bu toajuodikaabu leni li bujiali

⁹ Kpaani mani ki waani li naa bonla i nilanbuoli siiga: ‹Bogini mani bu toabu po! Fundi mani a jakoanda! Bi toatieba kuli n fii ki cuo li cenli.

¹⁰ Taa mani yi naakuuna ki maa mu jugisiemu, Yi moaciedi mo n tua kpaana. Baa yua n tadi n yaa nua o yuli ke o tie jakoando.

¹¹ Jaligi mani ki cua, Yinba yaa nilanbuoli n gaani ki lindi kuli N taani mani ku joaloanyengu nni.› Fini, Li Miali Diedo mo, Ŋan soani a toatieba ban baa ba lankani.

¹² ‹I nilanbuoli n fii ki cua Josafati joaloangu kani. Lankane ke n baa kali ki jia ti buudi Leni yaa nilanbuoli n gaani ki lindi kuli.

¹³ Taa mani ku moaciegu ki ce Kelima ku kpaangu beni. Cua mani ki ŋma ki midi yi nani duven tiidi bonluonkaala Yaala n gbie duven tuodikaanu yeni. Ti tadiciandi mo gbie, I nilanbuoli yeni biadima yaba hali ki kandi.

¹⁴ Yaa niba n baa cua ti buudi joaloangu nni yaba boncianla. Li Miali Diedo n baa doagidi o pabienli yaa daali Ku joaloangu yeni niinni nagini.

¹⁵ U yienu leni o ŋmaalo biigi, A ŋmabila mo yaa yenma bodi.

¹⁶ Li Miali Diedo duni Siyono juali po, O ye hali Jelusalema ki kpaani. Tanpoli leni ki tinga den digibi. Ama Li Miali Diedo kubi o niba, O tie wuonkaanu Isalele yaaba po.

¹⁷ Lane yi baa bandi ke n tie Li Miali Diedo yi Tienu, Mini yua n ye Siyono, n joagagidikaali po. N baa goa ki diedi Jelusalema cain, Bi nilanba kan go diedi likani hali abada.›

U Tienu goa ki seligi o niba

¹⁸ Laa daali mi dapanma baa bundi a juana po. Mi naaŋanma baa puubi mu joabimu po. Mi ñima mo baa puubi Juda kpeni kuli nni. Li ñinbunli baa pudi Li Miali Diedo diegu nni. Ki yaa *joagini Sitimi joaloangu.

¹⁹ Ejipiti diema niba baa bodi, Edomi diema mo n tua yaa fanpienma n biidi cain. Kelima laa diema kuli mabini Juda yaaba, Ki ku yaa niba n kaa pia tagili.

²⁰ Ama Juda leni Jelusalema baa yaa pia bi niba yaa yogu n tu yaa yogu.

²¹ N baa tu yaa panli ke n daa den tu, Ban den ku yaaba ke baa pia tagili po. Mini Li Miali Diedo mo n baa yaa ye Siyono.»