Joeli 2 - Gourmanchéma Bible

¹ Piebi mani li naatuntunli Siyono juali po, Teni mani ban gbadi li moe n joagagidikaali po. Mi diema yaaba kuli n digibi Kelima Li Miali Diedo daali kpendi, Li daali yeni nagini.

² Laa daali tie *biigicianli yaa daali, A tawala leni ku gbangbadigu daali. Li daali yeni kpendi nani mi yendanma N yendi a juana maama yeni. Diidi yaa nibuolu n tie na n yaba Ki go pia u paalu maama. U buolu daa kpa tieni, U kan go tieni mo baa yaa nifiima n baa ŋoadi yaa siiga.

³ U nibuolu yeni liiga tie nani yaa fantama n buondi yeni, U puoli mo nani yaa mupienu n buondi, Hali ke u daa tagini Mi diema den tie nani Edena koaŋamu yeni. U yaa tagini ki ban pendi, U yen ŋa u puoli po Fanpienma yaama yaa noalima n gundi. Liba ki cia u kani.

⁴ Yua n laa ku niligu yeni baa yedi li tie taami. Bi tiini nani bi tanjagiba yeni.

⁵ U fuugu tie nani yaa toateliti n tiini a juana yula po, Ki tie nani mi fantama n yen sia ku muagu Ki yaa pudi maama yeni. Ki tie nani yaa toagoli n pia u paaciamu Ki bogindi bu toabu po.

⁶ Bi yaa nagidi i nibuoli yen digibi, Mu nunmu kuli yen gbidi.

⁷ Bi tiini nani a jakoanda yeni, Bi do i bilini nani bi toatieba yeni, Yua kuli kubi o sanu, oba kuli kan jadi ki ŋa u.

⁸ Baa pangi biyaba, Yua kuli kubi o sanu. Bi jaligidi ki pendi yaala n pangi ba, Puu kuli kan fidi ki sieni ba bi cenli nni.

⁹ Bi yadi u dogu nni, Ki tiini i bilini po, Ki do ti diedi, Ki kua a diebona kani nani a concona yeni.

¹⁰ Bi yaa nagidi ki tinga yen digibi, Tanpoli mo n begibi. U yienu leni o ŋmaalo n biigi, A ŋmabila yenma mo n bodi.

¹¹ Li Miali Diedo kpaani o toagoli liiga, O toanagili yaba. Yaa toagola n baa kuani o ñoabona yaba ki kandi Ki pia u paalu mo. Li Miali Diedo daali tie dacianli, Ki go pia i jeje hali boncianla. Ŋme n baa fidi ki cia?

U Tienu bua mi yanlebidima

¹² Moala Li Miali Diedo go yedi: ‹Lebidi mani ki cua n kani leni yi pala kuli. Loli mani bu ñoabu, buudi mani ki mia nni sugili.

¹³ Da padi mani yi tiayiekaadi bebe ka, Se yin lebidi yi yama.› Lebidi mani ki cua Li Miali Diedo yi Tienu kani, Kelima o juogidi yi ki gba yipo mi niñima, Ki pia li juunli leni li *ŋanbili. O yen lebidi o yama ki cedi ki kan tieni Wan den jagi ke o baa tieni o nilo yaala.

¹⁴ Ŋme n bani o yaa kan goa ki lebidi o yantiali, Ki seligi yi bonŋanla. Yeni, yi baa fidi ki yaa kpendinni Li Miali Diedo yi Tienu po bu paabu leni a ñincaba.

Mi ñoalolima leni i jaandi yogunu

¹⁵ Piebi mani li naatuntunli, Siyono nni, Bili mani u yogunu mi ñoalolima po, Taani mani li taancianli.

¹⁶ Taani mani bi niba, Ki tieni taangagidikaali, Taani mani a nikpela, Taani mani a bila, Baa yaa bila n da ŋaani. O pocaancalo n ña o dieduadili nni O pocaano mo n ña o gbandieli nni.

¹⁷ Li Miali Diedo naacenba, bi kopadicianba n sedi Li janli leni li *padibinbinli siiga ki buudi, Ki yedi: ‹Li Miali Diedo, faabi a niba. Ŋan da cedi a niba n le i fe. Ŋan da tuo ke i nibuoli n yaa laa ti ki tua: Bi Tienu nan ye le?›

U Tienu n niani o niba yaala

¹⁸ Li Miali Diedo bua o diema, O gbadi o niba po mi niñima.

¹⁹ O guani ba ki yedi: ‹N go baa soani yi po *ŋalikama leni duvenpaano leni mi kpama. Yi baa baa likuli hali lan dagidi. N kan go cedi yin le i fe i nilanbuoli siiga.

²⁰ N baa deli ki foagidi leni yi nijienu po yibali. N baa deli ki bolini o Mu tinkuonmu nni leni a tinwaga nni. O toatieba yaaba n ye liiga, n baa deli Ki jiini ba puoli ñincianma nni, Yaaba n ye puoli mo, N baa deli ki jiini ba puoli ñincianma nni, Bi kpiema nuulu baa gbieni mi fawaama. Bani yaaba n tieni yi Mi biadima boncianla yeni juodima n yeni.

²¹ Fini, ki tinga ŋan da jie liba, Mangi a pali hali boncianla, Kelima Li Miali Diedo n tieni apo yaala kuli po.

²² Yinba ti moayandi, yin da jie, Kelima a yankpaafuana baa bundi, I tiidi baa luoni i bonluonkaala. Bu kankanbu leni duven tibu baa luoni boncianla.

²³ Yinba Siyono yaaba mo, yin mangi yi pala, Kelima Li Miali Diedo yi Tienu po. O baa pa yi ki taaga ki yogunu yaa pundi, O baa pa yi ki takpiaga leni ki tajuodikaaga Nani wan den tiendi maama u yogu nni yeni.

²⁴ I jali baa gbie leni ŋalikama, Ti tadiciandi baa gbie leni mi dapanma leni mi kpama.

²⁵ N baa lebidi yipo yaa bina Ke n den soani mu tobiñaanmu yaamu n daa pudi fiabi, Ke a dondoba, a tobiñaana, I naaci leni a sidibila N den ŋmani ti kpaandi yeni.

²⁶ Yi baa je ki guo, Yi baa pagi mini Li Miali Diedo yi Tienu, Mini yua n tieni yipo li bonlidikaala. N niba mo kan go le fe hali abada.

²⁷ Yeni, yi baa bandi ke n ye yinba Isalele yaaba siiga. Yi baa bandi ke mini n tie Li Miali Diedo yi Tienu, Ke bontoala kuli ki ye ki tie Tienu se mini. N niba mo kan go le fe hali abada.›