Jobi 9 - Gourmanchéma Bible

¹ Joba den goa ki yedi:

² «I moamoani po, n bandi ke li tie yene. O nisaalo baa tieni lede ki yaa tiegi U Tienu nintuali?

³ O nilo yaa bi bua ki nia leni U Tienu, Buali tudili siiga, O kan fidi ki guani baa buali yendu.

⁴ Wani n pia mi yanfuoma leni u paaciamu kuli, Ŋme n baa fidi ki yie opo, lan cedi o?

⁵ Wani n yen ŋmiagi a juana ke a kan bandi mo, O pabienli nni o yen lu ki yandi a juana yeni.

⁶ O yen teni ki tinga leni ki tanpuuli n digibi, Ki benjieli mo kuli n yaa koa ki baali.

⁷ O yen maadi leni u yienu ki teni ke u kan pudi. O yen luoni a ŋmabila ki teni ke a kan ŋmiagi.

⁸ Wani o bebe n yen tandi tandi ti tawadi, Ki yaa cuoni mi ñincianma ñingbanu po.

⁹ Wani n tagi bi naadadiba, ŋmasoali, O ŋmabiluomo leni tanpoli ŋmabibuoli kuli.

¹⁰ O tiendi yaala n ŋani ki pia li pakili leni ki lidiga. O tiendi yaa bancianma n ki pia coali.

¹¹ Diidi o tagini n kani ke n naa laa o. O ban caa ke n naa bandi lan bua ki yedi yaala.

¹² Ŋme n baa teni wan ŋa wan fie yaala leni u paalu? Ŋme n baa tuo ki buali o: ‹A tiendi be mo n yeni?›

¹³ U Tienu pabienli daa jiidi, Mi ñincianma nni bonfuodibiado Leni o todikaaba kuli baa ki laabi o nintuali.

*

¹⁴ N mo n baa guani o lede? N baa bandi mi laa maame o kani?

¹⁵ Baa n yaa pia i moani n kan baa maguankaama. N baa mia n bujialo n gbadi npo mi niñima bebe.

¹⁶ Baa n yaa bi yini o ke o guani npo, N kan tuo ki daani ke o diadi o tubili ki cengi nni.

¹⁷ Wani yua n fii ki sedi npo nani ku tafaagu yeni, Ki kubi nni ki poagiliti fanma fanma po.

¹⁸ Waa puni nni min fuo baa waamu, Kelima o baa guoni nni leni li paboanli.

¹⁹ N yaa yedi ke n baa tieni u paalu, O yaa paalu n cie. Baa li yaa tie ti buudi kani, Ŋme nan baa tuo ki yini o likani?

²⁰ Baa n yaa pia i moamoani, U Tienu baa muni nni i moamoani yeni. Min baa yedi yaala kuli leni n moamoani, O baa waani nni ke n nani.

²¹ Naani n tie papiendaano? Baa mini nba ki go bani cain. N fali n miali yema.

²² N baga ki ye, lani n teni ke n baa fidi ki yedi: ‹O bolindi o papiendaano leni o nibiado kuli yenma.›

²³ Yebiadimaba yaa bi baa ludi ki cuani mi kuuma, O yama kan yaa yagini bi papiendanba falabiado po.

²⁴ Bi yaa taa mi diema ki teni bi nibiadiba, U Tienu pini bi bujiaba nunmu. Li yaa tie wani yaaka ŋme naane?

²⁵ N miali dana jaligi ki cie yua n tiini. A dana yeni jaligi ki sani ki daa laa mi yemanma.

²⁶ N miali dana yeni pendi nani mi ñincianma ñinbiadi yeni, Bi nani jiebani n baa cii wan baa cuo yaala po maama yeni.

²⁷ N yaa yedi n baa sundi n yenbidi, Ki cedi n pabiidili, ki mangi n pali,

²⁸ Diidi n fala teni ke n ye leni ti jawaandi, Ki bani ke U Tienu kan noanli ke mii pia tagili mo.

²⁹ I tagili baa tua n yaa yii yo. Be yaa po yo ke n baa coagi n yuli fanma fanma?

³⁰ Baa n yaa bi wali leni bu ciebu Ki nidi n nii leni mi jiama,

³¹ A bi baa ñuagi nni li ŋuabili nni Hali yaala ke n tiadi mo baa sengi nni.

³² Waa tie nisaalo nani mini yeni ke n baa maadi ki guani o, Ke ti baa taani ki sedi ti buudi kaanu.

³³ Ti siiga nni naa pia yua n baa saa tipo i moamoani Yua n baa maani o nuu tinba po.

³⁴ Lani o bi baa yindi U Tienu gbiamu yeni npo Ki teni o jawaandi mo n da go cuo nni.

³⁵ Lanwani n baa maadi ki naa jie o, Ama laa tie yene, kelima n li ye n bebe yo.