Jobi 8 - Gourmanchéma Bible

¹ Bilidada yua n den ñani Sua den maadi ki yedi Joba:

² «A mo baa waagi ki maadi mi naa maama Hali ki ban pundi u laa yogunu yo? A ñoabu nni maama mo baa yaa tie nani ku tafaagu Hali ki ban pundi u laa yogunu yo?

³ Naani U Tienu baa golini mi *teginma? Naani U Paaciamu Kuli Daano baa tieni yaala n ki tiegi?

⁴ A bijaba ko tudi opo yo Ke o teni ke bi biadima goa ki baa bipo.

⁵ Ama fini wani, a yaa lingi U Tienu, A yaa mia U Paaciamu Kuli Daano *ŋanbili,

⁶ A yaa pia tagiliba, ki go tiegi mo, Laa pia kuli tama ke o baa kubi a, Ki goa ki ŋanbi a diegu ki teni mi teginma n yaa ye ku niinni.

⁷ A yekpiama kan yaa tie puu kuli Leni yaama n baa yuandi ki cua n baa yaa mani maama po.

*

⁸ Buali yaa nifiima n kpa liidi ti, Ŋan yaa faami bi baanba n den laa ki go bandi yaala.

⁹ Kelima ti tie wonli nni yaaba bebe. Tii bani puu kuli. Ti yema ki tinga nni tie nani u soangu n pendi maama.

¹⁰ Ama ban wani baa fidi ki bangi a Ki go tundi a ban den laa ki go bandi yaala. Bi baa yedi a:

¹¹ ‹Naani ku sabigu baa pudi ke laa tie ñima nni? Naani i kpenkagi baa pudi naani n ki soangi?

¹² Hali ke ku sabigu yeni da soangi ke baa ceni gu, Mi ñima yaa ñuudi, ku yen jaligi ki kuodi ki ŋa yaa muadi n soangi kuli.›

*

¹³ Li baa tua yene yaaba n sundi U Tienu kuli po, O nibiado suginma mo baa bodi.

¹⁴ O nibiado jigi kuli baa cie O dugidi tie nani ku diandiagu gaali yeni.

¹⁵ O dugi o dieli po yo, lini mo naa pia fidu. O sani ki fini li dieli yeni ama li wudi.

¹⁶ O tie nani yaa tibu n gbie leni mi sinma u yienu nni. Ki landi bu beni sadinga nni kuli.

¹⁷ O jiini kua ki sagi a tankuda nni, Ki ban talini hali ku tangu tinga.

¹⁸ Ama bi yaa ŋabi o wan den ye naani, Oba kuli kan go bandi ke o den ye likani.

¹⁹ O yema manu juodima n yeni. Laa buoli nni nitoaba baa fii.

²⁰ U Tienu kan ŋa niteginka abada. Moko, o kan todi yaaba n tiendi mi biadima.

²¹ Li kan waagi, o baa gbieni a ñoabu leni li pamanli kpaani, Ki teni a ñoacuuna mo n pagi o.

²² Yaaba n nani a baa le i fe. Bi nibiadiba diedi baa bodi.»