Jobi 7 - Gourmanchéma Bible

¹ O nisaalo yema ki tinga nni pa hali boncianla. O cima pa nani o tuonsoanlo yema yeni.

² Nani o yonbo yua ye u yienu nni n bua u soangu maama, Nani o tuonsoanlo n guu o panpaani maama yeni,

³ Mini moko yaa yema tie yene Ŋmaali coacoali ke mii ŋmani yanbu.

⁴ N yaa duani yaa yogunu n yen yedi: ‹N baa fii be yogunu yo?› Ku ñiagu mo yaa waagi Se n yama n yaa yagini Hali ki ban pundi u yienu pudima.

⁵ A sidibila leni a poaga pini n gbanu kuli. N gbanu fabidi fabidi ke a nala tieni ti biidi.

⁶ N dana jaligi ki cie o lugido gonbu, A kuli jaligi ki gbeni, suginma ki go ye.

*

⁷ U Tienu, ŋan tiadi ke n miali dana tie fawaama bebe. N nuni kan go le mi yemanma.

⁸ Yaa nunbu n bi diidi nni kan go le nni. A nuni baa lingi nni ki sua ke mii go ye.

⁹ Nani ku tawaligu n yindi ki gedi maama, Yeni, yua n gedi bi tinkpiba diema nni kan go guani.

¹⁰ O kan go guani o diegu nni O diegu nni yaaba mo baa sundi opo.

*

¹¹ Lani n teni ke n kan yaa ŋmini. N pabiidili nni n baa maadi. N paboanli nni n baa waani yaala n koani nni.

¹² Naani n tie mi ñincianme, bi mi ñincianma bonfuodibiado yo, Ke a baa bi niba ban guudi nni?

¹³ N yaa duani yaa yogunu n duanu nni Ki tama ke n baa baa mi yanduanma leni gaapo,

¹⁴ Laa yogunu yo ke a yen jiendi nni leni ti dangidi Ki teni ke li bonlekaala jiendi nni.

¹⁵ A yaa bi soadi nni, li baa tu npo ki cie. N yaa kpe li tunni npo min dondi ki tie kpaba maama nne.

¹⁶ Mii bua a kpaba yeni baa waamu. N kan go waagi ki ye. Cedi nni kelima n miali dana ki go pia fuoma.

*

¹⁷ O nisaalo fuoma n tie be, Ke a puuni o laa yulolima kuli? Be teni ke a puuni o laa mayuli kuli,

¹⁸ Ki baa yaa kpendi ki goandi o tiŋaagu kuli, Ki biigidi o u yogunu kuli?

¹⁹ Be yogunu ke a baa cedi min fuo leni a nunnualima? Be yogunu ke a baa cedi min baa ki nali n ñinsanñima?

²⁰ Bi nisaaliba guudo, n yaa tieni ti *tuonbiadi n baa fidi ki biidi apo be? Be yaa po ke a li sedi npo nanda? Naani n tie apo tugili yo?

²¹ Be teni ke a yie ke a kan tieni npo sugili n tagili po? Be teni ke ŋaa tieni npo sugili n tudima po? Moala wani n di caa ki baa duani mi tama nne. A baa lingi nni ki sua ke mii go ye.»