Jobi 6 - Gourmanchéma Bible

¹ Lanwani Joba den goa ki yedi:

² «Li yaa bi baa tuo ban biigi n fala, Ki kpieni n yebiadima yaala n biigidi li bonla kpiagu nni,

³ Li baa taani ki yaa kpiagi ki cie mi ñincianma tanbiima. Lani n teni ke n maama ki go pia yuli.

⁴ U Paaciamu Kuli Daano piemi muu ki lugidi nni, Ki teni ke li loabidi mo kua nni, U Tienu teni ke ti jawaanciandi cuo nni.

⁵ Naani o fuaŋunbo da baa cua ti moasoangidi kani, Ki yaa se ki mua? Naani o nua go baa yaa mua wan ŋmani yaa muadi kani?

⁶ Naani yaala n saa kaa pia yaama, baa tuo jiema? Naani li jenli kpipienma pia yaala n nuagi?

⁷ Min kaa den bua ki sii yaala yeni, Lani n di tua n jiema, baa ke n den sengi la.

*

⁸ N sugini hali bonŋanla U Tienu n gbadi n miabu, Ki nanli nni min bua yaala.

⁹ Li yaa tie ke U Tienu bua ki ñii ki midi nni Wan tandi o nuu ki dudi nni yenma!

¹⁰ N den baa yaa pia laa baagi wani. N den baa yugi ki cii leni li pamanli baa ke n falabiado ki pia bianu. Kelima n bani bonyenla wani, Mii miidi yaa Tienu n gagidi ki ŋani maama.

¹¹ N mo yaa fidu n tie u le ke n go baa yaa baa guu? Be yaa po yo ke n baa yaa baa ki ye, ki naa pia suginmaba?

¹² Naani n pia u fidu nani li tanli yene? Naani n gbanandi moko juagi nani ti kumoandi yene?

¹³ Mii go pia yua n baa todi nni. Mii go pia loaguba mo.

*

¹⁴ Yua n ye leni fala, li pundi wan baa o danli kani li*ŋanbili, Baa o yaa go pia fangili U Paaciamu Kuli Daano po.

¹⁵ N kpiiba wudi n gbanu nani u kpenu yeni, Nani yaa kpenu n yen ti ñuudi yeni.

¹⁶ U kpenu yeni ñima gbidi ki go kuugi, Ku gbangbadigu mo cua ki pini ki mundi u.

¹⁷ Ku wulugu yogunu, i kpeni yeni ñuudi U yienu jama po teni ke i kpeni kuodi li buoli nni.

¹⁸ Bi sancenba jadi likani ki bua ño, Ki cuoni mi fanpienma nni ki ban yaadi.

¹⁹ Tema diema sancenba leni Saba diema yaaba kuli lingi mi ñima Ki tama ke bi baa le ma,

²⁰ Ama ban pundi, bi pala biidi kelima bi sua ke i kpeni kuli kuodi.

²¹ Yi tie yene moala nne mini yi danli po. Yin laa n yebiadima yeni ti jawaandi cuo yi.

²² Naani n yedi yin baa li bonla ki pa nni? Naani n yedi yin ñani yi piama nni bonliba ki pa nni,

²³ Ki faabi nni n yibalinba, Leni bi tugumoandanba nuu nni?

²⁴ Teni mani min bandi n tagili, n baa suoni. Waani nni mani min tudi naankani.

²⁵ I moamoani maama ki koani oba kuli! Yi mo yaa fuugu yaa mayuli n tie be?

²⁶ Yi fu kelima n maama nni pia poadi bii? Yua ye leni li paboanli maama ki pia yuli.

²⁷ Yi kan gbali ki toa baa kpienbiga tiatia, Ki taa yi danli mo ki lebidi ki ga bonliba.

²⁸ Moala diidi mani nni bonŋanla, Naani n baa pua mi faama yi nunbu nni?

²⁹ Goa ki cua mani! Da tiendi mani yaala n ki tiegi! Guani mani nne ke n *teginma da baa ye.

³⁰ Naani yaala n ki tiegi ye n lanbu po? Naani n ñoabu ki bani ki gagidi mi yebiadima?