Jobi 5 - Gourmanchéma Bible

¹ Moala, kuudi boncianla! Naani li pia yua n baa guani apo? A baa mia o laa maleki gagidiŋamo mi todima?

² Li mutuoli n baa kpa o yanpiidaano, Li nunponli mo n baa je o yanluodaano.

³ N laa o yanpiidaano n pani i jiini maama, Laa waagi leni min soli o diegu ki yedi:

⁴ ‹O bijaba n da baa kuli todima Ban jia ba ti buudi ki cuo ba ke oba naa baa faabi ba.

⁵ Wan yendi yaa bonjekaala a konkonba baa cua ki je la, Baa li yaa ye i konkoni nni. U ñunñuunu n kubi yaaba mo baa nali o ŋalimano!›

⁶ Mi yebiadima ki ña mi tama nni ka, Fala mo kan pudi ki tinga nni ka.

⁷ Ama o nisaalo mali fala po Nani i mukaabi n baa yugi maama yeni.

⁸ Li yaa bi tie mine, n baa yaa miadi U Tienu N baa waani U Tienu yo n payianu,

⁹ Yua n tiendi yaala n ŋani ki pia li pakili leni ki lidiga O tiendi yaa bancianma n ki pia coali.

¹⁰ Wani n teni ke ki taaga mii u tingbanu po, Ki teni ke mi ñima soangidi i kuani.

¹¹ O fiindi ki siendi bi yumiindanba, Yaaba n ye leni li paboanli mo baa mi yemanma.

¹² O bolindi bi nunfandanba yanjaga, Bi nii kan fidi ki pa ba ban bua yaala.

¹³ O yen cuo bi yanfodanba bi nunfancele nni. Bi nunfandanba tundi mo kan baa yuli.

¹⁴ Bani n yen tuogi li *biigili u yensiinu, Bi baa tulibi u yensicocolu nani ku ñiagu yeni.

¹⁵ Ama U Tienu n baa faabi taliga leni bi nibiadiba yebiidu. O baa faabi taliga yua n pia u paalu nuu nni.

¹⁶ Yeni, a tadima po mo mi suginma ye. Ama o baa luoni bi nibiadiba ñoana.

¹⁷ Lanwani li pamanli ye leni U Tienu n tundi yua leni fala. Ŋan da yie U Paaciamu Kuli Daano tundifala,

¹⁸ Kelima wani n yen poagili, ki go buu. Wani n yen pua ki poagili, o nii n go teni lan soangi.

¹⁹ Figilima coacoali o baa faabi a leni li paboanli Yaala n bia mo kan nandi a hali abada.

²⁰ O baa faabi a leni mi kuuma mi koma yogunu, Bu toabu yogunu mo, o baa kubi a miali.

²¹ Bi niba ñoana kan nandi a, A kaa jie puu kuli mi yebiadima yaa cua ki baa ŋa.

²² A kan yaa bangi mi yebiadima leni mi koma kuli po. A kan yaa jie ti moayandi moko.

²³ A tana kan yie a bonbulikaala po, Ti moayandi mo kan biidi a kuani.

²⁴ A baa yaa ye leni mi yanduanma a diegu nni. A baa goandi a yanloli ki sua liba ki poadi.

²⁵ A baa le ke a puoliŋuani yabidi Ke a yaabila mo yaba nani ki tinga nni muadi yeni.

²⁶ A baa podi hali bonŋanla ki yuandi ki kpe, Nani i di n yen be, ban pedi i maama yeni.

²⁷ Diidi ti kpaagi likuli po ki sua ke li tie yene. Moala a gbadi la, moandi lan todi a.»