Jobi 42 - Gourmanchéma Bible

¹ Joba den guani Li Miali Diedo ki yedi:

² «N bani ke a fidi li bonla kuli, Ke liba mo ki ye ki pa ki pendi a paalu.

³ A yedi: ‹Ŋme n bua ki gangi gangi ki biidi n yanjaga Leni mi yanluodanmaama?› Moamoani de, n den maadi min kaa bani yaala, Ke li den pia npo mi gangima.

⁴ A yedi: ‹Cengi nni, n baa maadi! N baa buali a i buali, ŋan guani npo!›

⁵ N tubili den gbadi ke bi maadi a maama, Ama moala wani, n nunbu laa ŋa.

⁶ Lani n teni n tuo ke i tagili tie n yii Ki gba mi fantanpiema leni mi tama nni ki miadi sugili.»

U Tienu goa ki mangi Joba yema

⁷ Li Miali Diedo n den maadi leni Joba laa maama ki gbeni, o den yedi Temana yua Elifasa: «N pali beni hali boncianla fini leni a danliliediba po, kelima yii maadi yaala n tiegi npo nani n naacemo Joba yeni.

⁸ Baa mani moala po naatona lele leni petona lele ki gedi n naacemo Joba kani, ki padi yi yula po li *padijuukaali. N naacemo Joba baa jaandi yipo, kelima n jigini o. N kan faligi yi nani yi yanluoma n bi pundi maama, kelima yii maadi npo ke li tiegi nani n naacemo Joba yeni.»

⁹ Temana yua Elifasa, Sua yua Bilidada leni Naama yua Tisofala den gedi. Bi den tieni nani Li Miali Diedo n den yedi ba maama. Li Miali Diedo den ga Joba jaandi.

¹⁰ Joba n den jaandi o danlinba po ki gbeni, Li Miali Diedo den goa ki kaani o o yemankpiama nni. Li Miali Diedo den puni o wan den kpa pia yaala kuli figilima lie.

¹¹ Joba kpiiba, li jaba leni li puoba kuli, ki taani leni o nibankaaba kuli den cua ki taani ki dini leni o o diegu nni. Bi den baligidi ki go baagi o leni Li Miali Diedo n den teni ke yaa yebiadima kuli n den ŋma o yaa po. Lanwani bi siiga nni yua kuli den puni o kujapienyenli leni wula ñoagibili.

¹² Li Miali Diedo den seligi Joba miali juodima dana ki cie yaa dana n den kpia. O yanbidi di den tie piiga n tudanaa (14 000), o yuoyuodi tudaluoba (6 000), o naakpakpaadi tudalie (2 000), o ŋunñoe tudili (1 000).

¹³ O den mali bonjala lele leni bonpola taa.

¹⁴ O den yini ki bonpokpiaga Yemima, ki bonpoliega Kesia, ki bonpotaaga Keleni-Apuki.

¹⁵ Mi diema kuli yaa niinni, laa den pia yaa puoba n den ŋani ki pundi Joba bisiaba. Bi baa den puni ba li faali bi naataanjaba kani.

¹⁶ Laa bonla kuli yaa puoli, Joba miali yema dana go den pugini hali kobiga n bina piinaa. O den laa o bijaba, leni o bijaba yaa bijaba ki ban pundi hali yaabinaa.

¹⁷ Joba den podi hali bonŋanla ki gbadi o miali yema manu ki nan yuandi ki kpe.