Jobi 4 - Gourmanchéma Bible

¹ Lanwani Elifasa Temana yua den yedi:

² «Naani n yaa maadi baa mayenma a pali kan be? Ama ŋme wani n nan baa fidi ki yaa ŋmini?

³ Diidi a bangi bi niba boncianla mi bangima. A den paagidi yaaba yaa buadi n tadigi.

⁴ A den yen maadi ki fiindi ki siendi yaaba n jadibi A den yen paagi yaaba yaa duna poali ke bi buandi.

⁵ Ama moala ke li di tie fini, a pali be, Moala lan di nandi fini yeni, a yagini a yama.

⁶ Naani a fangili U Tienu po ka tie a jigi? Naani a suginma ki tie ŋan cuoni leni li papienli yeni kaa?

⁷ Tiadi ki le a yaa kpa laa yaa niba n ki pia tagili bodi? Bi a kpa laa bi niteginkaaba mo bodi le po yo?

⁸ Nani min laa ke bi kpakpaaba yen ŋanbi ki tinga li coagili po Moko bi nitianba tiendi ti *tuonbiadi Ki pagini mi biadima nani li bonpagikaala yeni. Bi baa baa bi biadima panpaani.

⁹ U Tienu fuoma n baa kpa ba. O pabienli faagu n baa je ba.

¹⁰ U Tienu teni ke i yangbanli dunli suo, Ki kua laa yanbiaditi kuli ñina.

¹¹ Mi jiema luoma po teni ke i yangbanli kpe, Ke bi bila mo sani ki yadi.

¹² N gbadi mayenma ŋasiili nni Ke mi soabidi n tubili nni,

¹³ Ti dangidi nni min dua ku ñiagu ki goa yaa yogunu, Bi niba n yen guani ki nali bi landi yaa yogunu.

¹⁴ Ti jawaandi mubini nni N gbanu kuli digibe toantoani.

¹⁵ Fawaamaba piebi n nunga nni N gbanu kobidi fii ki sedi.

¹⁶ Bonla den se ke mii bandi la Ku jinjingu den se n nintuali Li den tie suo ke n den yuandi ki gbadi u nialu ke u yedi:

¹⁷ ‹Naani o nisaalo yua n baa kpe, baa fidi ki yaa tiegi U Tienu nintuali? Naani o nilo baa fidi ki yaa ŋani yua tagi o nintuali?

¹⁸ U Tienu yaa dugi o naacenba po, Li yaa tie ke o laa i tagili bani o malekinba kani,

¹⁹ Naani o kan go le i tagili bi nisaaliba yaaba n tie ti tandi kani ka ki cie? Bani yaaba yaa gbani kuli n tie tama Ke bi go tadi ki cie a sidibila Ke bi baa fidi ki midi ba faala faala po.

²⁰ Yentunyenli bebe bi pua ki mudi ba Bi yaa kpe li gbeni cain oba kan faami lipo mo. Ban den pia yaala kuli, bi ga la.

²¹ Bi kpe kaa bandi U Tienu sanu.›